Kuffertimi aningaasarpassuit nassaarineqartut, kaffimik tillinneq aamma Facebook aqqutigalugu peqquserluttut marluk

Kalaallit Nunaanni Politiit ulloq unnuarlu ulapaarsimasut, pigaartut pisortaata Aputsiaq Hansenip pingasunngornermi ullaakkut nalunaarutigaa.

Pisimasut annerit pillugit Nuup mittarfianiit ilanngaaserisut politiinut marlunngornermi nal. 07.14 sianernerat, pigaartut pisortaata siullermik eqqaavaa.

Kufferti Nuummiit Danmarkimut angalasup pigaa, politiillu pilertortumik mittarfimmukarput. Kuffertimik piginnittoq tigusarineqarpoq, aningaasallu arsaarinnissutigineqarlutik.

Pineqartoq aningaasanik peqquserluutinik malunnarunnaarsaasutut unnerluutigineqartoq kingornalu iperagaasoq, Aputsiaq Hansen oqarpoq.

- Aningaasat qanoq amerlatiginersut, misissuinerput pissutigalugu oqaatigisinnaanngilara, taanna oqarpoq.

Nuussuarmi nakuusernerit kaffimillu tillinnerit

Nuummi Nuussuarmi nakuusernerit marluk marlunngornermi ullaap tungaani aamma pisimapput.

Inuk niaqqumigut arlaleriarluni unatarneqartoq nalunaaqutaq 08.52 politiit nalunaarfigineqarput. Politiit piffimmut ornigutsinneqarput nakuusernermullu suliamik aallartitsisoqarluni.

Tamatuma kinguninngua nalunaaqutaq 09.44, politiit illoqarfiup immikkoortortaanit allamik nalunaarfigineqarput. Tamatumuuna vodkap puua puussiamiittoq atorlugu inuk niaquatigut anaalerneqarpoq. Tassani aamma nakuusertoqarsimaneranik suliamik aallartitsisoqartoq, pigaartut pisortaat oqarpoq.

Nuup qeqqani pisiniarfimmi Akikimiit Arabat kaffit, poortukkat 14-it tillinneqarsimasut pillugit nalunaaqutaq 11.42 politiit nalunaarfigineqarput.

- Taama ittunik tuniniaasoqarpat tusarusussavarput, Aputsiaq Hansen oqarpoq

Facebook aqqutigalugu peqquserlunnerit marluk

Inuit marluk Facebook aqqutigalugu pisiassanik peqquserluffigineqarsimasut politiinut marlunngornermi aamma nalunaarutigineqarput.

Pisumi ataatsimi, inuk kavaajamik pisivoq. kavaajaq pisiarineqartoq pisisumut tunniunneqarsimanngilaq. Facebookimilu tuniniaasoq attavigineqarsinnaajunnaarsimavoq.

Pisup aappaani mattammik 6 kiilunik oqimaassusilimmik pisisoq aamma taama nalaataqarpoq. Nalunaaruteqartup mattassiani tigusimanngilaa, tuniniaasorlu inuit nittartakkatigut attaveqaqatigiittarfiini attavigineqarsinnaajunnaarsimalluni.

- Inuit nittartakkatigut attaveqaqatigiittarfii aqqutigalugit pisiniarnermi, tuniniaasup tutsuiginartuunera nalilersorlugulu mianersuutigisariaqarpaat, Aputsiaq Hansen oqarpoq.

Sisimiuni ATV-t tillinneqartut – angerlarsimaffinnilu meerartalinni eqqissiviilliornerit arlallit

Aammattaaq politiit nalunaarutigaat Sisimiuni ATV-nik marlunnik tillinniartoqartoq.

Siulleq marlunngornermi ullaap tungaani nalunaaqutaq 10.56, aappaalu pingasunngornermi nalunaaqutaq 4.31 nalunaarutigineqarput.

Pisumi pingasunngornerup unnuaani nalunaarutigineqartumi, politiit inuk ataaseq tigusaraat, pisorlu suli misissuiffigineqarpoq.

Aputsiaq Hansen nangilluni oqarpoq angerlarsimaffinni meerartalinni eqqissiviilliornernik, politiit arlalinnik suliaqarsimasut. Sulianilu taakkunani politiinit ukkatarinnilluarput.