Greenland Airports milliardinik amigartooruteqartoq – Naalakkersuisut sakkortuumik isornartorsiuipput

Namminersorlutik Oqartussanit pigineqartoq Greenland Airports tallimanngormat ataatsimeersuarnermi 2,7 milliarder koruuninik amigartooruteqarnini saqqummiuppaa.

Amigartooruteqangaarneranut pigisaanik naatsorsuutitigut naleqannginnerulersitsinermik pissuteqarpoq.

Siulersuisuni siulittaasoq Jens Wittrup-Willumsen naapertorlugu naleqannginnerulersitsineq katillugu 3 milliarder koruunit missaannik naleqartoq.

Naalakkersuisut siulittaasuat Jens-Frederik Nielsen, ukioq manna angusat pillugit sakkortuumik oqaaseqarpoq:

– Aningaasaqarnikkut ukioq manna angusat ilungersunartut Naalakkersuisut maluginiarpaat. Ingerlatseqatigiiffimmut Greenland Airportsip inissisimaffiatut ittumut, tassa Kalaallit Nunaanni innuttaasut sinnerlugit attaveqaatinik pingaarutilinnik ingerlatsisumut, naatsorsuutigineqartunik naammassinninngilaq, Jens-Frederik Nielsen oqarpoq.

Aamma oqarpoq naatsorsuutigalugu ingerlatseqatigiiffiup unneqqarilluni suullu ajornartorsiutaasimanersut paasissallugu iliuuseqarfigissagaa.

Pisortaq nalikilliartornernut nassuiaateqarpoq

Siulersuisut tamarmik sakkortuumik isornartorsiorneqaraluarlutik qinigaaqqipput.

Mittarfiit maannamut sanaartorneqarnerannut aningaasartuutit naapertorlugit naatsorsuutigineqartarnerat nalikilliartortartoq, pisortap Jens Lauridsenip ataatsimeersuarnermi nassuiaatigaa.

Niuernikkut ingerlanneqarluarsinnaanera eqqarsaatigalugu qanoq naleqartiginerat maanna nalilersorneqaqqissimavoq. Niuernerup ineriartornera ilimagisamit arriinnerusumik ingerlasimavoq, taamaattumik nalikillisaasoqarpoq. Siuariartornissarlu ukiuni tulliuttuni naatsorsuutigineqarpoq.

”Sanaartugaq naatsorsuutigineqaqqaartutut isertitaqartitsisinnaanngippat – ilaatigut assersuutigalugu akunnittarfimmi inissat allatigullu takornariartitsinermut attaveqaasersuutit mittarfiit ilutigisaannik piareersimannginnerat pissutaalluni – nalinga naatsorsuutini allanneqartoq naatsorsuuserinermut inatsimmi maleruagassat malillugit appartillugu iluarsineqartussaavoq. Oqaatigineqartartutut naatsorsuutit saqqummiunneqareerneranni tunineqassagaluarpat sanaartukkamut pissarsissutaasussaagaluartoq kisitsimmi takuneqarsinnaavoq,” Jens Lauridsen oqarpoq.

Sulisut annertuumik tatineqartut

Greenland Airportsimi pisortap sulisut, annertuumik tatisimaneqarlutik sulisut nersualaarpai:

"Sulisutta tamaviaarnartunik atugaqarlutik suliassaq, Kalaallit Nunaanni suliffeqarfiit ikittuinnaat nalaassimasaat kivippaat – sulilu maannamut kivitsiuarlutik! Mittarfiit nutaat taakkua naatsorsuutaannaanngillat kisitsisaannaanatillu. Sulisunukua sanaartugaq piffissaq eqqorlugu piareertinniarlugu akueritinniarlugulu ulloq unnuarlu qassinngoraluarpalluunniit suliartortartut. Imaluunniit timmisartut isumannaatsumik tingisinnaanissaannik missinnaanissaannillu qulakkeerisartut. Pikkorilluinnarlutik piumasaqaateqarfiusumilu suliaqarnerannut nersualaarujussuarneqartariaqarput," Jens Lauridsen oqarpoq.

Greenland Airportsip ukioq manna Qaqortumi mittarfik ammarmagu Naalakkersuisut siulittaasuat Jens-Frederik Nielsen aamma nersualaarivoq. Ilulissani mittarfik nutaaq ukioq manna kingusinnerusukkut aamma atulersinneqassaaq.