Wangenheim: Trumpip sanngiiffigisarput eqqorpaa
Naalakkersuisup Anna Wangenheimip (D) Donald Trumpip Kalaallit Nunaanni peqqinnissaqarfimmut toqqaannanngitsumik isornartorsiuinera sanngiiffigisamik eqquisoq nassuerutigaa. Amerikamili præsidentimut aamma akissuteqarpoq.
Assi: Oscar Scott Carl
Peqqinnissaqarfimmi unammilligassat nunap atavaaniit ataasiakkaaraluni takoqqusaarutitut aaqqinneqarsinnaanngillat.
Peqqissutsimut naalakkersuisup Anna Wangenheimip (D) Donald Trumpip "umiarsuarmik napparsimmavimmik pitsaasumik" Kalaallit Nunaannut aallartitsinissamik nalunaarutaa Facebookimi quppernermini isummerfigaa.
Umiarsuaq napparsimmavik pillugu Amerikamiut oqartussaasuinit attaveqarfigineqarsimannginnini siullertut oqaatigaa. Aappaattut Kalaallit Nunaanni peqqinnissaqarfik unammilligassaqarnera nassuerutigaa, tassa sulisussaqarniarneq sulisullu atorfimmiiginnarnissaat annertuumik unammilligassaqarfiulluni.
Danmarkimiit ukiumut 200 millionit
Naalakkersuisut danskit naalagaaffiannut sinaakkutissatut ukiaq isumaqatigiissuteqarfigigaat eqqaavaa, tassalu peqqinnissaqarfimmut ukiumut landskarsimit 1,7 milliardit koruuninik tapiissutigineqartartut saniatigut ukiumut 200 millionit koruuninik aningaasaliisoqartalissalluni.
Trumpip oqariartuutaa sanngiiffimmut eqquisoq oqarpoq:
- Innuttaasut amerlasuut perulunnartumik naparsimasut ilaquttatik angerlarsimaffitsillu qimallugit ungasissumut aallartariaqartarput. Nunalli taamatut inissisimanera aaqqiissutissanik ataasiakkaaginnarnik, avataaniit takussutissanik ataatsiakkaanik, aaqqinneqarsinnaanngillat, naqissusiivoq.
Pitsaasumik sullissisoqarnerata paasiniarnissaanut tikilluaqqusaasoq
Kalaallit Nunaanni peqqinnissaqarfimmi sulisut inuttamik erngertumik ikiugassamik isumassuisimanerat Wangenheimip USA-p præsidentianut aamma eqqaavaa:
- Præsident Amerikami innuttaasup Issittumi Sakkutooqarfiup Kalaallit Nunaanni peqqinnissaqarfik qanimut suleqatigalugu pinasuartumik ikiorneqarnera qanoq pitsaasimatiginersoq paasiniarnissaanut tikilluaqqusaavoq, Anna Wangenheim allappoq, nangillunilu:
- Sumiiffiit avinngarusimagaluartut pisariaqartitsiffiusumi pinasuartumik ikiuipallassinnaanerput takutipparput.
Naalagaaffeqatigii naligiinngitsumik inissisimajunnaarnissaat siunertaralugu Kalaallit Nunaanni ataavartumik piginnaanngorsaajuarnissaq, najukkami neqeroorutit pitsaanerusut aningaasaliinissallu pisariaqartut Wangenheimip ilanngullugu eqqaavaa.
- Aningaasaliissutit inissereerput. Innuttaasunullu iluaqutaasussanngorlugit atorneqarnissaannut sulineq ingerlavoq.
