Jeppe Kofodip aatsitassanik qaqutigoortunik soqutiginninnera

Nunanut allanut ministeriusimasoq socialdemokrateq Jeppe Kofod Australiamiut aatsitassarsiortitseqatigiiffiannut Energy Transition Mineralsiop advisory boardianut nutaamut ilannguppoq, namminerlu oqarnera malillugu nunat tamat akornanni suleqatigiinnermi nukissiuutinullu politikkimi misilittakkaminik Kalaallit Nunaata nunarsuarmi mingutsitsinngitsumut ikaarsaarnerani suleqataanissaanut oqaloqatiginninnernik tatigeqatigiinnermillu annertusaaniarnermut atussavai.

– Piujuartitsisumik aatsitassarsiorneq – akisussaassuseqartumik ingerlanneqartillugu – Kalaallit Nunaata ineriartorneranut, mingutsitsinngitsumik ikaarsaarnermut silaannaallu pissusaata allanngoriartorneranik akiuiniarnermut ilapittuisinnaanera upperaara, Jeppe Kofod Sermitsiamut allakkatigut akissummini allappoq. 

Nunanut allanut ministeriusimasup 2023-mi attaveqarnermut siunnersuisarnermullu suliffeqarfik Kofod Global pilersippaa. Ukiorlu taanna Canadamiut suliffeqarfiannit The Metals Companymit Issittumi immami itisuumi aatsitassarsiornissamut sunniiniartussatut suliakkerneqarpoq. 

Kalaallit Nunaannut iluaqutaasumik 

Energy Transition Mineralsimut, maanna Kalaallit Nunaannik eqqartuussivilersuussisumut suliaqarnerminut atatillugu, Jeppe Kofod suliniutit Kuannersuartut ittut ”akisussaassuseqartumik, ersarissumik Kalaallillu Nunaannut iluaqutaasumik ingerlanneqarnissaannut” ilapittuisinnaalluni isumaqarpoq. 

– ETM-p qanoq ililluni kalaallinik danskinillu soqutigisaqartumik ammasumik ataqqinnittumillu oqaloqatiginnissinnaanera pillugu siunnersuinermik ilapittuuteqassaanga. Tamatumalu saniatigut mingutsitsinngitsumik sammisumik politikimik, nunat tamat akornanni atassuteqatigiinnermik suleqatigiinnermillu ingerlatsinermi misilittakkannik atuisinnaanera neriuutigaara, taamaalilluni suliniut Kalaallit Nunaannut nunanullu killernut aatsitassanik pisariaqartunik aatsitassarsiornermillu mingutsitsinngitsumut ikaarsaarnermut, inuiaqatigiitta kallerup innilersornissaanut, pilersuinerullu isumannaanerulernissaanut iluaqutaasumik ineriartortinneqarsinnaaqqullugu. Akissarsiaqarluni sulineq matumani pineqarpoq, Jeppe Kofodili ingerlatseqatigiiffiullu advisory boardiani ilaasortat allat qanoq neqeroorfigineqarnerat, Jeppe Kofodip ingerlatseqatigiiffiulluunniit pisortaata Daniel Mamadoup Sermitsiamut oqaatigiumanngilaa. 

Inatsisilerinikkut suliamut attuumassuteqanngitsoq

Aatsitassanut naalakkersuisoq Naaja H. Nathanielsen naapertorlugu Jeppe Kofod ingerlatseqatigiiffiullu advisory boardiani ilaasortat sinnerisa Australiamiut ingerlatseqatigiiffiat Kalaallit Nunaanni ilungersuutaanik periarfissanillu atorluaanissaanik ilitsersorpaat. Taamaalillutik ingerlatseqatigiiffiup soqutigisaanik sinniisuupput.

Tassungalu Jeppe Kofod isumaqataanngilaq. Nammineq ingerlatseqatigiiffimmut sinniisuusorinngilaq, siunnersortaaginnarpoq sapinngiffiminilu immikkut ilisimasaminik neqeroorluni. Taamattaaq inatsisilerinikkut suliami qanittumi Nunatta Eqqartuussiviani ingerlasussami, Kalaallit Nunaata ingerlatseqatigiiffimmik qalluinissamik akuersissummik tunniussisariaqarluniluunniit 76 milliardit koruuninik taarsissussanngorsinnaanerani suliaqartutut imminut isiginngilaq. 

AAMMA ATUARUK

Jeppe Kofod og Friis Arne Petersen skal rådgive Kuannersuit-selskab

– Inatsisilerinikkut suliamut attuumassuteqanngilanga, tamatumalu attuumassuteqanngitsunit eqqortunit passunneqarnissaa pingaaruteqarluinnarpoq. Sammisara allarluinnarmiippoq – tassa illuatungeriit akornanni qanoq pitsaanerusumik tatigeqatigiinnerusumillu siunissami oqaloqatigiittoqarnissaa. Aaqqiissutinik naapertuuttunik tamanillu siuariartortitsisunik nassaartoqarnissaa neriuutigaara. 

Avatangiisinik illersuiniaqatigiiffimmit isornartorsiorneqartoq

Avatangiisinut illersuiniaqatigiiffiup NOAH-p Jeppe Kofodip aatsitassarsiortitseqatigiiffimmik Kalaallit Nunaanni Namminersorlutik Oqartussanit ajalusoortitsiniarsarisunik suleqateqarnera paasisinnaanagu Sermitsiamut oqaatigaa. Taama isumaqartoqarnera Jeppe Kofodip isumaqatiginngilaa. – Oqallinnermi matumani sakkortuunik isumaqartoqarnera ataqqivara, taamatulli nassuiaaneq isumaqatiginngilara. Suleqatigiinneq ersarissuutitsinerlu aqqutissaasut isumaqarama, peqataavunga. Illuatungeriit oqaloqatigiillutik aaqqiissutissarsisinnaanerannut ilapittuiniarsarivunga.

NOAH-p Jeppe Kofodip qallunaat naalakkersuisuisa qullersaannut atassuteqarunarnera, tamannalu Danmarkip Kalaallillu Nunaata akornanni atassuteqatigiinnermut ajornartorsiortitsisinnaanera, ilanngullugu tikkuarpaa. Taamatut aarleqquteqarneq Jeppe Kofodip ima oqaaseqarfigaa: – Politikikkut attuumassuteqarunnaarnikuuvunga, inuinnartullu ETM-p advisory boardiani ilaavunga. Politikimit nunallu tamaat suleqatigiinnerannit misilittakkakka paaseqatigiinnermik pilersitsinermut attaveqarnermillu pilersitsinermut atorpakka. Kalaallit Nunaat ajunnginnerpaamik kissaappara, Kalaallillu Nunaata Danmarkillu nukittuumik tatigeqatigiittumillu atassuteqarnerat illuatungeriinnut tamanut pingaaruteqarluinnartuusoq isumaqarpunga.

Statsministereqarfik ETM-p advisory boardianut ilaasortanik toqqaarnermut akuusimanani Sermitsiamut ilisimatitsivoq.