KJ Greenland isertamigut ilungersunartorsiortinneqartoq

OBS: Allaaserisami siullermik allaqqagaluarpoq Karl Jensen KJ Greenlandimi pisortaanerusoq. Tamanna eqqortuunngilaq. Allaaserisami aaqqinneqarpoq atorfia, suliffeqarfimmi siulersuisuni siulittaasuummat.

Kalaallit sanaartornermik suliffeqarfissuata KJ Greenland A/S-p kaaviiaartitai annertusiartorput, isertitamigulli persaqqusersuuteqarpoq. Isertitai ilungersunartorsiorfiupput.

Tamanna 2025-mut naatsorsuutaasa takutippaa.

Siorna suliffeqarfik 687 million koruuninik kaaviiaartitaqartoq, ukioq sioqqullugu 593 milliuunit koruuniusimallutik.

Akileraarutinut akiliinissaq sioqqullugu 10 million koruuninik sinneqartoorpoq, ukiup siuliani 21,7 million koruuniusimallutik. Akileraarutinut akileereerluni ukiumi angusaq 9,8 million koruuninik sinneqartoorfiuvoq, siorna 16,5 million koruuninik sinneqartoorfiusimalluni.

- Kalaallit Nunaanni piffinni annertunerni suliaqarluni KJ Greenlandip oqaluttuarisaanerani ukioq ulapaarfiunerpaavoq. Tamanna immikkut ittumik isumalluutinik pigisanik atuiffiuvoq, tamatumani sulisut pisortallu ilanngullugit, siulersuisuni siulittaasoq Karl Jensen 2025-mut naatsorsuutinut allakkatigut Sermitsiamut oqaaseqaatimini allappoq.

Kaaviiaartitat ilimagisamit annertunerusut

KJ 2024-mut naatsorsuutinik saqqummiussigami, 2025-mi 600-650 million koruuninik kaaviiaartitaqarnissaq akileraarutinullu akiliinissaq sioqqullugu 25-30 million koruuninik sinneqartoornissaq ilimagineqarpoq. Tamanna pisortat nalunaarutaanni atuarneqarsinnaavoq. 2025-mi kaaviiaartitat 687 million koruuniupput taamaalillutillu suliassaninneruneq, saniatigut suliassat minnerunngitsumillu ilimagisamit suliaqarnerunerup kinguneranik.

2025-mi angusat akileraarutinut akiliinissaq sioqqullugu 10 million koruunit angusassatut ilimagineqartunit annertuumik annikinnerupput, pingaarnertullu sanaartukkamut ataatsimut naapertuutinngitsumik ineriartortumut tutsinneqarsinnaallutik.

Pisortat ukiumut angusaq naammaginanngitsutut isigaat. 2025-mili annertunerusumik kaaviiaartitsisoqaraluartoq isertitat ilungersunartorsiorfiupput.

- Angusassatut missingersuusiarput angunnginnatsigu, angusat naammaginanngitsutut isigaagut, pisortat ukiumoortumik naatsorsuutini allapput.

Suliffeqarfiup nammineerluni aningaasaatai 2025-p naanerani 104 million koruuniupput, taamaalillunilu KJ aningaasaqarnikkut nukittuvoq.

Sanaartugaq naapertuutinngitsumik ineriartortoq

Sanaartugaq ataaseq 2025-mi naapertuutinngitsumik ineriartortoq, naatsorsuutini atuarneqarsinnaavoq.
Sanaartukkap sorliup pineqarnera pillugu apeqqummut Karl Jensen erseqqinngitsumik akivoq:

- Pisortat nalunaarutaanni sanaartugaq taannginnatsigu, aamma Sermitsiami taassanngilarput.

KJ Greenlandip suliaani sanaartornermik suliaqarneq annertunerpaavoq, suliffeqarfiullu sanaartornerit suulluunniit ingerlatarai, tassani suliffeqarfinnut sanaartornerit, pisortanut namminersortunullu inissianik sanaartornerit ilanngullugit. Tamatuma saniatigut suliffeqarfik sanaatornermi maskiinanik, lastbiilinik, nioqqutissanik assartuutinik qamuteralannillu iluarsaassisarpoq.

Suliffeqarfik Uummannami, Aasianni Ilulissanilu immikkoortoqarpoq, Kommune Qeqertalillu Avannaatalu kommunia tamakkerlugu, kujataani Attumit avannamut Qaanaaq angullugu sanaartukkanik suliaqartarpoq.

Tamatuma saniatigut KJ Greenland Qaqortumi mittarfiliornermut maanna naammassisumut atatillugu annertuumik sanaartorpoq.

Suliassatut inniminnikkat naammaginartut

2026-p aallartinnerani KJ 300 million koruunit inulaarlugit annertussusilinnik nalilinnik iminneqaqqavoq, 2026-mili apriilip naanerani, 2025-mut naatsorsuutit malillugit ”naammaginartunik iminneqaqqavoq, 800 million koruunillu inulaarlugit suliassamaateqarsinnaalluni”.

Sanaartornermik suliffeqarfik 2026-mi Nuummi Kilisaatinut Talittarfimmik nutaamik suliaqarnissamik isumaqatigiissusiorpoq, taannalu sanaartortitsiviup maanna tikillugu sanaartugassaani annerpaavoq. Sulineq 2028-mi novembarip tungaanut ingerlanneqassaaq. Sikuki Nuuk Harbour sanaartortitsisuuvoq.

Tamanna tunuliaqutaralugu ukioq manna 475-525 million koruuninik annertussusilimmik kaaviiaartitsinissaq, akileraarutinullu akiliinissaq sioqqullugu 15-20 million koruuninik sinneqartoornissaq ilimagineqarpoq. 

- Aallartilluariivippugut Nuummilu arlalinnik atorfinitsitsilluta, taakkunanngalu arlallit KJ Greenlandimi siusinnerusukkut sulisimapput, amerlanerpaaffiini 35-t angullugit sulisoqarnissarput ilimagaarput, siulersuisuni siulittaasoq Nuummi kilisaatinut talittarfissamik sanaartorneq pillugu oqarpoq.