Uuliasioqatigiiffik pisortamik nutaamik atorfinitsitsivoq — “Paatsuunganartumik attaveqaqatigiittoqarnera" nassuerutigaa

Amerikamiut suliffeqarfiutaat Greenland Energy Company suliniummik aallartitseqqaarneraniilli Nunap Qeqqani uuliasiorluni ujaasisoqarnera uissuummissutigineqarpoq.

Pingaartumik pisortaq Robert Price, piffissamut pilersaarut uuliamik nassaartoqarsinnaaneranut ilimagisani pillugit oqaaseqarneratigut, Ittoqqortoormiinilu innuttaasunik ataatsimiititsinermi pissusilersuutigisimasaa tusaamanerluutigineqarpoq.

Ingerlatseqatigiiffiup maannakkut Roderick McIllree aqutsinermut ilanngutsippat, "managin directorimik" taaguuserlugu. Robert Price pisortaanerugallassaaq, Roderick McIllree-li Kalaallit Nunaanni suliniummut akisussaasunngussalluni, tassunga ilanngullugu Kalaallit Nunaanni akuersissutinik suliaqarnerit tamaasa soqutigisaqaqatigiinnillu peqataatitsineq akisussaaffigissavaa.

Greenland Energy Company suliniut pillugu paatsuuganartumik pilersitsisimasoq, siulersuisuni siulittaasup Larry Swetsip tusagassiutitigut nalunaarummini nassuerutigaa:

“Suliamik alutorinninnitsinni attaveqaqatigiinnermik, kikkut Kalaallit Nunaanni sunut akisussaanersut pillugit paatsuunganartumik aallartitsisimavugut – tamanna arlaannulluunniit iluaqutaasimanngilaq, minnerunngitsumik najukkani inuiaqatigiinnut, suliassanut qaninnerpaami najugaqartunut.”

Isumakuluutit allattorneqarput

Siulersuisuni siulittaasup Greenland Energy Companyp siunissami inissisimaffissaa ima oqaatigaa:

"Qillerinissamut pilersaarummut aningaasalersuiniarluta aammalu teknikkikkut tapersersuiniarluta tamaaniippugut. Akuersissutit pillugit suliat, najukkani inuiaqatigiinnik akuutitsineq aamma kalaallit oqartussaasuinut attaveqarnerit 80 Mile og White Flame-mit isumagineqartussaapput. Taamaattariaqarpoq, aammalu taamaattussaavoq" Larry Swets oqarpoq.

McIllree, Nunap Qeqqani ujaasinissamut akuersissummik piginnittumi, White Flame Energymi siulersuisuni siulittaasuuvoq. Aamma 80 Mile-mi, 2024-mi White Flame Energymik pisiarineqartumi, pisortaavoq.

Ingerlatseqatigiiffik nangilluni allappoq nalunaarutaasut assigiinngilluinnartut pillugit isumakuluuteqartoqarnera maluginiarlugu, makkuninngalu iliuuseqaqataarusullutik:

"Sproule ERCE suliassaqarfimmut attuumassuteqanngitsutut naliliinerani ersarissarneqarpoq, Nunap qeqqani nappartat 13 mia.-t tikillugit qallorneqarsinnaasumik uuliaqartoq. Kisitsisit eqqoriaanerupput, iluatsitsinissamut ilimanaat 10%-iulluni. Teknikkimut ujarassiornermullu ilimanaataasorpiaat aningaasaleerusuttunik pileritsatsitsipput: 10 %-it taakku eqqorsinnaanerinut periarfissaqarniarlutik aningaasaliiniarput, taamaalillutillu 550 mio. koruunit missaannik atugassanngortussanik, misissuilluni qinnerinernut marlunnut pisariaqartinneqartunik aningaaliiniarlutik,“ ingerlatseqatigiiffik allappoq.

Aamma oqaatigaat, uuliat nappartat qanoq amerlatiginerat qularnaatsumik oqaatigisinnaanagu.

Roderick McIllree oqarpoq, misissueqqissaarluni qillerinernut marlunnut akuersissummik ukioq manna kingusinnerusukkut pissarsinissaq aammalu Kalaallit Nunaanni oqartussanik inuiaqatigiinnillu pitsaasumik suleqateqartuarnissaq pingaarnerpaajusut.