USA Kalaallit Nunaanni angisoorsuarnik marlunnik sakkutooqarfiliorniarpoq

USA-p præsidentiata Donald Trumpip FN-ip New Yorkimi ataatsimeersuarnerani oqalugiarnermini USA-p, Kalaallit Nunaata Danmarkillu akornanni isumaqatigiissut nutaaq ullumi atsiorneqarsimasoq eqqartorpaa.

Trumpip isumaqatigiissut tamanna Amerikap Kalaallit Nunaanni isumannaallisaanermik aqutsinissaanut isumaqatigiissutitut asseqanngitsutut taavaa.

- Amerikap nunavittaata illersornissaanut pisariaqartunik iliuuseqarnissatsinnut periarfissaqarlualerpugut.

Aamma atuaruk

Isumaqatigiissut imaappoq: Illersornissamut immikkoortut nutaat aningaasaliinerillu Kalaallit Nunaata suleqatigiinnermut peqataasunut killeqarput

- Sakkutooqarnerput erngerluta annertusassavarput, Trump oqarpoq.

Trumpip USA Kalaallit Nunaanni sakkutooqarfimmik marlunnik angisoorsuarnik sanaartorniartoq aamma erseqqissarpaa. Kalaallit Nunaanni Amerikamiut sakkuktooqarfiat ataasiinnaq massakkut atuuppoq: Pituffik Space Base.

Naalakkersuisut siulittaasuata Jens-Frederik Nielsenip, Danmarkip ministeriunerata Mette Frederiksenip Donald Trumpillu nunat taakku marluk isumaqatigiissutaat atsioqqammerpaat.

Mette Frederiksenip Jens-Frederik Nielsenillu nunanut allanut tunngasunut naalakkersuisoq Múte B. Egede aamma Danmarkimi nunanut allanut ministeri Lars Løkke Rasmussen peqatigalugit FN-imi oqalugiaat tusarnaarpaat.

- Amerika uteqqippoq

Trumpilli Kalaallit Nunaat pillugu isumaqatigiissuteqannginnermini allarpassuit eqqartorpai.

Oqalugiaatini USA-mi pissutsit qanoq ingerlalluartiginerat oqaluttuaralugu aallartippaa.

- Amerika uteqqippoq, nunarpullu aatsaat taama nukittutigaaq, taanna oqarpoq.

Ilaatigut nunasisunut allagartaqanngitsunut USA-mi sukannersumik nakkutilliineq pinerlunnerit amerliartornerat aamma eqqaaavai.

Taava nunanut allanut tunngasut USA-llu ukiumi kingullerni nunanut allanut iliuuserisimasai eqqartorpai.

- Allat oqaluttut uanga iliuuseqarpunga. Allat eqqissineq pillugu oqaluttut uanga eqqissisitsivunga. Allat sioorasaarinerit soqutiginngitsuusaaraat uanga iliuuseqarfigaakka.

Trumpip Iranimut iliuuserisimasani taakkualu atomimik sakkussiaqalernngisaannarnissaannik qulakkeerinninnerminut tunngatillugu tulluusimaarutiginnilluni oqaluttuarpoq.

- Alajangigassaqarpunga. Iran naalagaaffittut siornatigumit nukittunerulersillugu isumaqatigiissusiortoqassava, imaluunniit Islamisiortut Naalagaaffiat piuneertsissavara? Imaluunniit aniguinissamut neriuutaarullugit anniarfimmut igissavakka?

Kingusinnerusukkulli USA-mi novembarimi qinersisoqareerpat isumaqatigiissuteqassasut ilimagissallugu oqarpoq.

Sorsunnerit arfineq-pingasut taamaatisikkai

Taava siorna januaarimi præsidentitut aappassaanik ivertinneqarnermi kingorna sorsunnerit arfineq-pingasut taamaatisissimallugit eqqartorpai.

Ilaatigut Gazami sorsunneq, kingullermik FN-imi oqalugiarnerminit sapaatip-akunnialui qaangiuttut taamaatisissimasani.

- Sapaatit-akunnialui qaangiummata Gazami sorsunneq taamaatisipparput. Aamma tigusaasimasut sinneri, uumasut toqusimasullu, angerlartippagut. Taamaaliornerput tupinnartuliaasoq kikkut tamarmik isumaqarlutillu aqqusinermi nalliuttorsiutigaat.

Ukrainemilu sorsunneq qanittukkut taamaatissasoq Trump oqarpoq, qanittukkullu isumaqatigiissuteqarumaartut oqaatigaa.

Taava Venezuela, Mexico Cubalu eqqartorpai.

Kalaallit Nunaannut isumaqatigiissut eqqaareerlugu naggataatigut silassorissuusiat silassorinnerpaatullu taaguuteqalertariaqarneri eqqartorpai.