Vittus Qujaukitsoq: - Ilaasortat qisuariaataat paasilluarsinnaavara

KNAPK-ip ukiuni kingullerni sisamani naatsorsuutai naapertorlugit kattuffiup aningaasaqarnera ilungersunartumik inissisimavoq, tamannalu pisortaanermut Vittus Qujaukitsumut kinguneqartinneqartariaqartoq, immikkoortortaqarfinni siulittaasut Sermitsiamiit oqaloqatigineqartut isumaqarput.

- Ilaasortat qisuariarnerat paasilluarsinnaavara. Asaneqarnera killeqartartoq nalunngilluarpara, kisianni aarlerinngilanga.

- KNAPK-mi pisortaanertut atorfik nunatsinni ilungersunarnerpaajuvoq. Kattuffiup siulersuisuuneri taakkuupput uanga pisortaanertut atorfeqarninnut naggataani aalajangiisussat. Uanga siunissara allamiissasoq aalajangertoqassagaluarpat soorunami inuunera ingerlaqqissaaq.

- Kisianni kattuffiup tunuliaqutaaniik sakkortuumik pissuseqartoqartarnera inuttut nungullarsaataasorujussuusarpoq, taamaammat suliffimmi tassani pisortaasarsimasut kingumut qiviaraanni ajoraluartumik sivikitsuinnarmik atasarsimapput, taamaammat peqqissumik pilluarlunilu inuussagaanni suliffik taanna ujartugassaanngilaq, Vittus Qujaukitsoq oqarpoq.

Taassuma oqarnera naapertorlugu allaffissornikkut annertuumik sipaarniartoqassasoq siulersuisuunerit piumasaraat.

- Immikkut ittumik iliuuseqarnissaq suli pisariaqartussaavoq, kisianni kattuffiup akiliisinnaajunnaarnissaa suli taamak qanitsiginngilaq.

- Piffissamilu aggersumi missingersuutit siulersuisuunernit oqaluuserineqalerpata qanoq ingerlariaqqittoqassanersoq ilanngullugu oqaluuserineqassaaq, tassungalu atatillugu siunissara qularnanngitsumik aamma nalilersuiffigineqassaaq.

- Suliannut atatillugu aqutsinerlunnermut peqquserlunnermilluunniit tunngasunik ersissutissaqanngilanga, taamaammat ernumallunga suliartorneq ajorpunga, taanna oqarpoq.

Pissutsit assigiinngitsut

Pisut assigiinngitsut kattuffiup sunniuteqarfigisinnaanngisai peqqutaallutik maannakkut taamatut inissisimasoqartoq, Vittus Qujaukitsoq nassiuaavoq.

- KNAPK-mi ukiuni kingullerni pisortanik soraarsitsisarnerit kattuffiup aningaasaqarneranut nanertuutaanikuupput, taassuma saniatigut aalisartunut piniartunullu siunnersorteqarfik (AAPISI, aaqq.) ukiut marluk matuma siornatigut annaanikuuarput, taamaalilluni Namminersorlutik Oqartussat tapiissutigisartagai ukiumut 1 million koruunit tungaanoortut kattuffiup annaanikuuai.

- Taassumalu saniatigut sulisut marluk soraarsinneqarnerannut kattuffimmut aningaasartuutit annertunikuupput, taanna oqarpoq.

Kapisilinnut aningaasaateqarfiit North Atlantic Salmon Fund, NASF, aamma Atlantic Salmon Federation, ASF, KNAPK-mut tapiissutissaralui 9,5 millionit koruunit missaanniittut annaaneqarsimasut KNAPK isumaqarpoq, tamannalu pillugu qanittumi eqqartuussivilersuunneqarput, ilisimaneqartutullu tassani kattuffik eqqartuussivimmi ajorsartinneqarpoq.

- Kapisilinnut aningaasaateqarfinniit tapiissutit pissarsiarineqartarsimanngillat, kisiannili eqqartuussivilersuussineq unitsinnagulu aningaasat pissarsiarisinnaasagut pillugit suli illuatungerisatsinnut saqitsaassuteqarpugut.

- KNAPK-p aningaasat pissarsiariumaarai siunissaq eqqarsaatigalugu upperiuarpara, taamaammat maannakkut inissisimanerput, naak immaqa allat aarlerinartorujussuartut isigigaluaraat, ernumaginngilara.

- Aammali siorna nuna tamakkerlugu aalisarnerliortoqarnera pissutaalluni missingersuutini 800.000 koruunit missaannik ajornerusumik angusaqarnikuuvugut, ukiorlu manna aalisarneq pitsaanerulaaraluartoq aamma amigartooruteqassaagut, tamannalu aalisartut tunisinerminni kattuffimmut akiliutigisartagaasa ikinnerulernerannik ilaatigut peqquteqarpoq, pisortaaneq oqarpoq.

Raajarniat KNAPK-miit QAK-mut nuunnerat ukiumut ilaasortaanermut akiliutit 700.000 koruunit sinnerlugit annaaneqarsimanerannik kinguneqartoq taanna oqarpoq.

KNAPK-mut ilaasortat 2021-mi 1.177-iupput, 2024-imilu 1.819-iullutik, tamannalu kattuffiup sulineranut tatiginninnertut nalilerneqartariaqartoq Vittus Qujaukitsoq isumaqarpoq.