Urani pillugu politikkimut appakaattoq - maannali oqartussaaffiit allaqqinnaat naalakkersuisuuffigigai 

Politikkip iluani susoqarsinnaanera eqqoriaruminaattuaannarpoq.

Politikkip iluani pisussat siulittoruminaassinnaaneri Mariane Paviasen Jensenip aamma misigerujai. 

Inatsisartunut ilaasortaagami Inatsisartut upernaaq apriilimi ataatsimiinnissaanut Narsamit Nuuliassalluni piareersarnermi nalaani naalakkersuisunngornissaminik eqqarsaateqanngilaq.

Siulittaasuali Múte B. Egede sianerpoq naalakkersuisunngorsinnaanersorlu aperalugu. Mariane Paviasen Jensenilli oqartussaaffiit taakkua naalakkersuisuuffigerusunnerlugit eqqarsaqqaartariaqarpoq.

Piffissaq kingulleq akuersisoq 

Aatsitassat, inuussutissarsiorneq aningaasaqarnerlu Mariane Paviasen Jensenip Inatsisartunut 2020-mili ilaasortaanermini annermik suliaqarfigisimagamigit naalakkersuisutut akisussaaffissani nalornisigai. 

- Aperineqarama oqarfigivakka eqqarsaatigerujussuaqqaartariaqarlugu tassungassanerlunga, Mariane Paviasen Jensen oqarpoq.

Kiisa Inatsisartut upernaakkut ataatsimiinnissaannut ulloq ataasiinnanngorpoq. Ataatsimiinnermi apriilip 14-iani aallartissaaq. Mariane Paviasen Jensenilu  naalakkersuisunngussalluni apriilip 13-iani aatsaat akuersivoq.

- Siulittaasutta oqaluffigigaminga imaalitillunga "Wow, ilumoorputit uannoorpoq.", Mariane Paviasen Jensen oqarpoq. 

Taassuma nammineq oqaluttuarnera naapertorlugu partiimi siulittaasup kaammattorluarpaa, suliassamullu pilerilersillugu. 

- Uteriitsuugama, nipangersimaannarneq ajorama, oqarsinnaasarama suliakkiisinnaallungalu, Mariane Paviasen Jensen oqarpoq.   

Aatsitassat, inuussutissarsiutit aningaasaqarnerlu ukkatariunnaarlugit meeqqat, inuusuttut, inatsisit atuutsinneqarnerat naligiissitaanerlu pillugit ulluinnarsiuteqartussanngorpoq. 

- Ilaana, allaanerujussuarmik suliaqalerpunga. Kisianni uanga attuumassuteqartippakka. Siunissarput, meeqqatta siunissaa maannakkut suliarisussanngorpara. 

Meeqqat 935-t angerlarsimaffiup avataanut inissinneqarsimasut 

Naalakkersuisutut atuutileqqammiinnarluni nalunaarusiaq siulimi Deloittemut suliakkiutaa tiguaa. Nalunaarusiaq atuassallugu alianartoq. 

- Tassa taanna annernaq paasillugu. Maanngannginninni taanna ilisimakannereernikuuara qanoq ilungersunartigisumik inissisimasoq, kisianni taama amerlatigineri iluamik ilisimaqqissaarsimanngilara, Mariane Paviasen Jensen ilungersuummersimalluni oqarpoq. 

Meeqqammi 935-t angerlarsimaffiup avataanut piffissami sivikinnerusumi sivisunerusumiluunniit 2024-mi inissinneqarsimasut nalunaarusiami saqqummiunneqartut ilagaat.

Aningaasallu ikigisassaanngitsut meeqqat angerlarsimaffiup avataanut inissinneqarsimasunut atorneqartarput.

Ukioq 2024 kisiat qiviaraanni 700 mio. koruuningajalluinnaat angerlarsimaffiup avataanut inissiisoqartarnera peqqutigalugu aningaasartuutigineqarsimapput.

- Tassani takusinnaavara meerarparparujussuit angerlarsimaffiup avataanut inissinneqarsimasut, angajoqqaarpassuit ajoraluartumik ullumikkut kivitsisinnaajunnaarsimapput, Mariane Paviasen Jensen oqarpoq. 

Siusissukkut iliuuseqarneq 

Meeqqat taama amerlatigisut angerlarsimaffiup avataanut inissinneqartassanngippata siusissukkut iliuuseqarnerit aallartinneqarnissaat naalakkersuisuunermini suliassami pingaarnerit ilagigaat qularinngilaa. 

- Imaanngitsoq ajorluinnaleraangat aatsaat, meeqqat arsaarinnissutigineqartariaqaleraangata pisoqartassasoq, tassunga aatsaat killikkaangata sullissineq maannakkut ajoraluartumik pisarpoq, Mariane Paviasen Jensen oqarpoq. 

Siusissukkut iliuuseqarneq qangali eqqartorneqalerpoq, qanoq ilillutit illit angussaviuk siusissukkut iliuuseqarneq? 

- Atorfilittat peqatigalugit, kommunit peqatigalugit, angajoqqaat piumassuseqartillugit peqataanissaannut. Qulaaninngaanniit aalajangiinnarnata "ima iliussuusi, ima iliussuusi." Angajoqqaat kommunillu taakkua pisariaqartitaat aallaavigalugit sulineq ingerlasariaqarpoq. 

Ataaserli qularnanngilaq. Meeqqat angerlarsimaffimmik avataanut inissinneqartariaqalertarnertik namminneerlutik pisuussutiginngikkaat naalakkersuisup erseqqissarumavaa. 

- Meeraq ataaserluunniit pisuunngilaq nammineq inunngorsimanermini. Taamaammat angajoqqaat taakkua akisussaasuusut ulluni makkunani ilungersunartumik inissisimanitsinni, 900-t sinnerlugit angerlarsimaffiup avataanut inissinneqarsimasunut peqqissanngikkutta pingaartukuluuvoq paasissagipput angajoqqaat taakkuusut meeqqanut akisussaanerpaasut, Mariane Paviasen Jensen oqarpoq. 

Imminut toqussimasut qanigisaat ikiorneqarnerusariaqarput 

Imminut toquttut ukiuni kingullerni ikiliartunnginnerat peqqutigalugu suliniutit amigarnerarlugit naalakkersuisup qaammat una qiteqquttoq oqaatigaa. 

Imminulli toqunnikkut qimagaasut pitsaanerusumik sullinneqarnissaat aamma angorusuppaa.

Mariane Paviasen Jensenip qanigisamini imminut toquttoqarnera nammineerluni misiginikuuaa. Soralussanimi imminut toqummat annaanikuugamiuk. Qanigisaasut taama pisoqartillugu ikiorserneqartannginnerat uggoraa. 

- Inooriaatsitsinnut ilaavallaanngilaq ikioqquneq, namminerluunniit ornigunneq. Amerlavallaartut pisariaqartitsigaluarlutik nammineq pisortaqarfiliarlutik ornigutinngitsoorsinnaasarput, immaqa ajukkullutik, immaqaluunniit suna peqqutaanerpa, Mariane Paviasen Jensen oqarpoq.  

Taamaammat suliniutit saniatigut qanigisaasut ikiorneqarnerunissaat naalakkersuisup suliniutigerusuppaa. Qanorpiarli iluseqassanersoq suli oqaatigisinnaanagu.

- Qanutoqqissaaq inissinnissaa suli nalupajaarpara, kisianni taamaallaat nalunngilara pisariaqartitsisoqartoq. Takorloorsinnaasara taannaavoq ornilaartarlugit oqaloqatigilaartarlugit oqilisaallugit. Paasitillugit maaniittugut. Pisariaqartitsiguit imaanngitsoq illit aggertariaqartutit, Mariane Paviasen Jensen oqarpoq.