Uummannami innaallagissiorfik ikuallappoq - Inunnik ajoqusertoqarsimanngitsoq

OBS: Paasissutissat kingulliit ilanngullugit allaaserisaq nal. 13.50 nutarterneqarpoq.

Kalaallit Nunaanni Politiit Sermitsiamut uppernarsarpaat, Uummannami innaallagissiorfimmi maanna ikuallattoqartoq.

Kalaallit Nunaanni Politiini pigaartut pisortaat Aputsiaq Hansen Uummannami innuttaasut kajumissaarpai aqqusinermi politiit assersuineri ataqqeqqullugit.

- Ikuallattoqarneranik nalunaarut ungasinngitsumi tigusimavarput. Maanna Uummannami innaallagissiorfiup eqqaani politiit qatserisartullu suliaqarput. Ikuallattoqarnerani qamisaanermik suliaqarpugut, Aputsiaq Hansen oqarpoq.

- Suliaq maannakkorluinnaq suliarigatsigu annerusumik oqaaseqarsinnaanngilagut, oqarpoq.

Nukissiorfiit Facebookimi quppernerminni nalunaarutigaat Uummannami innaallagiamik pilersuineq maanna uninngasoq.

Mobilinut internetimullu attaviit sunnerneqarsinnaasut

- Ikuallanneq illoqarfiup tungaanut annertuumik pujuliorpoq. Inunnik ajoqusertoqanngilaq Nukissiorfiilli upalungaarsimanermik suliaqartut peqatigalugit ikuallattoornermik suliamut tunngasoq aallartippaat, Nukissiorfik nal. 13.20 nutaamik nalunaaruteqarluni allappoq.

Tusass nittartakkamini ingerlatsinermut nalunaarutimini allappoq Uummannami innaallagissiorfiup ikuallannerata kingunerisaanik attaveqaatit kipisaqattaarsinnaasut, attaveqaasersuutillu maanna generatorit sillimmatit atorlugit ingerlatinneqartut.

Avannaata Kommmuniata Uummannami allaffeqarfia ikuallattoqarnera pissutigalugu ullup sinnera aamma matoqqatinneqarpoq.

Innuttaasut politiinit aammattaaq kaammattorneqarput igalaat matullu matoqqateqqullugit, ikuallannermit pujuliortoq annertummat.