Local Greenlan takornarialerinermut nersornaaserneqartoq

Takornariaqarnermut suliffeqarfik Local Greenland kujataani pinngortitamut qanittumi takornariartitsinermik ineriartortitsinermut inuiaqatigiit, kulturi tikeraallu sumiiffii ataqqillugit suliniuteqarnera pillugu nersornaammik Greenland Tourism Award 2026-mik tunineqarpoq.

Taama Visit Greenland tusagassiuutinut nalunaarummi allappoq.

Kalaallit Nunaanni takornariartitsisartut nersorniarneranni Local Greenland nersornaammik Kristine Spore Kreutzmannimit ilusilersorneqartumik kiisalu Air Greenlandi aqqutigalugu angalanissamut 10.000 koruuninik nalilimmik tunineqarpoq.

Local Greenland, Freddy Goske Christensenimit aamma Salik Parbst Frederiksenimit pigineqartoq, kujataata ukiup ingerlanerani takornariarfiulluarnerulernissaanik suliniuteqartut ukiuni kingullerni ilagaat. Suliffeqarfik ilaatigut Qaqortumi Nanortalimmilu tammaarsimaartitsisarnermik, ilisimasassarsiortitsinermik, angalanernik sammisassanik neqerooruteqarpoq.

Aammattaaq Qassiarsummi Tasermiullu Kangerluani tammaarsimaartitsisarput, tassanilu takornariat ulluni arlalinni pinngortitamiissinnaapput, nunallu pissusia, kulturi inuiaqatigiillu qanimut misigisinnaallugit.

Piujuartitsineq ukkatarineqartoq

Greenland Tourism Award-imut piukkunnaatillit nalilersorneranni pingaarnertut

isiginiarneqartarput piujuartitsisumik tunisassiornissaq kiisalu isumannaallisaaneq, pitsaassuseq, avatangiisit, nutaaliorneq inuiaqatigiinnilu akisussaassuseqarneq.

Local Greenland piujuartitsinermik suliniuteqartuarpoq nunanilu tamalaani GSTC-mik allagartaqalersimalluni, ilaatigut avatangiisinik mianerinninnermut, akisussaassuseqarluni ingerlatsinermut, pitsaassutsimut, isumannaatsuunermut najukkamilu tunngaveqarluarnermut piumasaqaatinik amgisaqarsimavoq.

Assersuutigalugu suliniut “We Clean - We Care” qulequtaralugu Qaqortumi illoqarfimmi saliinernik aaqqissuussisarpoq. Taamatuttaaq suliffeqarfik inuiaqatigiinni peqataalluarnikkut utoqqaat peqatigiiffiannut angalanernik aammalu suliniutinik allanut ikiuuttarluni.

Suliffeqarfiup sulinera nunani tamalaani aamma nersorniarneqarsimavoq, tassami Tripadvisor Travelers’ Choice Award 2026 pissarsiarisimavaa. Nersornaat taanna suliffeqarfinnut qaffasissumik sullissisartunut aammalu pulaartunit pitsaasunik naliliivigineqartartunut tunniunneqartarpoq.

Greenland Tourism Award Visit Greenlandimit Air Greenlandimiillu tunniunneqartarpoq suliffeqarfinnik akisussaassuseqartumik piviusumillu takornariaqarnermik ineriartortitsisunik aammalu Kalaallit Nunaanni takornariaqarnermi nutaanik maligassanik pilersitsisunik nersuiniarluni.

Nunani avannarlerni angalanermut tunngasunik saqqummersitsinerit annersaraat

Tamatuma saniatigut sapaatip-akunnerani matumani Vestnorden 2026-mi, Visit Greenlandimit aaqqissuunneqartumi, peqataasut 400-nit amerlanerusut katersuupput.

Vestnorden tassaavoq nunani avannarlerni angalanermut tunngasunik saqqummersitsinerit annersaraat, Kalaallit Nunaannilu ukiut sisamat allorlugit ingerlanneqartarpoq.

Suliffeqarfiit nunanit avannarlerneersut 54-init, Savalimmiuneersunit arfineq-marlunnit Islandimiunillu 52-init peqataaffigineqarput. Suliffeqarfiit nunanit avannarlerneersut peqataasarput. Kalaallit nunaanniit 54-it, Savalimmiuneersunit arfineq-marluk Islandimiillu 52-init Vestnordenimut peqataanissamut nalunaarsorsimapput. Matumani aaqqissuussami naapeqatigiinnissaq, nutaanillu attaveqaateqalernissaq aamma suleqatigiinnerup pioreersup ineriartortinneqarnissaa periarfissaasarpoq.

- Suleqatigut nunat avannarliit killiineersut suleqatigisartakkagullu nunanit tamalaaneersut Nuummut tikilluaqqunissaat qilanaaraarput. Vestnorden inuussutissarsiutilinnut naapiffittut pingaarutilittut inissisimavoq, uatsinnulli aamma tassaalluni attaveqaateqarneq, paasinninneq akisussaaffimmillu ataatsimoorussaqarneq. Nunami suliffeqarfiit najukkaniittut misigisassanik takornarissanut eqqaamasassaqqissunik pilersitsisarput – najukkami ilisimasaqassuseq, piorsarsimassuseq oqaluttuallu aallaavigalugit.

- Peqatigisaanik angalatitsisartut suleqatigisartakkallu allat pingaarutilimmik inissisimapput, taakkumi toqqartagaasa sumi takornariartitsinerup naleqarnerulersinneqarsinnaanissaa sunnertarmassuk. Najukkanimi takornarialerisut, najukkani angallassisartut kiisalu misigisassat najukkamut aallaaveqartut angalatitsisartunit toqqarneqaraangata, tamanna najukkani suliffissaqartitsinissamut aammalu najukkami inuiaqatigiinnut iluaqutaasussamik takornariartitsinerup ineriartortinneqarnissaa taperserneqartarpoq, Visit Greenlandimi pisortaq Linda Kleistip taama oqarpoq.

Islandi, Savalimmiut Kalaallit Nunaallu

Vestnorden Visit Greenlandip takornariaqarnermik ineriartortitsinissamut takornariallu amerliartornerat inuiaqatigiinnut iluaqutaalersitsiniarneranut suliniutaanut ilaavoq.

Vestnordenimi kalaallit takornarialerisut Islandimi Savalimmiunilu suleqatitik naapissinnaassavaat, nunallu avannarliit kimmut ilaasut akornanni misilittakkatik avitseqatigiissutigisinnaallugit.

- Kalaallit Nunaat, Island Savalimmiullu akimorlugit periarfissat ajornartorsiutillu amerlasuut ataatsimoorussaraagut. Taamaattumik Vestnorden saqqummersitsiviinnaanngilaq. Nunarsuulli ilaani najugarisatsinni misilittakkanik paarlaasseqatigiiffiuvoq, nutaanik suleqateqalernissamut aqqutaalluni kiisalu qanoq ataatsimoorluta nunatsinni takornariaqarnerup akisussaassuseqartumik ineriartortinnissaa pillugu oqaloqatigiiffiulluni.

- Tassami najukkani takornarialerisut, nunanit tamalaaniit pisiortortartut (buyers) suleqatigisartakkallu maani naapikkaangata, ornitassanik tuniniaanissaq kisiat pineqarneq ajorpoq – takornariaqarnerulli qanoq iluseqartinneqarnissaata ineriartortinneqarnissaa aammalu takornarissat takornariagaanni inunnut najukkamilu inuiaqatigiinnut qanoq naleqalersitsisoqarnissaa eqqartorneqartarput, Linda Kleist oqarpoq.

Vestnorden ulluni marlunni ingerlanneqarpoq. Ataatsimiittoqarlunilu angalanerit arlallit aqqutigalugit Nuuk illoqarfiullu pingaarnersaata eqqaanik misigisaqarnissamut periarfissaqarpoq.