ArcticExpo-mi siunissami aalisarneq sammineqassasoq

Aalisarnerup iluani aningaasaliinerit nutaat suleqatigiinnerillu, siunissamilu ineriartornermut suliffissanullu qanoq qulakkeerinnittuusinnaanersut ArcticExpo-mi sammineqassapput.

Nittarsaassinissap tulliata titartaganngorlugu takorlooruminarsarneqarnera.

Takorlooruminarsaasoq: AKKC

Hanna Hviid Hanna Hviid Hanna Hviid Tusagassiortoq

Saqqummersinneqarpoq 6. Apriili 2026 - 13:51

Annonse

Kommuneqarfik Sermersooq Nuummi ArcticExpo 2026-mik maajimi aaqqissuussissaaq.

Taamaalilluni illoqarfiit pingaarnersaat suliffeqarfinnit aningaasaleeqataasartuniillu katersuuffiussaaq, kommuni nittartakkamini allappoq.

Aalisarnermut inuussutissarsiutip ineriartornera – Kalaallit Nunaanni inuussutissarsiornerup pingaarnersaasa ilaat – aamma siunissami aningaasaleeqqinnissat suleqatigiinnerillu qanoq ineriartornermik suliffissanillu qulakkeerinnittuarsinnaanerat saqqummersitsinermi sammineqassapput.

Aalisarnermut inuussutissarsiut Kalaallit Nunaanni avammut niuernermi pingaarnerpaasoq suliffissaqartitsillunilu aningaasaqarnermik ineriartortitsivoq. Naleqalersitsinermi tamarmi – piniarnermit suliarinninnermut assartuinermullu avammut niuernermullu – suliffissanik pilersitsillunilu najukkami inuiaqatigiit ineriartornerannut pingaaruteqarluinnarpoq.

- ArcticExpo 2026 inuussutissarsiutitta pingaarnersaannik ukkataqarnissamut periarfisseeqataavoq: Uatsinnut pingaaruteqarpoq suliffeqarfinnut sinaakkutissanik pitsaasunik pilersitsinissaq,suleqatigiinnermik nukittorsaanissaq aammalu suliffeqarfinnik ineriartortitsinermi pitsanngorsaanissaq – Nuummi kommunillu sinnerani, Kommuneqarfik Sermersuumi borgmesteri Avaaraq Olsen (IA) oqarpoq.

Kommuneqarfik Sermersuumut saqqummersitsinermik aaqqissuussineq inuussutissarsiortunik nunanilu allani suliaqartunik oqaloqateqarnerup nukittorsarnissaanut, tamatumalu saniatigut kommunimi aalisarnermik imarsiornermillu inuussutissarsiutinik ineriartortitsinissamut periarfissat erseqqissarnissaannut, aamma periarfissaavoq.