Air Greenlandip ukiup affaani angusat pitsanngorsarpai

Air Greenlandip ukiup affaanut nalunaarusiani ataasinngornermi saqqummiuppai, timmisartortitseqatigiiffiullu nalunaarutigaa 2025-mut sanilliullugu ukioq aallartilluarnerusoq.

Air Greenlandip akileraarutit suli ilanngaatiginagit 9,8 millionit koruuninik 2026-mi ukiup affaani siullermi angusaqarpoq. 87,4 million koruuninik 2025-mi ukiup affaani siullermi amigartooruteqarluni.

Ukiup affaani angusat tunngavigalugit, Air Greenlandip naatsorsuutigaa 2026-mi akileraarutit suli ilanngaatiginagit, 100 millionit koruunit missaannik angusaqassalluni, timmisartortitseqatigiiffik tusagassiutitigut nalunaarummi allappoq.

Angusat pitsaanerulernerisa saniatigut kaaviiaartitat 7,5 procentimik qaffariarput 1.034,6 million koruuninngorlutik.

Air Greenlandip aningaasatigut ingerlalluarnissaminut pissutaasinnaasut arlallit eqqaavai. Ilaatigut sila angallannermut sunniuteqarpallaannginnera aammalu naak ilaatigut isumannaallisaanikkut nakkutilliisarneq suli unamminartoqaraluartoq, Nuummi mittarfimmi pissutsit aalaakkaanerat.

Piffissamik eqquineq 13,9 procentimik amerleriarlutik 85,7 procentinngorsimasut, timmisartullu suluusallit piffissaq eqqorlugu angalasartut 20 procentimik amerleriarlutik 73 procentinngorsimasut, aamma angallannermi akornutaasunik toqqaannartumik aningaasartuutit 26,3 millioner koruuninik ikileriarsimasut, Air Greenland allappoq.

Pisortaanerup Jacob Nitter Sørensenip ukiup affaani angusat 2025-mi unammillernartoqareersoq, ingerlatseqatigiiffiup ingerlalluarneranut takussutissatut isigai.

Timmisartuussinerit pisariaqartitsinermut naleqqussartarsimallugit, kinguaattoornerillu teknikkikkullu ajornartorsiutit iliuuseqarfigilluarnerusimallugit, Air Greenlandip pisortaanera oqarpoq.

- Naleqqussaanerit ingerlassisimasut sunniuteqarsimapput, aamma suli Kalaallit Nunaanniit aamma tamaani angalanissamut piumassuseqarnerit annertullutik. Kisianni angusassarput suli angunngilarput.

- Angallassinermi pissusissamisuunngitsunik pisoqaraangat, atugassarititaasut ingerlatsivigisatta suli annertuumik angalasunik aamma assartuinermi ingerlatsisarnerput tatisimavaa. Hotelini inissat killeqarnerat, ingammik tassaapput qitiusumik ajornartorsiutit, kiisalu angalasut amerliartornerat pilersaarusiornermut aamma sullitanik attaveqarnermut annertuumik piumasaqaatitaqarput. Taamaattumik suli angusaqarluarusulluta sullitanik sullissineq pitsanngorsarparput, angallassineq sunniuteqarfigineqaraangat. Tamatumunnga ilutigitillugu sulisuvut qutsaviginiarpakka immikkut ittumik sulisarnerannut suliffeqarfiup piffissami annertuumik tatineqartarfiani..