Pisassiissutit pillugit unamminermi ingerlatseqatigiiffik nutaaq peqataalersoq

Sermitsiap allagaatinik takunnissinnaatitaanera tunngavigalugu paasineqarpoq, Naalakkersuisut Kitaani Tunumilu avataani qaleralittassiissutinik saarullittassiissutinillu nutaanik marlunnik qinnuteqartitsineranni qinnuteqartut quliusut.

Pisassiissutit pillugit unammillertut ilagaat pilersinneqaqqammersoq Inua Fisheries Greenland ApS.

AAMMA ATUARUK

Aalisarnermut ingerlatseqatigiiffippassuit nutaat pisassiissuterpassuit pilerngukkaat

Ingerlatseqatigiiffik tusagassiuutinut nalunaarummi ilisimatitsivoq Kalaallit Nunaanni sumiiffinnit qulinit amerlanerusunit Inua Fisheries Greenlandimik piginnittoqartoq, ingerlatseqatigiiffillu kalaallit amerlasuut piginneqataanerat akisussaassuseqarluni aqutsinermut naleqarnerulersitsisarnermullu inuiaqatigiinnut tamanut iluaqutaasumik qanoq atorneqarsinnaaneranut maligassiuerusuttoq.

"Inuiaqatigiit ikittunnguugatta pisuussutit sapinngisamik amerlasuunik peqataatitsinikkut iluaqutigineqartariaqarput,” Inua Fisheriesimi pisortaq Taatsiaq Møller oqarpoq.

Ingerlatseqatigiiffik pisassiissutissanut 1-imut, tassa qaleralittassiissutit 2.468,5 tonsit, saarullittassiissutigineqartut 1.950 tonsit aamma qalerallit 166,6 tonsit pillugit qinnuteqarpoq.

Ingerlatseqatigiiffiit arfineq-pingasut pisassiissutit 1-imut qinnuteqarsimapput. Inua Fisheries Greenland ApS-ip saniatigut ingerlatseqatigiiffiit uku qinnuteqarsimapput: Longline Fisheries ApS, Avalleq ApS, Halibut Greenland ApS, Isortaq Trawl, SiKu Trawl ApS, Alisa Trawl ApS aamma H/K I/S.

Ingerlatseqatigiiffiit pisassiissutinut nutaanut, avataasiorluni aalisarnermut ullumikkut attuumassuteqanngitsunit, pigineqassapput.