Jens-Frederik Nielsen nioqqutissanik pilersuineq pillugu: – Naalakkersuisut sipaarniartoqarnissaa kissaatiginngilaat

Upernavimmut nunaqarfiinullu nioqqutissanik pilersuineq eqqarsaatigalugu sipaarniartoqanngilaq. 

Aammalu Namminersorlutik Oqartussat KNI A/S-imik sullissinissamik isumaqatigiissutaanni piumasaqaataasut malinneqarnersut qulakkeerniarlugit, ataatsimiinnerit ingerlaavartumik ingerlasarput. 

Taama Naalakkersuisut siulittaasut Jens-Frederik Nielsen, Demokraatit, Inatsisartunut ilaasortap Isak Johannesenip, Naleraq, paragraf 37 naapertorlugu apeqqutaanut akissuteqarluni ilaatigut allappoq.

Unammillernartoqartoq

Piffissami novemberimiit maaji ilanngullugu Upernavik eqqaalu sikuusarmat, tamaanga ukiuunerani imaatigut nioqqutissanik assartuisoqarneq ajorpoq. 

Ukiuuneranilu Upernavimmut qulimiguulik atorlugu ilaasunik nassatanillu assartuineq unammillerneqartoqartoq, Air Greenlandip siorna Sermitsiamut oqaatiginikuuaa. Taamaattumik annerusumik ukiup ilaani qaammatini arlalinni Upernavimmi nunaqarfiinullu qulingiluaasuni nioqqutissat, ilaatigut inuuniarnermut pingaaruteqartut, annertuumik amigaataalertartut, Inatsisartunut ilaasortaq Upernavimminngaanneersoq Isak Johannesen oqarpoq. 

Tamannalu tunngavigalugu Upernavimmi Pilersuisup nioqqutissanik pilersuineranut atatillugu unammilligassat pillugit, Naalakkersiusunut taanna apeqquteqarpoq.

Ingerlaavartumik naleqqussaasartoq

Pilersuisoq A/S, Upernaviup nunaqarfiini qulingiluaasuni arfineq marlunni pisiniarfeqartoq, nioqqutissanik ikililerisimanersoq Isak Johannesennip paaserusuppaa. 

Nioqqutissanik pilersuineq pillugu Naalakkersuisut KNI A/S-imik sullissinissamik isumaqatigiissuteqarput. Taannalu aallaavigalugu KNI A/S, Pilersuisumik piginnittuusoq, Upernavimmi nunaqarfiinilu nioqqutissanik pilersuinissamik pisussaaffeqarpoq. 

Jens-Frederik Nielsenip paasissutissiinera naapertorlugu sumiiffinni imminut akilersinnaasumik pisiniarfeqarsinnaanngitsuni, pisiniarfinnik ammatitsisoqarnissaa sullissinissamik isumaqatigiissummi aamma ilaavoq.

- Sullissinissamik isumaqatigiissummut ilassutaasoq naapertorlugu, Upernavimmi Pilersuisup pisiniarfiani nioqqutissat assigiinngitsut 340-t pisiassaassasut isumaqatigiissutaavoq. Taassuma saaniatigut nioqqutissat atuisunit kissaatigineqartut ilai tuniniarneqartarput, taanna oqarpoq.

Kisiannili KNI A/S-ip ilisimatitsinera naapertorlugu, siorna ukiap ingerlanerani naleqqusartariaqarsimavoq – tassa nioqqutissat tunngaviusumik tikisinneqartartut saniatigut, nioqqutissat tunineqarneq ajortut, imaluunniit tunineqarpiarneq ajortut, pisiniarfinni nioqqutigineqarunnaassasut aalajangerneqarsimalluni. 

Nioqqutissat taakku eqqarsaatigalugit KNI ingerlaavartumik naleqqussaasarpoq, sullissinissamillu isumaqatigiissummi piumasaqaataasut naammassineqarsimanersut Naalakkersuisunit ingerlaavartumik malinnaaffigineqartartoq, Naalakkersuisut siulittaasuata erseqqissaatiga.

Sipaarniartoqanngitsoq

KNI A/S nuna tamakkerlugu assigiimmik akeqartitsivoq, ingerlatsinerlu pitsaanerutinniarlugu najukkani ataasiakkaani assigiinngitsunik akikillisaqarsinnaasarpoq. Kisiannili nioqqutissat nutaat, soorlu naatitat timmisartumik nassiunneqartartut, aningaasartuutaasimasut naapertorlugit akisunerusinnaasartut, Isak Johannesenimut akissummi erserpoq.

- Upernavimmut nunaqarfinnullu pilersuineq eqqarsaatigalugu Naalakkersuisut sipaarniaqqusisimanngillat.

- Sineriammi sipaarniartoqarnissaa Naalakkersuisut kissaatiginngilaat, nunatsinnilu innuttaasut sumiluunniit najugaqaraluarunik assigiimmik pineqarnissaat pingaartitaralugu, Jens-Frederik Nielsen erseqqissaavoq.

Upernaviup eqqaani nioqqutissat tunngaviusumik pigineqartussat qulakkeerneqarnissaat sullissinissamik isumaqatigiissummut ilaavoq.

Oqitsuinnaanngitsoq

Sullissinissamik isumaqatigiissummi piumasaqaataasut malinneqarneri qulakkeerniarlugu, Namminersorlutik Oqartussat KNI A/S-imik ingerlaavartumik ataatsimeeqateqartarput.

- Soorlu Naalakkersuisunit siusinnerusukkut oqaatigineqareersimasoq, Kalaallit Nunaanni nioqqutissat akii, innuttaasunut iluaqutaasinnaasussamik tamakkiisumik akikinnerusinnaaneri kissaatiginaraluarpoq.

- Anguniagarli taanna oqitsuinnaanngilaq, tassa assartuinermi, uninngasuuteqarnermi kingusinnerusukkullu igitsisariaqarnermi aningaasartuutaasartut tassani pineqarmata, Jens-Frederik Nielsen oqarpoq.

Isak Johannesenimut akissutigineqartoq naapertorlugu KNI A/S pitsaanerusumik ingerlatseriaasissamik suliaqaleruttorpoq. Tassunga atatillugu innuttaqqortussuseq, sumiiffiillu ilaanni nioqqutissanik pisisarnerup annertussusaa tunngavigalugu niuerneq naleqqussarneqartariaqartoq erseqqissaatigineqarpoq.

Apeqqutit amerlanerusut

Isak Johannesenip oqarnera naapertorlugu Naalakkersuisut siulittaasuata akissutigisaa apeqqutinik arlalinnik nutaanik pilersitsivoq, itinerusumillu paasisaqarfiginiarlugu pineqartoq malersukaaqqissallugu, taassuma oqaatigaa.

- Sapigallit nerisassaat amigaataasut, nioqqutissallu ullussaminnik qaangiinikut tuniniarneqarnerat pillugu annerusumik paasisaqarusuppunga.

- Aammali illoqarfiit nunaqarfiillu sikusartumiittut ukioq kaajallallugu nioqqutissanik pisariaqartinneqartunik pilersorneqarsinnaanissaat qulakkeerniarlugu, umiarsuit assartuutit sikunik aserorterisinnaasut atorneqarsinnaalernissaat pillugu sukumiinerusumik paasisaqarusuppunga, Isak Johannesen oqarpoq.

Qeqertarsuup Tunuani nioqqutissanik pilersuineq avannarpasinnerusumi nioqqutissanik pilersuinermut naleqqiullugu annertuumik nikingassuteqartoq, assigiinnerusumillu pilersorneqarnissaq qulakkeerneqartariaqartoq, taanna isumaqarpoq.