Avammut niuerneq ukioq manna aallartilluartoq

Aalisakkanik avammut niuerneq aallartilluarsimasoq, Naatsorsueqqissaartarfiup kisitsisaataasa nutaat takutippaat.

Aalisakkanit tunisassiat pingaarnerit Nunatsinnit avammut tunineqartartut, tassa kinguppaat, saarulliit, qalerallit, saarulliit nipisaallu suaat naatsorsorneqarsimapput, ukiullu qaammataanni siullerni marlunni siorna piffissamut tassunga sanilliullugu annertuumik amerleriarsimallutik:

- 2026-mi januaarimiit februarmut avammut tunisat nalingi katillugit 1.011 mio. kr.-usimapput.

- Ukiup siulianut sanilliullugit 223 millionit koruuninik amerlanerupput, amerleriaataallu katillugit 28,3 procentiulluni, Naatsorsueqqissaartarfimmit taama allapput.

Naatsorsueqqissaartarfimmit erseqqissarneqarpoq, kisitsisit taakku naatsorsuussaagallartuummata, taamaattumillu mianersorluni nassuiarneqartariaqartut.

Aalisakkat assigiinngitsut ataasiakkaat kiilumut akii tamarmik qaffariaateqarsimapput. Naatsorsueqqissaartarfik ima allappoq:

• Kinguppaat: 2026-mi januaarimit februaarimut kinguppaat avammut tunisat nalingi siorna piffissamut tassunga sanilliullugit 20,8 procentimik qaffariarput. Tamanna 56 millionit koruuninik qaffariaateqarfiuvoq, tunisallu 8,5 procentimik amerleriarsimallutik akiilu 13,0 procentimik qaffariarsimallutik.

• Qalerallit: Qalerallit avammut tunineqartartut nalingat 66,0 procentimik annertuseriarsimavoq, tunineqartartut amerlassusaat 51,7 procentimik amerleriarsimallutik. Taamaalilluni kiilumut akiat 11,0 procentimik qaffassimapput.

• Saarulliit: Saarulliit avammut tunineqartartut nalingat 21,6 procentimik qaffariarsimavoq, tunineqartut 8,5 procentimik ikileriarsimallutik, kiilumullu akiat 42,7 procentimik qaffariarsimalluni.

• Saattuat: Saattuat avammut tunisat nalingat 64,5 procentimik qaffariarpoq, 37,0 procentimik amerleriarlutik kiilumullu akiat 19,8 procentimik qaffariarluni.