Borgmester Simigaq Heilmann: – Eqqagassalerineq ilungersunarluinnartumik inissisimavoq

Nuna tamakkerlugu eqqakkanik passussinermut tunngatillugu sinaakkutassat inatsisillu Naalakkersuisut suliassaraat, taakkulu tunngavigalugit eqqagassalerineq kommuuninit suliarineqassaaq. Eqqakkanut iliuusissanut pilersaarut 2020-miit 2031-mut atuuttoq naapertorlugu, Naalakkersuisut pingaartilluinnarpaat pinngortitamiit eqqakkat peerneqarnissaat. Kisiannili tamanna maannamut suli tamakkiisumik anguneqarsimanngilaq. Taamaattumillu Kommune Qeqertalimmi eqqagassalerineq ilungersunarluinnartumik inissisimasoq, Kommune Qeqertalimmi borgmesteri Simigaq Heilmann, Demokraatit, oqarpoq. Eqqakkanillu passissinermut tunngatillugu suliniutit amigartut, tamannalu akuersaarneqarsinnaanngitsoq, Kommune Qeqertalimmi kommunalbestyrelsimi illuatungiulittuniit, Frantz Lundblad, Siumut, isumaqarpoq.

Ilungersunartoq

Kommunit ataatsimoorussamik eqqakkanik ingerlatseqatigiiffiannut ESANI A/S-imut, Kommune Qeqertalik piginneqataanermut, ukioq manna 2,7 milliuunit koruuninik akiliuteqartoq ESANI paasissutissiivoq. Eqqagassat ikuallanneqarsinnaasut Nuummi Sisimiunilu ikuallaavinnut assartorneqartaraluartut, taamaattoq Kommune Qeqertalimmi eqqagassalerineq ataatsimut isigalugu suli ilungersunartoq, Simigaq Heilmann oqarpoq. 

- Eqqagassalerineq ilungersunarluinnartumik inissisimavoq. Taamaattumik immikkut ittumik iliuuseqarnissaq pisariaqarpoq.

- Assersuutigalugu ammaannartumi ikuallaanissamut akuersissuteqarnissaq qaammatialuinnarni pinnani, piffissaq sivisunerusoq kommuninut tamanut tunniunneqartariaqarsoraara.

- Eqqakkanik passussinermi atortorissaarutinik tulluartunik illoqarfiit nunaqarfiillu piffissap sivikitsup iluani tamarmik pitaartinneqarsinnaanngillat.

- Aningaasaqassuserput eqqarsaatigalugu ilaannai pissarsisinnaagallartillugit, malunnaatilimmik iliuuseqarnissamut killiliimmat, Naalakkersuisut suleqatigalugit inuit peqqissusiat pinngortitarlu illersorniarlugit isumaqatigiissuteqartariaqartugut isumaqarpunga, taanna oqarpoq.

Angerlarsimaffinni eqqakkanik immikkoortiterisalernissaq piffissami aggersumi anguneqartariaqartoq, borgmesteri aamma isumaqarpoq.

Eqqaavissuit imaarneqassasut

Kangaatsiami eqqaavissuaq ulikkaarluinnarsimasoq imaarneqassassoq 11. juuni kommunalbestyrelsip ataatsimiinnerani aaliangiunneqarpoq. Suliffeqarfik siunnersuinermik pilersaarusiornermillu suliaqartartoq, Inuplan A/S, kommunimut siunnersortaalluni eqqaavissuup imaarneqarnissaanut suliariumannittussarsiuussissaaq, sullissinerlu taanna 137.500 koruuninik akeqassaaq. Kangaatsiami eqqaavissuup imaarneqarnissaa aggustip qiteqqunneranit novembarip naaneranut pissasoq pilersaarutaavoq. Tamannalu pereerpat Qeqertarsuarmi eqqaavissuaq aamma imaarneqassasoq, Simigaq Heilmann erseqqissaavoq.

- Kangaatsiap Qeqertarsuullu eqqaavissui imaarneqartussatut maanna pilersaarutaapput, tamannali isumaqanngilaq illoqarfiit nunaqarfiillu sinneri taama siunertaqarfigineqanngittut, taanna oqarpoq.

Eqqakkat ikuallanneqarsinnaasut kisiisa, ESANI-ip Nuummi Sisimiunilu ikuallaavinnut naliginnaasumik assartortarpai. Kisiannili Kommune Qeqertaliup ESANI-mut piginneqataanermut isumaqatigiissutaa nutarterneqartariaqartoq, tassungalu atatillugu eqqakkat savimminikut illoqarfinni nunaqarfinnilu amerlasoorujussuanngorsimasut ilanngullugit assartorneqartalernissaat anguneqartariaqartoq, borgmester Simigaq Heilmann isumaqarpoq.

Eqqagassalerinermut pilersaarut suliarineqartoq

Kommunit tamarmik eqqagassalerineq pillugu pilersaaruteqarnissaat piumasaqaataavoq, taannalu Kommune Qeqertalimmi suli suliarineqartoq, Simigaq Heilmann erseqqissaavoq. Kisianni taanna qaqugu piariissanersoq maannakkut oqaatigineqarsinnaanngikkallartoq, taassuma oqaatigaa.

Immikkut suliakkiineq

ESANI A/S-ip pisortaata Nikolai Odgaard Jensenip oqarnera naapertorlugu, Kangaatsiami eqqaavissuup imaarneqarnissaanut atatillugu paasissutissat suli utaqqimaarneqarput.  

- Eqqakkat naliginnaasut ikuallanneqarsinnaasullu assartornissaannut taamaallaat akuerisaavugut. Taamaattumik eqqaavissuarnik imaarsinissaq suliassatta qaavatigut immikkut suliakkiinerussaaq.

- Kisianni immikkut suliakkiisoqassappat, soorunami suliassaq aamma naammassisinnaavarput. Apeqqutaaginnarporli tamanna qanoq sivisutigissanersoq, pisortaq oqarpoq

Kommune Qeqertalimmi illoqarfinni nunaqarfinnilu eqqaavissuit imaarneqassappata, tamanna ESANI-mut suliakkiutaassappat, suliaq annertoorujussuussasoq, Nikolaj Odgaard Jensen erseqqissaavoq. 

Ataavartumik aaqqiinissaq pisariaqartoq

2025-mi kommunalbestyrelsimut qineqqusaarnermi Siumumiit oqariartuutigineqarpoq, Kommune Qeqertalik ESANI-mut piginneqataajunnaassasoq, taarsiullugulu illoqarfinni nunaqarfinnilu ikuallaavinnik pilersitsisoqassasoq. Qinersinerulli kinguninngua Siumut kommunalbestyrelsimi ikinnerussuteqarluni illuatungiliuttunngormat, anguniakkat taakku piviusunngortinneqanngillat.

Kangaatsiami Qeqertarsuarmilu eqqaavissuit imaarneqarnissaat imminermini ajunngitsoq, kisiannili siunissaq ungasinnerusoq eqqarsaatigalugu ataavartumik aaqqiinissaq orniginarnerusoq, Kommune Qeqertalimmi kommunalbestyrelsimut ilaasortaq, Frantz Lundblad, Siumut, oqarpoq.

- Eqqagassalerinermi periuseq allanngortinneqanngippat, eqqaavissuit amaarneqartut piffissap ingerlanerani ulikkaaqqissapput, tamannalu siunissamut aaqqiinerunngilaq.

- Eqqavissuit imaarneqarnissaasa pilersaarusiorneqarnerannut aningaasartuutaasut qaavatigut, ESANI-p Sisimiunut ikuallaavimmut assartuinissaanut aamma akiliuteqassaagut, tamannalu akuersaarneqarsinnaanngilaq, taanna oqarpoq.

ESANI A/S-ip 2019-imi pilersinneqarnerata kingorna Kommune Qeqertalimmi eqqaavissuaqarneq aatsaat taamak ilungersunartigisumik inississimalersimasoq, Frantz Lundblad isumaqarpoq.