Mersortarfinnik ammaanissaq tapersersorneqartoq

Kommune Qeqertalimmi kommunalbestyrelsimut ilaasortap Inger Jeremiassenip, Demokraatit, siunnersuuteqarnera aallaavigalugu Kommune Qeqertalimmi inuussutissarsiornikkut ineriartortitsinissaq siunertaralugu inoqarfiit ilaanni mersortarfiit puisillu amiinut tunitsiviit pilersinneqarnissaat pillugu misissuinerit aallartinneqassasut kommunalbestyrelsimi amerlanerussuteqartut akuersissutigeqqammerpaat.

Suliniut taanna pitsaasuusoq nunatta ammerivia Great Greenland aamma Sisimiuni Kalaallisuuliornermik Ilinniarfik isumaqarput.

Soqutiginartoq

Kommune Qeqertalimmi pilersaarutit pineqartut pillugit suleqatigiinnissaq siunertaralugu saaffiginnissuteqartoqassappat periarfissat misissorneqarsinnaasut Great Greenlandip pisortaa Aviaja Holm Jensen oqarpoq.

- Suleqataassagutta misissugassat arlaqarput, kisianni tamanna assut soqutiginarpoq, taanna oqarpoq.

Great Greenlandip Qaqortumi puisit amiinik mersortarfia sisamanik sulisoqarpoq ataatsimillu ilinniartoqarluni. Tassani puisit amii qitulisakkat assigiinngitsorpassuit tunisassiarineqartarput, taakkulu nunatsinni Danmarkimilu piumaneqarluarput.

Pisortap oqarnera naapertorlugu mersortarfik ingerlalluarpoq sulisullu suliassaqarluartarput.

Mersortarfiit pisariaqartinneqartut

Aammali puisit amii atorlugit atisaliortartut nunatsinni ikiliartortut Great Greenlandimiit maluginiarneqarpoq.

- Qaqortumi taamaallaat pinnani aammali sinerissami sumiiffinni assigiinngitsuni mersortarfeqarnissaa pingaaruteqarpoq, taamatummi suliaqarneq suliffissaqartitsinermut taamaallaat pinnani, ammerineq pillugu piorsarsimassutsip tammatsaaliorneqarnissaanut aamma attuumassuteqarpoq.

- Taamaattumik mersortarfiit puisit amii atorlugit tunisassiorfiusut amerlanerusut ammarneqarnissaat inissaminiippoq, taakkulu siunissaqarluartut isumaqarpunga, Aviaja Holm Jensen oqarpoq.

Great Greenlandip sinerissami puisit amiinik tigooraavii maannakkut 30-t missaanniipput, nutaanillu ammaasoqarniaraangat ilaatigut kommunit suleqatigineqartarput.

- Puisit amiinik amerlanerpaanik pissarsissagutta amernik tigooraaviit amerlanerusut pisariaqartippagut, Kommune Qeqertalimmilu tigooraavinnik amerlanerusunik ammaasoqassappat tamanna pillugu kommunimik oqaloqateqarnissatsinnut piareersimavugut, taanna erseqqissaavoq.

Kalaallisuunut tunngasut Qaqortumi ammerivimmi suliarineqarneq ajorput, taamaakkaluartoq tamakku pillugit saaffiginnittoqartoqartartoq Aviaja Holm Jensen oqarpoq.

Tapersorsorneqartartoq

Nunatsinni puisit amiinik mersortarfiit ikiliartornerat ilutigalugu amernik mersortartut aamma ikinnerulersimasut Sisimiuni Kalaallisuuliornermik Ilinniarfimmi pisortaq Pilunnguaq Kleist Aronsen oqarpoq.

- Amernik mersortarnerup tammatsaalineqarnissaa siunertaralugu Kalaallisuuliornermik Ilinniarfik pilersinneqarnikuuvoq, maannakkullu soqutigineqarnera annertusiartortoq malunnarpoq.

- Sisimiuni Kalaallisuuliornermik Ilinniarfimmi naammassisimasut kiisalu ilinniarfimmut attuumassuteqanngikkaluarlutik ammerinermut piginnaaneqarluartut sinerissami amernik mersortarfiit amerlanerusut pilersinneqarpata suliffissaannik pilersitsisoqassaaq.

- Taamaattumik Kommune Qeqertalimmi mersortarfinnik puisillu amiinut tunitsivinnik amerlanerusunik ammaasoqarnissaa pillugu suliniuteqarneq tapersersorparput, taanna oqarpoq.

Suleqatigiinnissaq siunertaralugu Kommune Qeqertalimmiit saaffiginnittoqassappat periarfissat misissorneqarsinnaasut Pilunnguaq Kleist Aronsen erseqqissaavoq.

Kalaallisuuliornermik Ilinniarfik maannakkut sisamanik ilinniartoqarpoq.

Great Greenlandip kiisalu Kalaallisuuliornermik Ilinniarfiup Kommune Qeqertalimmi amernik mersortarfinnik pilersitsinissamik suliniummut soqutiginninnerat Inger Jeremiassen nuannaarutigaa pineqartullu piffissami aggersumi suleqatigiinnissaq siunertaralugu saaffigineqarnissaat pissusissamissasoq taassuma ilanngullugu oqaatigaa.