Naajap Kalaallit Nunaanni Politiit illuatungilerai: Kangaatsiami politeeqarfiliortoqartariaqarpoq

Kangaatsiaq politeeqarlunilu politeeqarfittaartariaqarpoq. Folketingemut ilaasortaq, Naaja H. Nathanielsen (IA), taama suli isumaqarpoq.

Taassuma danskit inatsisiliortuinut Kangaatsiap politeeqarfittaarnissaa pillugu aalajangiiffigisassamik siunnersuuteqarnissani, Facebookkimi quppernermini allaaseraa.

AAMMA ATUARUK:

Naaja piumasaqartoq: Sisimiuni politiit amerlanerusut

- Takorlooruk inuunerit ulorianartorsiortoq. Politiit ikiuunnissaat pisariaqartippat, ikiuukkiartortussalli qaninnerpaat siusinnerpaamik nalunaaquttap akunnerata ataatsip qaangiunnerani aatsaat apuussinnapput, tamannalu aatsaat pisinnaavoq sila sikulu akornutaanngippata.

- Tamanna ajoraluartumik Kangaatsiami innuttaasunut politeeqarfeqanngitsumi najugaqartunut piviusuuvoq, Folketingemut ilaasortaq aamma inatsisit atuutsinneqarnerannut siusinnerusukkut naalakkersuisuusoq allappoq.

Danskit Kalaallillu politikkeriisa akerleriissutaat

Kangaatsiaq Kalaallit Nunaanni illoqarfinni politeeqarfeqanngitsutuaavoq. Illoqarfimmi tassani kommunefogedit politiit suliassaannik pisariaqartitsinermi ikiuuttarput. Kalaallit Nunaanni naatsorsueqqissaartarfiup kisitsisaatai naapertorlugit illoqarfik ukioq manna juulip aallaqqaataani 476-inik inoqarpoq.

Kalaallit Nunaanni Naalakkersuisut, Kangaatsiami politeeqarfiliortoqarnissaanik kissaateqassasut, Inatsisartut 2022-imi aalajangerput. Ullorli manna tikillugu kissaat piviusunngunngisaannarpoq. Kangaatsiami politeeqarfiliortoqassappat tamanna danskinit aalajangerneqartussaavoq. Kalaallit Nunaanni inatsiseqarnermut tunngasunik oqartussaaffik danskit akisussaaffiisa ilaanniimmat.

AAMMA ATUARUK:

Akuerineqartoq: Naalakkersuisut nutaamik politeeqarfiliortoqarnissaanik qinnuteqassapput

Kalaallit Nunaanni qinikkat Kangaatsiami politeeqarfittaarusukkaluartut tamanna Kalaallit Nunaanni Politiit isumaqatiginngikkaat, danskit inatsiseqarnermut minsteriata, Nikolai Wammenip, Naaja H. Nathanielsenip apeqqutaanut akissummini, aggustsip 12-ani nassuiaatigaa.

- Kalaallit Nunaanni Politiit Kangaatsiami politeeqarfimmik ingerlatsinissaq maannakkut pisoqartarnera innuttaasullu amerlassusaat eqqarsaatigalugit ingerlanneqarsinnaanngitsoq naliliipput, Nicolai Wammen Kalaallit Nunaanni Politiit naliliinerat aallaavigalugu allappoq.

Assersuuteqartoq

Naaja H. Nathanielsenip Kangaatsiami politeeqarfittaarnissamik sukataaruteqarnermini illoqarfimmi pisartut ilaatigut assersuusiorfigai.

- 2025-mi peqqarniitsumik aallaasersortoq nalunaaquttap akunneri arfinillit qaangiummata aatsaat tigusarineqarpoq. 2021-mi savilersorluni inunnik arlalinnik saassussisoq nalunaaquttap akunneri sisamat qaangiummata aatsaat tigusarineqarpoq, taanna allappoq.

Pisuni sakkortuuni politiit illoqarfimmit allamit Kangaatsiamukarlutik suliartortarput.

- Politeeqarfimmik pilersitsinissaq pinerluttarnerup annikinnera tunngavilersuutigalugu itigartinneqarsimavoq, politiilli ikiuiartorlutik anngunnissaannut piffissaq innuttaasullu toqqissisimanerat Kalaallit Nunaanni politiit aaqqissuussaaneranni nalilersuinermi tunngavissatut pingaarutilittut aamma ilaatinneqartariaqarput.

- Danskit naalakkersuisui itigartitsinerminnik suli aalajangiusimannippata, tamanna tamat oqartussaaqataanerannut ajornartorsiutaassaaq. Aamma innuttaasut inatsisitigut naapertuilluarnermik misiginerat sanngiillisinneqassaaq.