Uummannaq: Illoqarfiup pingajorarterutaa maanna innaallagiamik pilersorneqalerpoq

Nukissiorfiit suli illoqarfiup tamakkerlugu innallaagiamik pilersorneqalernissaat sulissutigaa, pingaaruteqarnerpaalli siulliullugit innaallagialersorneqalerput. Upalungaarsimasut ilisimatitsipput katersortarfitoqaq tamanut ammatinneqartoq, innuttaasut nerisassiussagunik imermilluunniit pisariaqartitsissagunik ornigussinnaaqqullugit.

Uummannami nukissiorfimmi ikuallattoqarpoq.

Assi: Leiff Josefsen.

KASSAALUK KRISTENSEN KASSAALUK KRISTENSEN Digitalimik aaqqissuisoq

Saqqummersinneqarpoq 22. Juuni 2026 - 22:36

Qatserisartut politiillu suli Uummannami innaallagissiorfiup eqqaani suliaqarput. Innaallagissiorfik ataasinngornermi ullaap tungaani ikuallalersimasoq, suli qamisarneqarpoq nillusarneqarluni.

Kalaallit Nunaanni Politiit taama naatsumik nalunaaruteqarlutik paasissutissiipput.

Illoqarfiup pingajorarterutaa maanna innaallagiaqalersimasoq Nukissiorfiit nalunaarput, illoqarfimmili pisariaqarnerpaat innaallagialersorneqarnissaat salliutinneqarallarpoq. Illoqarfiup sinnerani innaallagiaqaranilu imeqanngikkallarpoq.

Ussassaarut

Uummannami innuttaasut 1400-t missaanniipput.

Avannaata Kommunia paasissutissiivoq kommuni innuttaasut Uummannamiittut kiassarnermut innaallagissamullu atorneqarsinnaaqqullugu katersortarfik pisoqaq atugassiissutigigaa. Tassani innuttaasut ornigullutik nerisassiorsinnaapput, tassami sillimmataasumik generatoriliisoqarsimammat.

Ulloq unnuarlu sulisoqarpoq

Uummannami innuttaasut ullup unnuallu tulliuttup iluani naatsorsuutigissavaat Nukissiorfiit illoqarfiup pingajorarterutaatut annertutigisup missaanut innaallagissamik pilersorsinnaassagaa, Nukissiorfiit ilisimatitsipput.

Umiarsuaq maanna Aasianniit Uummannap tungaanukarpoq, usigalugit sillimmatit generatorit arlallit, innaallagialersuinermut atortussat. Nukissiorfiit paasissutissiipput umiarsuaq marlunngornermi unnukkut tikinnissaa naatsorsuutigineqartoq.

- Uummannami innuttaasut innaallagiaqanngitsut aatsaat aqagu unnuaqeqqalernerani innaallagiaqalernissartik taamaammat naatsorsuutigissavaat, ilisimatitsipput.

Sumiiffiit arlallit mobilinut internetimullu attaveqanngillat. Taamaammat politiit ulloq unnuarlu arlalinnik inuttaqartinneqarallassapput.

Nukissiorfiit innuttaasunut kaammattuutigaa nillataartitsiviit qerititsiviillu innaallagiaqqilernissap tungaanut matoqqatinneqarallassasut, nerisassat amerlanersaat aallutillu asiunnginniassammata.

Uummannami innuttaasut arlallit nalunaarput Uummannami innaallagissiorfiup qaliata annersaa ikuallassimasoq. Illuutigineqartoq suli nakkutigineqarallarpoq, qatserisartut suli suliaqarlutik.