Ataatsimeersuarneq Future Greenland soqutigineqarluartoq
Inuussutissarsiornermik isumasioqatigiinneq Future Greenland maajip 19-ianniit 20-anut Nuummi Katuami ingerlanneqassaaq, tassanilu inissat qangali tamakkerneqareerput.
Niuernermik, politikkimik isumaliutersortartunillu 500-nit amerlanerusut nunanit assigiinngitsunit 17-ineersut ataatsimeersuarnermut Future Greenlandimut maajip 19-iani 20-anilu pisussamut peqataajartussapput.
Assi: Leiff Josefsen
Ataatsimeersuarnermut Future Greenland -imut, maajip 19-iani 20-anilu Nuummi pisussamut, billetsit tamarmik nungoreersut Sulisitsisut februaarimili nalunaarput.
– Utaqqisut allattorsimaffianniittut ikilivagut, ataatsimeersuarnermilu peqataarusuttut 500-t sinnerlugit nalunaarsimapput. Inuusuttut ataatsimeersuarnerannut inuusuttut 400-t missaanniittut peqataassasut naatsorsuutigaarput, Sulisitsisuni pisortaq Christian Keldsen oqarpoq nangillunilu:
– Suli utaqqisoqarpoq, ajoraluartumillu kikkut tamaasa ilaatissinnaanngilagut. Ataatsimeersuarnermi peqataasut Katuap inersuaani oqalugiaatit skærmikkut malinnaaffigisinnaavaat. Taamaalillutik inuit ataatsimeersuarneq tamaat “inissaminniiginnartariaqassanngillat”, kisianni inersuarmi saqqummiisunik arajutsinngikkaluarlutik ingerlaarsinnaapput. Nalunngilarput tamanna amerlasuunut pingaaruteqartoq, ataatsimeersuarnernini taamaattumi attaveqatigiinneq pingaaruteqarpoq.
Nunarsuarmi politikkikkut pissutsit
FUTURE GREENLAND
Ataatsimeersuarneq inuussutissarsiornermut tunngasoq Future Greenland Katuami 2026-mi maajip 19-iani 20-anilu ingerlanneqassaaq.
Peqataasussat 500-t nunanit ukunannga peqataajartussallutik nalunaarsimapput: Kalaallit Nunaat, Danmark, Savalimmiut, USA, Portugal, Norge, Island, Australia, Frankrig, Sverige, Canada, Tuluit Nunaat, Cameroon, Estland, Letland, Korea Kujalleq Tysklandilu.
Ataatsimeersuarneq Future Greenland Kalaallit Nunaanni, Danmarkimi nunanilu allani inuussutissarsiortut akornanni soqutigineqarluarpoq.
Taamaalillutik nunanit 17-ineersut ataatsimeersuarnermut, ukioq manna Kalaallit Nunaata inuussutissarsiornermik siuarsaamik nunarsuarmilu politikkikkut pissutsini peqataatilluta avatitsinnilu pisuni nukittuumik inissisimalernissaanut inissisimaffianik periarfissaanillu sammisaqarfiusussamut, peqataaniarlutik nalunaarsimapput.
Canadap Danmarkimi aallartitaa Carolyn Bennet ilaatigut Frankrigip Danmarkimi aallartitaa Christophe Parisot peqatigalugu ataatsimeersuarnermi Future Greenlandimi peqataassaaq.
Assi: Leiff Josefsen
Oqalugiartussat nunanit allaneersut NATO-p Rigami aaqqissuussamik attaveqatigiinnermut ilisimasaqarfiani pisortaq Jānis Sārts oqalugiartussat nunanit allaneersut ilagaat, taannalu internetikkut eqqunngitsumik paasissutissiisarneq pillugu oqalugiassaaq. Tamatuma saniatigut Frankrigimi niunernermut ministeri Nicola Forissier ataatsimeersuarnermi aamma peqataassaaq.
Ilanngutassiaq „The Ambassadors' Lounge“ (Aallartitaqarfik, aaqq.) aamma maluginiarnarpoq, tassani Frankrigip Canadallu Danmarkimi aallartitai Christophe Parisot aamma Carolyn Bennett, Kalaallit Nunaata Danmarkimi Sinniisoqarfiani pisortaq Jens Heinrich peqatigalugu inuussutissarsiornikkut periarfissat suleqatigiinnermullu periarfissat pillugit oqaluttuassapput. USA-p Danmarkimi aallartitarisimasaa Rufus Gifford „What we need to understand about the US“ (USA pillugu suna paasisariaqarparput, aaqq.) qulequtaralugu aamma saqqummiussisussat ilagaat.
Isumaliutersortartut niuertullu najukkameersut Naalakkersuisut arlallit ataatsimeersuarnermi aamma peqataassapput, ilaatigut Múte B. Egede Christian Keldsen peqatigalugu ima qulequtaqarluni saqqummiussissaaq: “Inuussutissarsiornermut politikki nunanullu allanut politikki imminnut attuumassuteqaraangata”
Aammattaaq Kalaallit Nunaanni inuussutissarsiornermi siuttut isumaliutersortartullu ilaatigut IA-mi siulittaasuusimasoq Aqqaluk Lynge, Folketingimi ilaasortaasimasoq Aaja Chemnitz, issittumi aallartitaq Kenneth Høegh, suliffeqarfimmi pisortaq aamma Sulisitsisuni siulittaasoq Krissie Berthelsen Winberg, Polar Seafoodimi siulersuisuni siulittaasoq Michael Binzer aamma Grønlandsbankenimi siulersuisunut ilaasortaq Maliina Abelsen saqqummiissapput.
– Aap, sumit tamanit soqutiginninneq annertusiartorpoq. Illoqarfitsinnut timmisartuussinermi akunnittarfinnilu inissat nunguttutut oqaatigisinnaavagut, Sulisitsisuni pisortaq Christian Keldsen oqarpoq.
Assi: Oscar Scott Carl
Danmarkimit Folketingimi Kalaallit Nunaat pillugu ataatsimiititaliami ilaasortat arlallit peqataassallutik nalunaarsimapput, aammattaaq inuussutissarsiornermut ministereqarfimmi, naalagaaffiup ministereqarfiani, nunanut allanut ministereqarfimmi illersornissamullu ministereqarfimmi atorfillit peqataassapput.
– Aap, sumit tamanit soqutiginninneq annertusiartorpoq. Illoqarfitsinnut timmisartuussinermi akunnittarfinnilu inissat nunguttutut oqaatigisinnaavagut. Aamma inuussutissarsiortut amerlanerusut ataatsimeersuarneq iluaqutiginiassammassuk sammisassagut siammasitsinniarsaraagut, Christian Keldsen oqarpoq.
Sulisitsisut inuussutissarsiornermik suliaqartut ataatsimeersuarnerannik Future Greenlandimik qulissaanik aaqqissuisuupput. Inersimasut ataatsimeersuarnerisa saniatigut aamma inuusuttut ataatsimeersuarnerat ”The Future of Greenland” (Kalaallit Nunaata siunissaa, aaqq.) maajip arfernani pissaaq.
