USA-mi inatsisartuni ilaasortap Danmarki Kalaallit Nunaallu aqqartartumi pisumi qutsavigai: - Aqutsisut arlaannik pissuteqarlutik nipaarluupput
USA-mi inatsisartuni ilaasortap Danmarki Kalaallit Nunaallu aqqartartumit USS Delawaremit inuttamik sukkasuumik suliamillu ilisimasaqarluarluni sapaatip-akunnerata naanerani napparsimmaviliaassinerannut qujaffigai.
Inuttat ilaat annaanniarlugu qulimiguulik umiarsuarmit alapernaarsuummit Vædderenimit aallartinneqarpoq.
Assi toqqorsivimmit: Oscar Scott Carl
Danmarki Kalaallit Nunaallu Amerikamiup aqqartartumit Nuup avatinnguaniittumit sapaatip-akunnerata naanerani napparsimmaviliaassinerannut USA-p Kongressianit qujaffigineqarput.
USA-mi inatsisartut ilaasortaq Demokraatineersoq Joe Courtney oqalugiarnermini Danmarkimut Kalaallit Nunaannullu ima qujassuteqarpoq:
- Danmarki Kalaallit Nunaallu USS Delawaremi, Kalaallit Nunaata sineriaanit 7 sømilinik ungasitsigisumiittumi, amerikamiumik inuttamik sukkaannaq suliamillu ilisimasaqarluarluni napparsimmaviliaassinerannut qutsaviginiarlugit maaniippunga, Joe Courtney oqaaseqartarfimmit oqarpoq.
- Siuttut nipaarluusut
Issittumi Sakkutooqarfiup inuttaq, erngutumik nakorsiaattarialik, Nuummi Dronning Ingridip Napparsimmavissuanukaappaa. Arfininngormat ualikkut pivoq.
USA-mi Inatsisartunut Connecticut sinnerlugu ilaasortap, aqqartartup suminngaannerfianeersup, kalaallit qallunaallu iliuuseqarnerannut USA-p qullersaqarfiannit pisortatigoortumik qujassuteqartoqarsimannginnera tupigusuutigaa:
- Siuttut suna pinerpa pissutigalugu Danmarkip iliusaanut qujassuteqarnissamut nipaaruupput, Joe Courtney oqarpoq, nangipporlu:
- Aqqartartup suminngaanneerfianeersutut nunamut (Danmarkimut, aaqq.) inuttatsinnut ajornartorsiortunut isumassuisimanersi qujamasuutigineqarlunilu sivisuumik puigorneqarunannginnera tamanut ammasumik oqarusuppunga.
Aqqartartup nassuiarneqannginnera
Amerikamiut aqqartartuannik suliaq uissuumititsivoq, ilaatigut Siumumeersup Erik Jensenip Kalaallit Nunaata USA-llu akornanni politikkikkut pissutsit ilungersunartut eqqarsaatigalugit aqqartartup Kalaallit Nunaata imartaaniinnera suneralu Naalakkersuisunut apeqquteqaatigai.
USA-p nammineq isumannaallisaaneranut iluaqutaasumik, USA-p aqqartartui ukiut qulikkuutaat ingerlaneranni Natop imartaani soorlu Kalaallit Nunaata, Islandip Tuluillu Nunaata imartaanni nakkutilliisartut, Joe Courtneyp oqalugiarnermini eqqaavaa.
- Suleqatigiinneruvoq. Danmarkillu annaassiniaanera Nato-mi iligiit oqaasiinnanernik tunngaveqarani aammali isumalinnik iliuuseqartoqartarneranik takutitsivoq, Joe Courtney oqaluttarfimmit oqarpoq.
Atomip nukinganik ingerlasoq
USS Delaware aqqartartoq saassussisartoq atomip nukinganik Virginia-klassimeersumik motoorilik, USA-p sakkutuuisa imarsiortut nittartagaanni allaqqavoq.
- Aqqartartut immami sineriamilu assigiinngitsorpassuartigut atorneqarnissaannut sanaajupput, U.S. Navy aqqartartoq pillugu allappoq.
USA-mi præsidenti Donald Trump "umiatsiaq napparsimmavik pitsaasoq" napparsimasunik isumagineqarpiarsimanngitsunik Kalaallit Nunaannut isumassuisussaq pillugu nalunaaruteqarnissaa sioqqutilaarlugu amerikamiup inuttap annaanniarneqarnera pivoq.
