Air Greenlandip naatsorsuutai: Ukiut unammillernarnerpaat ilaat
Air Greenland 2025-mi akileraarutit suli ilanngaatiginagit 3,3 millionit koruuninik angusaqarsimalluni nalunaarutigaa. Tamanna 2024-mit 60,8 millionit koruuninik angusaqarfiusumit appasinneruvoq.
- Ukiup naajartornerani silap pissusia nalinginnaanerulerpoq, timmisartuussinermilu inissat tunisallu iluarsiiffigineqarput, taamaalillunilu ingerlatsineq patajaannerusoq pilersinneqaqqippoq, pisortaaneq Jacob Nitter Sørensen oqarpoq.
Assi: Oscar Scott Carl
Namminersorlutik Oqartussat timmisartuutileqatigiiffiutaata Air Greenlandip ukiumut nalunaarusiaq tamanut saqqumminnagu 2025-mut naatsorsuutit sukumiinerusut tallimanngornermi ualikkut saqqummiuppai.
2025 Air Greenlandip ukiuni arlalinni ingerlatsineranut unammillernarnerpaat ilaattut inissisimasoq, timmisartuutileqatigiiffimmiit allapput.
- Nunap annersaani nalinginnaanngitsumik silarlunnerujussua, aammalu Nuummi nunani tamalaani mittarfiup nutaap aallarnisarnerani piffissap ilaani aallartussat kinguaattoornerinik taamaatinnerinillu kinguneqarfiusumi atuisunut, sulisunut ukiumullu aningaasaqarnikkut angusanut sunniuteqarpoq, Air Greenlandimiit allapput.
Sila peqqutigalugu aallartussanik taamaatitsisarnermi aningaasartuutit amerleriangaatsiarput, tamatumalu saniatigut upernaaq timmisartuussinermi inissanik amerlisitsinermi inissanik tunisaqarniarneq ajornakusoortoq paasinarsimavoq, tamannalu aamma saniatigut aningaasartuuteqarfioqqippoq. Taamaattumik ukiap ingerlanerani tamanna nalimmassarneqartoq, Air Greenlandimiit paasissutissiipput.
Akileraarutit sioqqullugit 3,3 mio. koruuninik angusaqarneq naatsorsuutigisamiit annikinneruvoq, ukiullu siulianiit aamma ikileriarluni. 2024-mi akileraarutit suli ilanngaatiginagit 60,8 millionit koruuninik angusaqartoqarpoq.
Air Greenlandip 2026-mi akileraarutit suli ilanngaatiginagit 60-70 millionit koruuninik angusaqassalluni naatsorsuutigaa.
