KNI-p Nuummi, Maniitsumi Qaqortumilu quersuaqarfiit matuai

Nuuk Imeq 2024 aallartittoq matummat pisiniarfiit pisisartullu sodavandinik immiaaqqanillu piniartarfinnut toqqaannartumik pisiniartalerput. Taamaammat quersuaqarluni ingerlatsinissaq tunngavissaaruttoq KNI-p nassuiaatigaa. Matusinerni inuit 14-it soraarsinneqarput.

KNI-p Nuummi quersua matuneqartoq talittarfitoqqamiippoq.

Assiliisoq: Oscar Scott Carl

Arnaq Nielsen Arnaq Nielsen tusagassiortoq

Saqqummersinneqarpoq 3. Juuli 2026 - 12:52

Nuuk Imeq 2024-mi matunngikkallarmat pisiniarfiit sodavandinik immiaaqqanillu quersuarnut piniartarnikuupput. Maqitsivilli matummat pissutsit allanngorput.

- Quersuaqarfiit pineqartut pilersinneqarnerannut tunngaviunikut pingaartut ilagaat sodavandinik immiaaqqanillu sinerissamut nassiussuisarneq, tamannalu inatsisit allanngornerisa kinguneranik atorunnaarpoq.

- Maanna pisiniarfiit pisisartullu piniartarfinnut toqqaannartumik piniartalernikuummata taamatut ingerlatsinissaq tunngavissaaruppoq, KNI-mi sulisoqarnermut, attaveqatigiinnermut piujuaannartitsinermilu pisortaq Juliane Henningsen Heilmann taama allappoq.

Ussassaarut

Illoqarfinni pingasuni quersuaqarfiit matuneqarmata sulisunik soraarsitsisoqartariaqalerpoq. Sulisut 14-it soraarsinneqartut KNI-mit ilisimatitsissutigaat. Allanilli matusinissaq pilersaarutaanngitsoq ilanngullugu paasissutissiissutigineqarpoq.