Utoqqaat Kalaallit Nunaata Naalagaaffeqatigiinnerup avataaniinnissaa ernumaginerpaavaat
Kalaallit inuuniarnikkut atugaasa ajornerulernissaannik kinguneqassappat Kalaallit Nunaata Naalagaaffeqatigiinneq qimassanngikkaa innuttaasut 65-it sinnerlugit ukiullit 85 procentii isumaqarput. Tamanna isumasiuinermi nutaami erserpoq.
Naalagaaffeqatigiinnermiit aninissaq Kalaallit Nunaanni innuttaasunut ataasiakkaanut inuuniarnermi atugassarititaasut ajornerulernerannik kinguneqarumaartoq 65-it sinnerlugit ukiullit sisamararterutaat isumaqartut misissuinerup nutaap takutippaa.
Assi: Thomas Rasmussen/Gonzales Photo/Ritzau Scanpix
Naalagaaffeqatigiinnermiit anineq Kalaallit Nunaanni innuttaasunut ataasiakkaanut inuuniarnermi atugarissaarnerup appariartorneranik kinguneqarumaartoq isumaqarpit?
Qinersinermi misissuisartup Sune Steffen Hansenip Copenhagen Postimeersup isumasiuinerani nutaami, paasissutissanik tunisisutut Opinion Danmark A/S-imit pissarsiarineqartumi, 65-ileereersimasut sisamararterutaat sinnerlugit „aap“-mik akipput.
Inuusunnerit affaasa missaanniittut apeqqut taannarpiaq angerpaat.
ISUMASIUINEQ QANOQ PILERSINNEQARPA?
• Kalaallit Nunaanni innuttaasut 18-ileereersimasut akornanni isumasiuineq ingerlanneqarpoq.
• Inuit 610-t nittartakkatigut oqarasuaatikkullu apersorneqarput.
• Oline januaarip 16-ianniit 26-ata tungaanut apersuivoq.
• Telefonikkut januaarip 19-ianniit 28-ata tungaanut apersuineq ingerlanneqarpoq.
• Akissutigineqartut suiaassutsit, ukiut, kommuninit tallimanit tamaneersut assigiinngitsunillu ilinniagaqarsimasut naapertorlugit agguataarneqarput.
Naalagaaffeqatigiinnermiit anineq Kalaallit Nunaanni innuttaasunut ataasiakkaanut inuuniarnermi atugarissaarnerup appariartorneranik kinguneqarumaartoq isumaqarpit?
Taakku qinersisartunik misissuisartup Sune Steffen Hansenip Copenhagen Postimeersup isumasiuineranit aallaaveqarput, paasissutissallu Opinion Danmark A/S-imit pissarsiarineqarput.
Qanittukkut isumasiuinermi apeqqutit pingasut Kalaallit Nunaata namminersulivinnissaanut atatillugu inuuniarnermut tunngasuupput, utoqqaallu amerlanertigut ernumassuteqarnerupput.
Naalagaaffeqatigiinnermiit anineq aningaasaqarnikkut inuiaqatigiinnut kalaallit atugaannut ajornerulersitsissasoq 65-it sinnerlugit ukiullit 70 procentii isumaqarput.
Utoqqaat Naalagaaffeqatigiinneq qimakkumanngikkaat
65-it sinnerlugit ukiullit kalaallit inuuniarnikkut atugaasa ajornerulernissaannik kinguneqarpat Kalaallit Nunaata Naalagaaffeqatigiinneq qimassanngikkaa isumaqartuni amerlanerpaammata tupinnanngilaq.
- Innuttaasut ukioqqortunerit isumaginninnikkut ikiorsiissutinik pisariaqartitsinerusarput, taamaammat allanik — aamma nalorninarnerusunik — soqutiginnippallaarneq ajorput, Sune Steffen Hansen oqarpoq nangillunilu:
- Toqqissisimaneq inunnut taakkununnga aalajangiisuunerpaavoq, aamma politikkikkut pingaarnersiuineq eqqarsaatigalugu. Ileqqoq taanna nunani allani aamma takusarparput.
Kalaallit Nunaat Naalagaaffeqatigiinnermiit anisariaqartoq apersorneqarsimasut sisamararterutingajaat isumaqarput. Taamatullu amerlatigisut apeqqut taanna pillugu „naluara“-mik akipput.
Kalaallit Nunaata Naalagaaffeqatigiinneq qimallugu namminersulivinnissaanik aperineqartut 62 procentii naameersimapput.
65-it sinnerlugit ukiullit aamma taama isumaqarput, taakkumi 85 procentii naaggaarput.
Kalaallit Nunaat maanna namminiilivintariaqartoq inuussunnerit sisamararterutaat isumaqarput.
Kalaallit Nunaat Naalagaaffeqatigiinnermiit anillunilu namminersulivittariaqartoq isumaqarpit?
Taakku qinersisartunik misissuisartup Sune Steffen Hansenip Copenhagen Postimeersup isumasiuineranit aallaaveqarput, paasissutissallu Opinion Danmark A/S-imit pissarsiarineqarput.
