USA-mi atorfilittaq: Kalaallit Nunaata amerikamiit aqunneqalernissaa aaqqiissutissatuaavoq

USA-mi atorfilittap atiminik isertuussisup, USA-p "nunarsuarmi sillimaniarnermut ulorianartorsiortitsinerit" Kalaallit Nunaannut tunngassuteqartut anigornissaannut " Kalaallit Nunaat amerikamiit aqunneqalernissaa" suli aaqqiissutissatuaasorigaa,
sapaatiummat erseqqissarpaa.

Atorfilittaq tusagassiortunut, Natop Tyrkiap illoqarfiisa pingaarnersaanni Ankarami ataatsimeersuarnissaa marlunngornermi aallartittoq sioqqullugu, taama oqaaseqarsimasoq, nutaarsiassaqartitsivik dpa allappoq.

- Natop Kalaallit Nunaata illersornissaanut tunngatillugu pisariaqartitsinerata matussusernissaanut tamanna pitsaanerpaajussasoq suli isumaqarpugut, oqarpoq.

Atorfilittap sumiiffiup imartaani suliaqartoqarnerunera ilaatigut erseqqissarpaa, USA-llu præsidentiata Donald Trumpip sumiiffimmi tassani ataavartumik aaqqiissutissamik ujartuinera oqaatigalugu.

- Maannakkut taama inissisimasoqartillugu, USA-p Kalaallit Nunaannik tiguaanissaa aaqqiissutissatuaasinnaasutut isigaarput, oqarpoq.

Atorfilittalli periarfissat allat suli misissorneqarnerat erseqqissaatigaa, sukuminnerusumilli oqaaseqarnani.

Donald Trumpip Kalaallit Nunaannik, danskit naalagaaffeqatigiiata ilaannik, sillimaniarneq pissutigalugu tiguaanissaq arlaleriarluni oqaatigaa. 

Isumassarsiaq taanna Kalaallit Nunaannit Danmarkimiillu itigartinneqarpoq tamannalu USA-mut politikkikkut akerleriissuteqalersitsivoq.

Amerikamiut ullorsiorfiat Danmarkimi arfininngornermi Rebildfestimi malunnartinniarneqarmat tamanna USA-mit sinniisoqarnani pivoq.

Nuannatsitsineq danskit Amerikamiullu ikinngutigiittut peqatigiiffiannit aaqqissuunneqarpoq. Peqatigiiffiup USA-p avataani malunnartitsiniaanerit annersaattut taasarpaat.

Ukioq mannali USA-mit sinniisoqassanngilaq.

Aalborgimi illoqarfiup siunnersoqatigiivisa pisortatigoortumik sinniisut qaaqquneqarpata, Kalaallit Nunaannut tunngatillugu pissutsit ilungersunartut pissutigalugit, ukiumut tapiissutinik 300.000 koruunit missaannik amerlassusilinnik tunniussisarunnaarniarluni siusinnerusukkut aarlerisaarutigaat.

Taamaattumik Rebildselskabet pisortatigoortumik sinniisunik qaaqqusiumanatik aalajangerpoq, naak qattunerni nuannatsitsinerni arlalinnik siornatigut sinniisoqartaraluartoq. 

Peqatigiiffik politikkikkut apeqqummi pingaarutilimmi akunnermiliutsitaasutut misigisimasoq, Jørgen Bech Madsen peqatigiiffimmeersoq DR-imut oqarpoq.

Qattunerni aqqissuussisarneq 1912-imi siullerpaamik pivoq.

RITZAU/dpa