Vivian Motzfeldtip Siumumi piffissaa kingulleq: - Qulaatiinnarluta aalajangerneq tamat oqartussaaqataanerannik ataqqinninnerunngilaq

Vivian Motzfeldtip pappilissat qaleriiaat pukkigisassaanngitsut, pappilissanut aserortigassanut eqqaavimmut tungujortumut, nakkaatippai. 

Piffissaq politikkip iluani immikkuullareqisoq Vivian Motzfeldtimut naagaluttuarpoq. Maanimi nikorfaffigisatsinni, tassa nunanut allanut naalakkersuisoqarfimmit tunuaqqammerpoq, Siumillu tunuarnissaa tullinnguulluni. 

Inatsisartunut ilaasortaaginnarnissani aalajangiusimagaluarlugu Siumumit tunuarnissi aalajangiuteqqallugu pappilissat sequtsigassat nakkaatiutigalugit oqaluttuarpoq. Aalajangernerullu parteeqatiminut innuttaasunullu nalunaarutiginissaa tullinnguuppoq.

Siumut inuulluarit 

Vivian Motzfeldt aalajangersimarpasissumik allorissaarluni naalakkersuisoqarfimmit allaffeqarfissuup saaffiginnittarfia aqqusaarlugu partiit ganngiata tungaanukarpoq. Partiip allaffeqarfianut pigami plakaati unillatsiarfigaa. 

Plakaati taanna Vivian Motzfeldtip Lars Løkke Rasmussenillu Washington DC-mi oqaluttuarisaanermut pingaarutilimmi ataatsimeereersullu Liv Aurorap suliaraa. Vivian Motzfeldtimik assitaqarpoq, ataatungaanilu allassimalluni “neriunneq”.

Uninngatsiariarluni partiip allattaanut Aviaja Hegelund-Tittussenimukarpoq partiimillu aninini nalunaarutigalugu. Nalunaarsinnarluni partiip allaffiata ilaanut, aamma nammineq Kim Kielsenillu anereernermik kingorna affaannanngortumut, aqqusaarpoq. 

Tassani parteeqatigiunnaakkani Lars Poulsen ulloqeqqasiortoq sivikitsuinnarmik inuulluaqquaa. Vivian Motzfeldtip aalajangernini ilisimaareqqissaarpasippaa, taamaakkaluartoq naalakkersuisoqarfigiunnaakkaminukaarnermi aqqutaani Siumut siuttorsuarisimasaata Naalakkersuisullu Siulittaasorisimasaata, Jonathan Motzfeldtip, eqqaassutissaa bronzemik sanaajusoq uniffigitsiarpaa. 

Eqqaanullu pigami eqippaa. 

- Inuit avissaartuutsinnagit katersuutsittarnikuummagit maqaasisaqaara.

Naalakkersuisoqarfimmi allaffimmut qimatassaminut uterami Kin Kielsen erngerluni sianerfigigaluarpaa, tiguneqanngitsoorporli. 

Tulliullugu Naalakkersuisut Siulittaasuannut Jens-Frederik Nielsenimut sianerpoq partiimillu aninerminik oqaluttuullugu. Kingorna partiip qimatami siulittaasuanut Aleqa Hammondimut sianerpoq. 

Vivian Motzfeldt oqaluutigaluni uninngaveqarani allaffiup iluani pisoqattaarpoq, allaffimminilu issiavigisani tikikkamiuk suarsuit nerriviup saaniittut passutillattaavai. Oqaloqatigiinneq minutsit marluk sinnilaaginnarlugit sivisussuseqartoq naavoq, taamaalillunilu partiiminit pisortatigoortumik anivoq. 

Nutaarsiassaqartitsiviit nutaarsiassaq tupaallannartoq tusarlugu siulliuniutiinnaq allaaserinninnissaat tullinnguuppoq. 

- Inuit amerlasuut isumaqarput piffissaq taanna ilungersunartoq qaangiuttoq. Taamaaqqajanngilluinnaqqissaarpoq, taamaammat aatsaat taama ataatsimoornissaq, innuttaasut pillugit sulinissaq, nukiit kattutsinneqarnissaata taamak pingaaruteqartiginerata nalaani taama aalajangerneq paasisinnaanngilara, peqataaffigerusunngilara, akuerinngilara. Taamaammat parteera qimassallugu aalajangerpunga, Vivian Motzfeldt oqarpoq nangillunilu.

- Ajunngilanga oqiliallaqqallungalu. Kikkut tamat oqartussaaqataanerannik ataqqinninngitsumik siuttoqarluta isumaqarpunga. Una kikkut tamat oqartussaaqataanerannut tunngassuteqarpoq, uagummi qinigaavugut. Qulaatiinnarluta iliuuseqarneq tamatuminnga ataqqinninnerunngilaq. Partii piinnarlugu inuiaqatigiit tunulliunneqarput, taakkulu naleqartitat uanga peqataaffigisinnaanngilakka, Vivian Motzfeldtip partiimit aninini taama nassuiarpaa.

Sapiitsuliortumit Igalikumi aasarsiortarfimmut

Vivian Motzfeldt Washington DC-mi januaarimi ataatsimeereerluni Nuummut uterami sapiitsuliortutut tikilluaqquneqarpoq. Maannali - qaammatit marluk qaangiutiinnartut - naalakkersuisuujunnaarlunilu Siumumut ilaasortaajunnaarsimalerpoq. 

Politikki silarsuaa pisoqarfiusaqisoq taamaakkami. Siumumi, Inatsisartunut 2014-imi qinigaaqqaarami ilaasortaaffigisamini, ilaasortaajunnaaginnanngilaq. Nunanulli allanut naalakkersuisutut atuuffini inuulluaqqusariaqalerpaa. 

Tassaniinnermini imaannaanngitsunik aqqusaagaqartarsimaqaaq. Nunatta nunarsuarmioqatigiinnit ukkatarineqaleruttornerani, Trumpillu nunatsinnik tiguaanialeruttornerani nunanut allanut naalakkersuisuuvoq. 

Pisorpassuit kingumut qiviarunigit, allaffimmini massakkut imaajakkamini, suummita eqqaamanerpaavai?

- Sorpassuit eqqaamassavakka. Washingthonimi ataatsimiinnikuunerput soorunami taakkununnga ilaavoq. Aammali paavimik naapitsineq. Asuliinnarmi naapikkumanavianngilaanga. Nunarput paavimik kingullermik 1982-imi naapitsivoq. Tamatuma nalaani nunarput EF-imit aniniarsarileruttorpoq. Massakkullu USA pititsereersorlu naapitseqqippugut. Eqqaamasariaqarpoq J.D. Vance Marco Rubiolu katuuliummata, taamaammat oqariartuut taanna isumalerujussuuvoq.

Vivian Motzfeldtip savaateqarfimmi peroriartornermini pillugit eqqaamasalersaarpoq. Taamaalluni sila taarsereersoq sikumit nakkarnini eqqaamasaanut ilaavoq.

Peroriartorfianimi pinngortitaq tassaavoq ataqqillugu inooqatigisassaq. Taama ittumik avatangiiseqassagaanni nukittuujusariaqarpoq. Peroriartornermini aqqusaakkani naalakkersuisutut sulinermini iluaqutigisaqalugit oqaluttuaraa. 

J.D. Vancelu naapikkamiuk perortiartornermini pisimasumik oqaluttuarfigaa. 

- Ataataga ikiaqutaannaalluni pingasunik nannunnikuummat eqqaamasariaqaraa oqaluttuarfigaara.

Massakkummi sussava?

Vivian Motzfeldtip pappilissat qaleriit immikkoortiternerani ernutaaraata titartagaa nueriasaarpoq. Atisami imuukkami sanianut ileqqissaariarlugu assilissap tungaanut inip ilaani nivingasumut aallarpoq. Igalikummi assinga allaffimmi suuffap qulaatungaani nivingavoq. 

- Aasaq Igalikumi illusinikuuvugut, ulapingaaramali suli najoriartornikuunngilarput. Massakkut piffissaqalissajunnarsivunga. 

Naak Igalikumi aasarsiortarfimmukarnissaminut piffissaqalertussaagaluarluni suliffini maqaasissaqalugu isertuutinngilaa. 

- Qinigaangamali akisussaaffiit angisuut tigummiartarnikuugakkit ullut tamaasa qimunneq maqaasissavara. Sulerulunneq aamma nuannarigakku, taanna maqaasissavara. Inatsisartuuinnassaangali.

Vivian Motzfeldt allaffiup qeqqinnaanut nikuippoq allaffiullu ilua isiginnaarujuulerlugu. Sussava? Suna tulliullugu poortussavaa? Aamma piffissap tullia qanormita pisoqassava? Partiimi allami ilaasortanngussava?

 - Sulinerat ingerlareersoq ataqqillugu allamut ilaasortanngornissara ajuusaarnaraara. Aamma partiinut allanut taanna anngutereerpara. Piffissaq tulliuttoq eqqarsaqqissaartariaqarpunga.