KNI A/S ukiup affaani siullermi kaaviiaartitat ikileriaraluartut pitsaasumik angusaqartoq

KNI A/S ukiup naatsorsuusiorfiup 2025/26-mi ukiup affaani siullermi akileraarutit suli ilanngaatiginagit 86,8 millionit koruuninik angusaqarpoq. Tamanna siorna piffissamut tassunga sanilliullugu malunnaatilimmik pitsanngoriaataavoq, tassa akileraarutit suli ilanngaatiginagit 59 millionit koruuninik siorna angusarineqarsimammat.

Ukiup affaani siullermi kaaviiaartitat 1.405 mio. kr.-iupput, ukiup siulianut sanilliullugu 40,8 mio. kr.-inik ikileriarnerullutik. Nioqqutit immikkoortortaqarfianni kaaviiaartitat 97 mio. kr.-t missaannik ikileriarsimapput, Nukissiuutillu immikkoortortaqarfiani 56 mio. kr.-it missaannik amerlisimallutik.

Nioqqutissalerinermi iluanaarnikinneruneq

Nioqqutissat immikkoortortaqarfianni kaaviiaartitat ikileriarnerannut pissutaanerpaavoq tupat, immiaaqqat imermillu tuniniaanermi tunisat ikileriarnerat kiisalu Kangerlussuarmi akitsuuteqanngitsunik pisiniarfiup matuneqarnera. KNI naapertorlugu nukissiuutit immikkoortortaqarfiani siuariarneq nalinginnaasumik akitigut tunisaqarnernut pissutaavoq. Siorna piffissami tamatumani ukiut siuliini sinneqartoorutit akinik annikillisaanermut atorneqarsimapput.

Ukiup affaani angusat naammaginartuunerannut pingaarnertut pissutaapput kiffartuussinissamut isumaqatigiissutit tunngavigalugit ilimagisamit orsussamik tunisat amerlanerunerat. Tamatumunnga ilaapput takornariartaatit sinersortunut, kilisaatinut sullitanullu allanut annertunerusumik tunisaqarneq, isertitanut pitsaasumik kinguneqarsimammat.

- Nioqquteqarnermut ingerlatsivimmi atugassarititaasut allanngoraluartut kaaviiaartitassaraluanillu annaasaqaraluarluni niuernermik ingerlatsinermini naleqqussaanermigut sinneqartuulaarpoq. Uninngasuutit naleqqussartariaqarnerat iluatsittumik ingerlanneqarpoq, nioqqutinilli qiniataagassaqartitsinermik naleqqussaaneq kiisalu periusissiornermi suliniutit ilaat suli sunniuteqanngillat, KNI A/S tusagassiuutinut nalunaarummi allappoq.

KNI-p ukiup naatsorsuiffiusup 2025/26-p affaani kingullermi ukiup affaanut siullermut sanilliullugu angusassani ikinnerujussuunissaat naatsorsuutigaa. Ingerlatsiviit marluullutik sinneqartuulaaginnarnissaat naatsorsuutigineqarpoq.