Bankivik ukiup affaani siullermi angusaqarluartoq

Bankivik, Savalimmiuni aningaaserivittut ingerlatseqatigiiffik Føroya Bankip ataaniittoq 2026-mi ukiup affaani siullermi angusarissaarsimasoq, nalunaaruteqarpoq:

– Ukiup affaani angusat pitsaasut tutsuiginartullu ullumikkut saqqummiussinnaavavut, tassani Kalaallit Nunaanni immikkoortortaqarfik akileraarutit suli ilanngaatiginagit 19 millionit koruuninik sinneqartooruteqarnermut tapertaavoq.

– Sullitatta amerliartornerat, namminerlu pigisatta iluanaarutigilluarnissaannik aaqqiisoqarsimanera, ingerlatseqatigiiffiup ineriartorluarneranut pissutaanerpaavoq. Aammattaaq nuannaarutigaarput takusinnaallugu sullitatta aningaasaqarnerat pitsaasuusoq, ilaatigut nalikilliliinerit appasinnerannik ersersitsisumik, pisortaaneq Turið F. Arge tusagassiuutinut nalunaarummi oqarpoq.

Kalaallit Nunaanni niuernermi akileraarutit suli ilanngaatiginagit 23 millionit koruuninik siorna piffissami tamatumani angusaqarput.

Akileraarutit ilanngaatigereerlugit ingerlatseqatigiiffiup tamarmiusup 2026 ukiup affaani angusai, 125 million koruuniupput.

Kalaallit Nunaanni niuerneq ineriartorluartoq, pingaartumik aningaasanik taarsigassarsisartut amerliartortut, Bankivik allappoq.

– Ineriartorluarnermut aamma atuisut amerliartuinnartut netbankimilu niuernermut atortussaq atorlugu pappialanik nalilinnik niueqateqartarnerat ukiup qaammataani siullerni arfinilinni, pissutaavoq.

Bankivik nutaamik nunami pisortartaarpoq, tassa Anne Nivíka Grødem, taannalu aggustip aallaqqaataani atorfinitsinneqarpoq. Taanna Visit Greenlandimi pisortaanertut siusinnerusukkut atorfeqarpoq, aningaaseriveqarnermilu ilinniarluarsimasuuvoq misilittagartooq.

– Anne Nivíka Bankivimmut tikilluaqqusinnaanera nuannaarutigaarput. Bankivimmi sulisut nunaqavissut misilittagartuut piginnaanillit kiisalu niuernikkut tunngavissaqarluarluta, soorlu ukiup affaanut naatsorsuutit ullumikkut takutikkaat, ineriartornerup pitsaasup ingerlateqqinnissaa qilanaaraarput, sullitatsinnut naleqarnerulersitsissalluta tamatumalu saniatigut Kalaallit Nunaanni kikkunnut tamanut pitsaasumik unammillersinnaanermillu qulakkeerinnilluta, pisortaaneq Turið F. Arge oqarpoq.

Aningaaseriviup naatsorsuutigaa 2026-mi akileraarutit ilanngaatigereerlugit sinneqartoorutit 195 aamma 235 million koruunit akornanniissasut.