USA-p nunanut allanut tunngasunut ministeria: Kalaallit Nunaannut tunngatillugu inissisimalluarpugut

USA Kalaallit Nunaannut tunngatillugu "inissisimalluarpoq". USA-mi nunanut allanut tunngasunut ministeri Marco Rubio pingasunngornermi senatimi tusarniaanermi oqarpoq.

Ministerip “tamanut iluaqutaasumik” sulisoqartoq aamma oqaatigaa.

- Maannakkut oqaloqatigiitsilluta, Kalaallit Nunaanni Danmarkimilu suleqativut peqatigalugit ajornartorsiut tamanna pillugu teknikkikkut ataatsimiittoqassaaq, isumaqarpungalu tamanut pitsaasumik angusaqarfiusumik periuseqartoqartoq, Rubio tusarniaanermi oqarpoq.

- Isumaqarpunga ajunngitsumik iliuuseqarsimalluta, suliarlu ileqqorissaarluta toqqaannartumik aallartissavarput. Ullumi aallartippoq, ataavartumillu ingerlassalluni.

Isumaqatigiinniarnerit tamarmik "tusagassiuutitigut qassiiliuutiginagit" ingerlanniarneqartarnissaat Rubiop aamma erseqqissarpaa.

- Isumaqarpunga ajunngitsumik inerneqassasugut, Europamilu suleqativut qanittukkut taamatut aamma tusarfigiumaarivut ilimagaara, oqarpoq.

Amerikamiut, qallunaat kalaallillu isumaqatigiinniartartut Kalaallit Nunaat pillugu ataatsimiinnerpassuit marlunngormalli aallartissimagaat tusarfiit aqqisigut taaneqanngitsut DR-imut oqaluttuarput.

Tusagassiorfik pingasunngornermi allappoq.

USA-p præsidentiata Donald Trumpip Davosimi World Economic Forumimi sapaatip-akunnerani kingullermi oqalugiarnermini Kalaallit Nunaata tiguarnissaanut pissaanermik atuiniarani – siusinnerusukkut tamanna tunuarsimaarfiginnginnerarnikuugaluarlugu - oqaareernerata kingorna taama nalunaaruteqartoqarpoq.

Kalaallit Nunaata tiguneqarsinnaanera pillugu isumaqatigiinniarnissani qanittukkut aallartinniarsaralugu Trump aamma oqarpoq.

NATO-p generalsekretæria Mark Rutte peqatigalugu Kalaallit Nunaat pillugu siunissami isumaqatigiissusiornissamut sinaakkutissat isumaqatigiissutigisimallugit Trump aamma oqarpoq.