Aasiaat tunisassiorfiata pisassiissutit tamakkertut nalunaarutigaa: Tunisineq unitsinneqarpoq – misileraalluni aalisarneq piffissami sivikitsumi ingerlassaaq

Polar Raajanut tunisisinnaaneq naatsorsuutigineqartumiit qaammat sioqqullugu aggustip 15-ianni unittussanngorpoq.

Suliffeqarfiup sulisuminut ilisimatitsissutigaa.

Aasianni suliffissuarnut pisassiissutit tunineqarsinnaasut nungunnerat suliffeqarfimmiit tunngavilersuutigineqarpoq. Kilisaat Polar Arfivik misileraalluni montaguinik raajarniarpoq, taakkulu Aasiannut aggustip 15-ianiit 31-ata tungaanut tunineqartarnerat ingerlaannassaaq.

Aasianni suliffissuup matuneqalinnginnera Polar Seafood Greenlandip Facebookimi quppernermini nalunaarutigaa, tassalu tunisassianik allanik suliarineqarsinnaasunik peqartillugu sulineq ingerlatiinnarneqassalluni. Raajanik nalinginnaasumik tunisassiorneq unitsinneqarpoq, misileraanermili montaguinik raajarniarneq piffissami killilimmi sivitsorneqarsinnaavoq.

Aasianni suliffissuaq illoqarfimmi suliffeqarfiit annersaasa ilagaat, tassanilu 100-t missaannik sulisoqarluni. Polar Seafoodimit pigineqarpoq, suliffissuarlu ammaannassappat amerlanerusunik pisassiisoqartariaqartoq aqutsisut oqartussanut amerlasooriarlutik oqariartuutigisaqattaarnikuuaat.

Raajanut taartissanik pisassanik allanik pissarsiniartoqarsimagaluartoq Polar Raajat sulisunut nalunaarummi allappoq, tamakkiisumilli iluatsinneqarsimanani. Naalakkersuisuilli qaleralittassiissutinik neqeroortitsinerat pillugu isumalluartoqarluni.

- Suliffissuaq nalinginnaasumik qaqugu ingerlaqqilissanersoq naluarpoq, neriuutigisinnaavarpulli oktobarimi taamaattoqarumaartoq. Tamannali aqussinnaanngilarput, Polar Raajat sulisunut allappoq.

Polar Seafoodimi pisortaanerit Miki Brøns aamma Bent Salling ingerlatseqatigiiffimmi Qeqertalik Seafoodimi aamma pisortaapput, taannalu Naalakkersuisut Kitaani qaleralittassanik 2.470 tonsinik Tunumilu saarullittassanik 5.000 tonsinik pisassiissutinik neqeroortitsineranni neqeroorput. Royal Greenland pisassiissutinut piumaneqarluartunut aamma neqerooruteqarmat taakku unammillertigaat. Tamanna pillugu allaaserisami uani paasisaqarnerusinnaavutit: Aalisarnermut ingerlatseqatigiiffippassuit nutaat pisassiissuterpassuit pilerngukkaat

Polar Raajanut tunisisinnaanerup unitsinneqarnera Kommune Qeqertalimmi kommunalbestyrelsimut ilaasortap Aqqa Samuelsenip (S) qisuriarfigalugu, Naalakkersuisut suliffiit qulakkeerniarlugit suliffissuaq oqaloqatiginerusariaqaraat piumasaraa.

Pissutsit akuerineqarsinnaanngitsutut taavai:

– Tamanna Aasianni suliffissuaqarnermut siunissamullu tunngatillugu ernumanartumik takutitsivoq. Naalakkersuisut maanna piaartumik iliuuseqartariaqarput, Aqqa Samuelsen tusagassiuutitigut taama nalunaaruteqarpoq.