Aalisarneq pillugu Savalimmiunut EU-mullu isumaqatigiinniarnerit naammassisut
Isumaqatigiissummi siullermi Kalaallit Nunaat Savalimmiut peqatigalugu pisassiissutinik paarlaapput, aappaannilu Kalaallit Nunaat EU-mut nunatsinni pisassiissutit ilaannik akiliuteqartitsinikkut pissarsanik periarfissiivoq. 2026-mulli isumaqatigiissutini taakkunani marlunni pisassiissutit ikilisinneqarput, taamannalu kalaallit aalisartut iluaqutigisinnaavaat.
Kalaallit Nunaanni raajarniarneq suli appariartorpoq. Raajat pillugit llisimatuussutsikkut siunnersuutit apparnerat pissutigalugu Kalaallit Nunaata Kitaani aamma Tunumi 181 aamma 950 tonsinik ikilisinneqartut, tamannalu aamma isumaqarpoq raajartassat EU-mut ikilisinneqarnerata ilutigisaanik nunatsinni aalisarnermik ingerlataqartut salliutinneqartut, Naalakkersuisut ilanngullugu ilisimatitsipput.
Asseq toqqorsivimmit: Sermitsiaq.AG
Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik naalakkersuisoqarfiit attuumassuteqartut allat peqatigalugit 2026-mut Kalaallit Nunaata imartaani pisassiissutit pillugit avataaniit suleqatigisartakkanik atorfilittatigut isumaqatigiinniarnerit naammassilivippaat.
Tassunga atatillugu aalisarnermut isumaqatigiinniarnerit Føroyit EU-llu naammassineqarput. Tamarmik pisassiissutit annikinnerusut isumaqarput, aammalu Naalakkersuisut isumaqatigiinniarnermi angusat akuerisimavaat.
Savalimmiut peqatigalugu isumaqatigiissut
Savalimmiut eqqarsaatigalugit Kalaallit Nunaat aamma Savalimmiut pisassiissutinik annikinnerusunik pissarsiaqarput.
- Saarullernanut tunngatillugu ilisimatuussutsikkut siunnersuutigineqarsimasut 41 procentinik ikilineqarmata kalaallit saarullernartassaat 3.500 tonsinik Savalimmiunit ikilisinneqarsimapput, Naalakkersuisut ilisimatitsipput nangillutillu:
- Paarlattuanik savalimmiormiut Tunumi aalisagartassaat assigiinngitsut Kalaallit Nunaanit ilanngarneqarput. Qaleralittassat 50 tonsinik,saarullittassat 150 tonsinik najorpiligartassat 200 tonsinik nataarnartassallu 25 tonsinik ilanngarneqarlutik
Takussutissiami takuneqarsinnaavoq Kalaallit Nunaata aamma Savalimmiut akornanni pisassiissutinik paarlaasseqatigiinneq 2026-mut atuuttussaq:
Tusarfik: Naalakkersuisut
EU peqatigalugu isumaqatigiissut
Isumaqatigiissummi EU-p Kalaallit Nunaata imartaani 2026-mi aalisarnissaanut tunngaviliisoqarpoq. Isumaqatigiissut Aalisarneq pillugu Isumaqatigiissummut 2025-imit 2030-mut Ilassut Kalaallit Nunaata aamma EU-p akornanni Aalisarnermi Peqatigiinneq pillugu Isumaqatigiissutip ilagisaa tunngaviusoq.
Aalisarneq pillugu Isumaqatigiissummi ilassummi Kalaallit Nunaata imartaani aningaasatigut taartisisitsinikkut pisassiissutinik arlalinnik EU neqeroorfigineqarpoq.
2026-mut aalisarsinnaanermut periarfissat aalajangersarneqarput Fiskeriprotokolimi innersuussutigineqartut aallaavigalugit.
Nunat allamiut umiarsuaataannut killilersuineq atuutilersinneqarpoq
Raajat pillugit llisimatuussutsikkut siunnersuutit apparnerat pissutigalugu Kalaallit Nunaata Kitaani aamma Tunumi 181 aamma 950 tonsinik ikilisinneqarput.
EU Kalaallit Nunaanut ammassaat ikinnerpaaffissaat nutaaq 30.000 tonsiusoq pissutigalugu ammassannik 2026-mi neqeroorfigineqanngilaq. Kalaallit Nunaata tamassuma saniatigut angallatit nunanit allaneersut Tunumi raajarniarsinnaasut ikilisippai, Naalakkersuisut ilisimatitsipput.
- Kalaallit Nunaata Kitaani aamma Tunumi raajanik EU-mut pisassiissutit ikilinerat angallatit Kalaallit Nunaanneersut pisassiissutinik annertunerusunik tunngaveqarnissaannut aalisarsinnaanerminnillu pitsaanerusumik atuinissaannut tapersiissaaq, Naalakkersuisut ilisimatitsipput nangillutillu:
- Tamanna pisortat isumalluutinut akitsuutinit akileraarutinillu isertaqarnerunerannik kinguneqassaaq. EU-mit akiliutit apparnerat Kalaallit Nunaanni inuussutissarsiutinit akitsuutinit akileraarutinillu taarserneqassaaq.
91,5 millionit aalisarsinnaanermut periarfissanut 25 millionillu akuersissummik akiliinermut EU-mit pissarsiarineqassapput
Kalaallit Nunaata aamma EU-p akornanni Aalisarnermi Peqatigiinneq pillugu Isumaqatigiissut marlunnik immikkoortoqarpoq, aalisarneq pillugu isumaqatigiissut tunngavigalugu niuerneq, tassani aalisarsinnaatitaanermut akiliuteqarneq aamma aalisarsinnaanermut akuersissummut akiliuteqarneq ilaallutik, amma immikkoortumut pilersaarut.
Ilimagineqarpoq 2026-mi aalisarsinnaanermut akiliut tassaassasoq aalisarsinnaanermut periarfissaqarnermut akiliut 91,5 mio.kr. missaani aamma aalisarsinnaanermut akuerissummut akiliut 25 mio.kr. missaani.
Tusarfik: Naalakkersuisut
Isumaqatigiinniarnerni allaaserisami pineqartuni Kalaallit Nunaannit aallartitat tassaapput Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit, Kalaallit Nunaata EU-mi Sinniisoqarfianit, Kalaallit Nunaanni Aalisarnermut Piniarnermullu Nakkutilliisoqarfianit, Pinngortitaleriffimmit, Aningaasaqarnermut Akileraartarnermullu Naalakkersuisoqarfimmit aamma Kalaallit Nunaanni aalisarnermik inuussutissarsiuteqartunit sinniisut.
