Visit Greenland nutaamik pisortartaartoq

Linda Kleist Visit Greenlandimi pisortaanertut atorfinitsinneqarpoq. Siulersuisut atorfinitsitsisuupput. Linda Kleist Anne Nivíka Grødem soraarmalli pisortaanerugallartutut sulsiimasoq taamaalilluni suliffeqarfimmi siuttuuginnassaaq.

Visit Greenlandip siumut isigisumik aqutsisoqarnissaanik pisariaqartitsinerata ataavartumik, patajaatsumik ersarissumillu siunnerfeqartumik qulakkeernissaa ingerlatseqatigiiffiup nuna tamakkerlugu takornariaqarnermik suleqqinnissaanut siulersuisut pingaartissimagaat Visit Greenland tusagassiutitigut nalunaarummi ilisimatitsivoq.

- Visit Greenland pingaarutilimmik suliassaqarpoq. 2035-ip tungaanut periusissiatta ersarissumik tunaartalersimavaa ingerlatseqatigiiffiup qanoq Kalaallit Nunaata ornitassatut inissisimaneranik nukittorsaanissaq, aammalu nunaqavissunut naleqalersitsiviusumik Kalaallit Nunaatalu nammineerluni atugassarititaanut aallaaveqarluni takornariaqarnikkut akisussaassuseqartumik ikorfartuinissaq.

- Tamatumani periusissiamik suleriusinngortitsisinnaasumik, ingerlatseqatigiiffimmik ataatsimoortitsisinnaasumik ornigassani, suliffeqarfinnik, oqartussaasunik nunallu tamalaat akornanni suleqatinik nukittorsaasinnaasumik tamatumani pisortaqartariaqarpoq. Lindalu suliassamut tassunga ingerlatsisinnaalluarpoq,” Visit Greenlandimi siulersuisuni siulittaasoq Anette G. Lings taama oqarpoq.

Nuna tamakkerlugu ornigassanik ineriartortitsinermik suliaqarsimasoq

Linda Kleist Visit Greenlandimi 2023-imiilli sulivoq, tassanilu nuna tamakkerlugu sumiiffiit takornariarfiusuni ineriartortitsinermik, nunap immikkoortuini takornariaqarnermut siunnersuisunik suleqateqarnermik, takornarialerisunik oqaloqateqarnermik aammalu periusissianik tunngaveqarluni nuna tamakkerlugu suliniuteqarnermik suliaqarsimalluni. Kleist aamma Anne Nivika Grødemip atorfimminit tunuarnerata kingorna pisortaanerugallartutut atorfininnginnermini Visit Greenlandip aqutsisoqatigiivinut ilaavoq.

Aamma atuaruk

Visit Greenland pisortassamik nutaamik ujartuilissaaq

Linda Kleistip Kalaallit Nunaata takornariarfissatut nunat tamalaat akornanni inissisimaffianik nukittorsarnissaa aammalu nunamut tamarmut pissarsiffiusumik naleqalersitsivigineqarnissaa nangillugu Visit Greenlandimi suliarineqarnissaanut siuttuussaaq.

- Siulersuisut tatiginninnerat qujamasuutigisorujussuuara, suliassamullu maniguullunga. Kalaallit Nunaat angerlarsimaffigaara, nukigalugu ilinniarsimasutullu tunngavigalugu. Nangillugu suleqataaffigerusuppara Visit Greenlandip nunat tamalaat akornanni inissisimanerata nukittorsarnissaa aammalu nunatsinnik alapernaallutik ataqqinnillutillu takornariarusuttunut pilerinarsaanissaq - takornariaqarnerullu suli annertunerusumik najugaqartunut peqataasunut naleqalersinneqarnissaa suleqataaffigerusullugu.

- Uannut akisussaassuseqartumik takornariaqarnikkut ineriartortitsineq aamma tassaavoq takornariaqarnikkut inuussutissarsiuteqarnermik pilerinartunngorsaaneq aammalu Kalaallit Nunaata najugarinissaata takornariarnissaatalu pitsaasuunissaanik ineriartortitsineq, Linda Kleist oqarpoq.

Linda Kleist nunani tamalaani kiffartuussinermik aqutsinermut bacheloritut ilinniagaqarsimallunilu nittarsaassinermi aningaasarsiornermik tunuliaqutaqarpoq. Linda Kleist maaji naalersorli Visit Greenlandimi pisortaanerugallartutut inissisimasimavoq.