Nuummi oqalliffik ataatsimiititsivoq: Kommune aamma inuussutissarsiortut qaninnerusumik suleqatigiilerput
Kommuneqarfik Sermersuup aaqqiissuussaanni Nuummi oqalliffimmi inuussutissarsiortut ataatsimoortinneqarput, tassanilu siunissami inuussutissarsiutissanik pilersaaruteqartoqarpoq.
Ataatsimiinnermi attaveqaatit niuernermik siuarsaasinnaasut pillugit isumassarsiat oqaluuserineqarput.
Assi: Kommuneqarfik Sermersooq
Nuummi Oqalliffik
Nuummi Oqalliffik tassaavoq inuussutissarsiortut kommunillu oqaloqatigiittarfiat aalajangersimasoq, tassanilu makku oqallisigineqartarput:
- Inuussutissarsiornermik ineriartortitsineq
- Suleqatigiinneq
- Aaqqiissutissanik ataatsimoorussineq
Suliffeqarfiit inuussutissarsiortullu Nuumi Oqalliffimmi peqataarusuttut immikkoortortami pisortaq Salik Damgaard allaffigisinnaavaat: slkd@sermersooq.gl
Ataatsimiinneq Nuummi Katuami ingerlanneqarpoq, tassanilu inuussutissarsiornermi aqutsisut 65-init amerlanerusut najuupput. Nuummi oqalliffiup kommunip inuussutissarsiortullu akornanni pitsaanerusumik oqaloqatigiinnermik pilersitsinissaq siunertaraa.
Ataatsimiinnermi ataatsimoorluni suliniuteqarluni aallartittoqarnissaa, Nuummi inuussutissarsiornikkut ineriartortitsineq qanoq pilersaarusiornerusinnaanersoq, suliffeqarfiit kommunillu qanimut suleqatiginissaat qulakkeerniarlugu aamma siunissaq ungasinnerusoq eqqarsaatigalugu piujuartitsisumillu pilersaarusiortoqarsinnaanersoq ilaatigut siunertaavoq.
- Pingaaruteqarpoq uagut inuussutissarsiortunik qanimut ammasumillu oqaloqateqartarnissarput, siunissami Nuummi nunaminertanik inuussutissarsiorfinnik pilersaarusiuleraangatta. Eqqortunik aalajangiisarsinnaasaqqulluta inuussutissarsiortunit nutaanik saqqummiussiffigineqartarnissarput pisariaqarpoq taamaalilluta aaqqiissutinik piviusorsiortunik aamma imminut napatissinnaasunik pilersitsisinnaaqqulluta, Kommuneqarfik Sermersuumi pilersaarusiornermut oqartussaaffeqarfimmullu pisortaq Runa Sværd oqarpoq.
Siunissami pisariaqartitat eqqartorneqarput
Kommuneqarfik Sermersuumi borgmesterip Avaaraq Olsenip (IA) ataatsimiinnermi peqataasut tikilluaqquai, tamatumalu kingorna kommunip inuussutissarsiornermut atorneqartussat pillugit killiffik aamma ilaatigut pilersaarusiornermut, piginnittuunermut attaveqaqatigiinnermullu malittarisassat sinaakkutissallu saqqummiuppai.
Niuernermik inuussutissarsiuteqartut siuttuisa ataatsimiinneranni oqaloqatigiinneq.
Assi: Kommuneqarfik Sermersooq
Peqataasut suliffeqarfiit suussusaat aallaavigalugit eqimattanut agguarlutik suliaqarput. Suliffeqarfiit assigiinngitsut unammilligassaat siunissamilu pisariaqartitat, soorlu inuussutissarsiorfiit sumi inissisimanissaat, angallannermut periarfissat, attaveqaatit taamalu aamma malittarisassat piumasaqaatillu pillugit oqallipput. Naggataatigut pingaarnersat katersorneqarput tamanullu saqqummiunneqarlutik.
Siunnersuinermik ingerlatsivik Rambøll kommunilu peqatigiillutik Nuummi siunissami inuussutissarsiorfiusinnaasut pillugit ataatsimut pilersaarusiussapput.
