USA-p præsidentiata tulliata Pakistanimi isumaqatigiinniarnerit ingerlalluarnissaat naatsorsuutigaa

USA-p præsidentiata tullersortaa J.D. Vance Pakistanimi illoqarfiit pingaarnersaanni Islamabadimi Iranimik eqqisseqateqarnissamik isumaqatigiinniarniarluni tallimanngormat aallarpoq.

Tassani Amerikamiut aallartitaat Iranimiunik isumaqatiginninniartut siuttuuffigissavai.

Vancep isumaqatigiinniarnerit iluatsilluarumaartut isumaqarluni tusagassiortut najuuttunut timmisartumut ikinnginnermini oqarpoq.

CNN taama allappoq.

- Soorlu USA-p præsidentiata oqarneratut, Iranimiut ilumoorlutik isumaqatiginninniarnissaminnut piumassuseqarpata assavut isaatissavagut, oqartoq tusagassiorfik allappoq, nangipporlu:

- Sianiinaarniassappatigut isumaqatiginninniartut saaffigiuminartuunngitsut paasissavaat.

Aammattaaq præsidentip tullersortaa USA-p aallartitai isumaqatigiinniarnernut tunngatillugu præsidentimit Donald Trumpimit "erseqqissunik malittarisassalerneqarsimasut" oqarpoq.

Vancelip malittarisassat taakku sumut tunnganersut itisilinngilai.

USA-miit isumaqatiginninniarnernut peqataasut præsidentip tulliata saniatigut immikkut aallartitaq Steve Witkoff aamma præsident Trumpip ningaava Jared Kushner ilaapput.

Iranip aallartitai kikkuussanersut pisortatigoortumik nalunaarutigineqanngillat. Tusarfiilli atiisigut taaneqanngitsut Reutersimut siusinnerusukkut nalunaarput, aallartitat Iranimi inatsisartut siulittaasuannit Mohammad Baqer Qalibafimit aamma nunanut allanut tunngasunut ministerimit Abbas Araqchimit siulersorneqassasut.

Pakistanimi isumannaallisaanermut tunngasunik ilisimasallit naapertorlugit arfininngornermi ataatsimiinneq pingaarnerpaaq sioqqullugu tallimanngornermili immikkut ilisimasallit oqaloqatigiinnerat aallartippoq.

USA-p Iranillu pingasunngornerup unnuaani sapaatit-akunnerini marlunni sakkuaakkunnaarnissartik isumaqatigiissutigimmassuk, Pakistanilu isumaqatigiinniartitsisuummat, illoqarfiit pingaarnersaanni akunnittarfimmi oqaloqatigiinnissaq naatsorsuutigineqarpoq.

Sakkulersunnginneq apriilip 22-ani atorunnaassasoq naatsorsuutigineqarpoq.

USA-p Iranimut siunnersuutini piumasaqaatinilu 15-inik saqqummiuppai, ilaatigut pineqarunarput Iranip atomimik sakkussiassanik suliniutaanik annikillisaanissaq, nunap rakettinik igeriuttakkanik sakkussianik killilersuinissaa Hormuzillu kangerliumarnganik ammaaqqiineq.

Iranip tamanna akissuteqarfigalugu pilersaarummik qulinik imaqartumik tunniussivoq, tassa kangerluup nakkutigineqarnissaa, akitsuutit atorunnaarsinneqarlutik, nunap immikkoortuani sakkutooqarnikkut suliaqarnerit tamarmik unitsinneqassasut aamma Iranimut pillaatisiassat atorunnaarsinneqarlutik.

/ritzau/