Akit aatsaat taama qaffasitsigisut ukiup aallartilluarneranut pissutaapput

Kalaallit Nunaata avammut niuernera 2026 aallartinneraniilli siuariartupiloorpoq. Tamanna pissutigalugu Sermitsiap Royal Greenlandimi pisortaaneq Toke Binzer ukiut ingerlaneranni siuariartorneq pillugu oqaloqatigaa.

Royal Greenland, Namminersorlutik Oqartussanit pigineqartoq, nunami aalisarnermik ingerlatseqatigiiffiit annersaraat, avammullu tunisat annertunersaat isumagisaralugu. Toke Binzer ingerlatseqatigiiffik ingerlalluartoq oqarpoq, nioqqutimmi nunat tamalaat akornanni akigissaarallarput:

– Nioqqutit imaaneersut aatsaat taama akigissaartigaat. Nioqqutit imaaneersut akii qiviaraanni maannakkut qaffasissorujussuupput. Qalerallit saarulliillu akii eqqarsaatigalugit. Raajat akii aamma qaffakkiartorsimapput, assagiarsuillu akii qaffakkiartorusaalaarlutik, Toke Binzer oqarpoq.

Barentip imartaani aalisarneq ajornartorsiorfiusoq

Nunarsuarmilu sumiiffinni arlalinni raajanik amigaateqarneq taamatullu Ruslandimut kinguneqartitsineq pissutaalluni Barentip imartaani saarullinniarneq ingerlanerluttoq pisortaaneq oqaluttuarpoq. Tamakku kalaallit tunisassiaasa akiisa qaffannerannut pissutaaqataapput:

– Raajat ikiliartornerat unamminartipparput, kalaallit aalisakkanik tunisassiaat suli piumaneqarluarput, ingammik Asiami niuerfinni, Toke Binzer oqarpoq.

Royal Greenlandimut qaleralittassiissut ukiumi qaammatini siullerni pingasuni tamakkipajaarlugit aalisarniarlugit aalajangernera kisitsisinut sunniuteqartoq taassuma nassuiaatigaa.

- Nunarsuarmi siuttuunngilagut

Toke Binzerip kisitsisit Royal Greenlandimut tunngasut erseqqissumik saqqummiukkusunngilai, ukiulli affaanut naatsorsuutit pitsaanissaat naatsorsuutigalugu oqaatigisinnaavaa. Mumittoqariaannaavorli:

AAMMA ATUARUK

Avammut niuerneq ukioq manna aallartilluarsimasoq suli ingerlalluartoq

- Isumaqartoqassanngilaq ukiup aallartinnerani qaammatini pingasuni imaluunniit ukiup qiteqqunnerani siullermi ingerlalluartoqarnera pissutigalugu, nunarsuarmi siuttunngussasugut, pisortaaneq oqarpoq.

Royal Greenlandimi ukiup affaani siullermi pisassat amerlanersaat aalisarneqareermata, periarfissanik nutaanik takkuttoqaqqissagaluarpat piareersimasoqartoq Toke Binzer oqarpoq. Ukiulli affaani kingullermi taamatut angusaqarluartoqarnissaa naatsorsuutigineqarani.

– Toqqammavissaqarluarpugut, taamaattumik ukioq manna ingerlalluarnissarput upperaara. Naatsorsuutigineqassanngilarli ukiumi qaammatini siullerni pingasuni angusat taamaaginnassasut, tamannalu naatsorsuutigigutsigut pakatsissutigissavarput, Toke Binzer oqarpoq.

- Akit sapinngisamik qaffasiinnarnissaat sulissutigineqartoq - aningaasartuutit ukkatarineqarput

Royal Greenland aningaasaqarnikkut ukiuni kingullerni ajornartorsiuteqarpoq. Aalisakkerivissuup ukiup affaani siullermi ingerlalluarnera ajornartooqqanermut iluaqutaanissaa Toke Binzerip oqaatigaa.

– Allannguineq ingerlatiinnassavarput. Oqartoqarsinnaavoq 2025-mi angusarissaartugut, isumaqarpungalu 2026 aamma angusaqarfiulluarumaartoq. Isumaqarpunga ajunngitsumik ingerlanerput attatiinnassagipput, taamaattorli suli suliassaqaqaaq.

Royal Greenlandip akit appariartoqqilerpata allanik amigaartuunnginnissaa siunertaralugu aningaasartuutit annikillisinnissaat pingaarnertut anguniarneqartoq Toke Binzer oqarpoq.

- Sapinngisatsinnik akigititat qaffasinnerpaaffianniinnissaat sulissutigaarput, kisiannili akit taamaaginnarnissaat qularnarpoq.

- Taamaalluni tunisassiornermi akit apparpara, aningaasartuutit taama ingerlaannarnissaat qulakkeerniartariaqarparput, taamaasilluta naammaginartunik sinneqartooruteqarsinnaanerput titarnerullu qernertup ataanut pinnginnissarput qulakkeersinnaavarput, Toke Binzer oqarpoq.