Air Greenlandip Hotel Hans Egede A/S pisiaraa

Air Greenlandip Hotel Hans Egede A/S pisiarissallugu isumaqatigiissuteqarfigaa, timmisartuutileqatigiiffik nittartakkamini taama allaaserisaqarpoq. Nuup Kalaallit Nunaatalu ukiuni kingullerni ineriartorluarnera pisinermut aallaaviusoq timmisartuutileqatigiiffiup nassuiaatigaa. 

- Nuuk Kalaallit Nunaallu piorsarneqaleruttorput angalasut amerliartorlutik, aqqutit nutaat pilersinneqarlutik angalanissamullu piorsarnerunissaq pisariaqarluni. Isumaqatigiissut Air Greenlandimut siunissamut ungasissumut aningaasaliineruvoq patajaannerusumik niuersinnaanissamut, ineriartorneq patajaallisarniarlugu akornutaasinnaasullu akiorsinnaaneruniarlugit.

- Hotel Hans Egede suliffeqarfiuvoq ingerlalluartoq nukittuumik inissisimasoq, qilanaarpugullu piorsaqqinnissaanut angalasut, inuussutissarsiortut inuiaqatigiillu iluaquserniarlugit, Air Greenlandimi pisortaaneq Jacob Nitter Sørensen oqarpoq.

Hotel Hans Egede A/S-ip ingerlatai tassaapput: Hotel Hans Egede, HHE Express aamma Nuuk Hotel Apartments by HHE. Pisinerup piviusunngornissaanut atuisunut unammilleqatigiinnermullu aqutsisoqarfimmit oqartussaasunillu allanit attuumassuteqartunit akuerineqarnissaq utaqqisaavoq. Pisinerup akuerineqarnissaanut suliffeqarfiit allanngortinnagit ingerlatiinnarneqassasut isumaqatigiissutaavoq.

- Air Greenlandimi pingaartinneqarpoq Hotel Hans Egede immikkut niuernikkut nalinginnaasumik tunngaveqarluni immikkut ingerlanneqaannarnissaa. Ingerlatseqatigiiffissuaq akunnitttarfinnik ingerlatsinernik misilittagaqareerpoq Arctic Hospitality Group Ilulissani Hotel Arcticimik, Ilimanaq Lodgemik Eqi Glacier Lodgemilu illuaqqanik ingerlatsineq aqqutigalugu, timmisartuutileqatigiiffik allappoq.

Ukiumut angusarissaartoq

AAMMA ATUARUK

Helge Tangip akunnittarfiussua aatsaat taama sinneqartoortigisoq

Hotel Hans Egede Helge Tangimit Carl Juhlimillu 1987-imi pilersinneqarpoq. Ukiuni kingullerni suliffeqarfik oqaluttuarisaanermi nukittunerpaamik inissisimasimavoq, Nuummi mittarfissuup ammarneqarneratigut, Kalaallit Nunaata nunarsuarmiunit alaatsinaanneqarnerulerneratigut tunaartaqartumillu niuernikkut piorsaasoqareratigut. Hotel Hans Egede A/S akileraareerluni siorna 39 millionit koruuninik sinneqartoorpoq. Tamanna suliffeqarfiup oqaluttuarisaanerani aatsaat taama pitsaatigisumik angusaqarneruvoq.

Ingerlatseqatigiiffimmi siulersuisuni siulittaasoq, Helge Tang, ukiuni qulikkaani sisamani akunnittarfilerinermik suliaqareerluni maanna sulinikinnerulertussanngorpoq.

- Ukiut 76-it qaangereerpakka, suliassallu annikillinissaanut piffissanngorluni. Taamaattumik uannut pingaartupilussuuvoq suliffeqarfik piorsaqqittuarnissaa anguniarlugu maanna kalaallinit pigineqarluni siunissamut ingerlanneqalernera, Helge Tang oqarpoq.

Piginnittut ingerlatseqatigiiffik nunaqavissunit ingerlateqqinneqarnissaa pingaartissimagaat aamma nalunaarutigineqarpoq. Pisineq qanoq aningaasartaqarnersoq nalunaarummi ilisimatitsissutigineqanngilaq.