Pisortaanerup soraarsitaanera 7 millionit koruuninik akeqarpoq

Susanne Arfelt Rajamand Royal Greenlandimi pisortaanertut siorna soraarsitaavoq, tamannalu aalisarnermik suliffeqarfissuarmut 6,8 millionit koruuninik soraarnermi ajunngitsorsiassanut aningaasartuutigineqarpoq. Taakku saniatigut 2025-mi qaammatini marlunni atorfeqarnermini 1,1 millionit koruuninik aalajangersimasumik akissarsiaqarpoq.

Tamanna Royal Greenlandip 2025-mut ukiumoortumik nalunaarusiaani qullersat akissarsiaannut tunngasuni takuneqarsinnaavoq. 

Susanne Arfelt Rajamand Royal Greenlandimi ukiuni marlunni pisortaaneroreerluni 2025-mi februaarip aallaqqaataanni suliunnaarpoq, tamannalu pilluni Royal Greenlandimi ukiuni marlussunni pisortaaneroreerluni.

- Susanne Arfelt Rajamandip soraarnermini ajunngitsorsiassai atorfinitsinneqarnerani isumaqatigiissutigineqartut naapertorlugit tunniunneqarput, soraarneranilu tunniunneqartut ukiumi ataatsimi aningaasarsiarisartagai amerlaqatigalugit. Royal Greenland isumaqatigiissummi pisussaaffilerneqarsimavoq piumasaqaatinik taakkuninnga eqqortitsinissaminik. Ukiumoortumik nalunaarusiami aningaasat saqqummiunneqartut aamma Svenskit sulisitsisut inatsisitigut piumasarineqartut naapertorlugit 31,42 procentinik tapiissuteqartussaanerat malinneqarluni, taamaattumillu aningaasat taassuma nammineq pissarsiarisimasaanut ilaanngillat, Royal Greenlandip siulersuisuini siulittaasoq Niels Thomsen Sermitsiamut oqarpoq. 

Susanne Arfelt Rajamandimut taartaagallartoq Preben Sunke pisortaanertut atorfeqarallarnermini 2 millionit koruuninik akissarsiaqarpoq.

Toke Binzerip Royal Greenlandimi pisortaanertut siorna novembarip aallaqqaataanni atorfinitsinneqarnerata tungaanut pisortaaneruvoq.

- Royal Greenland immikkut ittumik suliassaqarpoq. Isumalluutit killeqartut pissarsiarisinnaasavut sapinngisamik pitsaanerpaamik atortariaqarpavut, suliffeqarfik nukittooq unammillersinnaassuseqarluartorlu ingerlatissallugu, tamatumalu saniatigut Nunatsinni inuiaqatigiinnut pisussaaffivut naammassisussaallugit.  Suliffeqarfiup ineriartornera angusaalu naammaginanngimmata, taamaattumillu aqutsisunik taarsersuisoqartariaqartoq, siulersuisut nalilerpaat. Pisariaqartinneqartumik taama aalajangiisoqartariaqarsimavoq. Tamatuma kingorna Toke Binzer pisortaanertut nutaatut atorfinitsipparput, tamatumalu kingorna ineriartornerup takusatta uppernarsarpaat eqqortumik aalajangiisimasugut, Niels Thomsen oqarpoq. 

Toke Binzer pisortaanertut siorna novembarimi decembarimilu, tassa qaammatini marlunni, 400.000 koruunit missaannik aalajangersimasumik akissarsiaqarpoq.

Sulisunik aqutsisoq Bodil Marie Damgaard aalajangersimasumik siorna 2,2 millionit koruuninik akissarsiaqarlunilu ajunngitsorsiassaqartinneqarpoq. 

Royal Greenlandip pisortaanera nutaaq, Toke Binzer, qaammatip kingulliup aallartinnerani aalajangerpoq aningaasaqarnermut pisortaq Jan H. Lynge-Pedersen aalisarnermik suliffissuaqarfimmi aqutsisunit tunuartinneqassasoq. Tunuartinneqarnera soraarsitsinertut isigineqarpoq. 

Pisortaqarfinni pisortat akeqanngitsumik biileqarlutillu oqarasuaateqarput interneteqarlutillu

Ingerlatseqatigiiffimmi aningaasaqarnermut pisortaq tuniniaanermut pisortaq Robert-Jan Treebus peqatigalugu aggustip naanerani soraarput, taanna suliffissuaqarfimmi siulersuisuni ilaasortaavoq aqutsisunut ilaanngikkaluarluni.

2025-mut ukiumoortumik nalunaarusiami atuarneqarsinnaasutut Jan H. Lynge-Pedersen siorna 2,5 millionit koruuninik aningaasarsisimavoq, taakkunannga 2,3 million koruunit aalajangersimasumik akissarsiaralugit sinnerilu bonusitut.

Tuniniaanermut pisortap Robert-Jan Treebusip akissarsiai 2025-mut naatsorsuutini allassimaneq ajorput. 

Naatsorsuutit naapertorlugit pisortat aalajangersimasumik akissarsiaqarnermik saniatigut angusaqarluarnertik naapertorlugu bonusisinneqartarput. Tamatuma saniatigut pisortat akeqanngitsumik biileqarput, oqarasuaateqarlutik, interneteqarlutillu aamma aviisinik pisartagaqarlutik. 

“2025-mi soraartoqarneranut atatillugu, Susanne Arfelt Rajamandip soraarneranut ajunngitsorsiassaasa saniatigut ajunngitsorsiassat aappaat tassaalluni Lars Nielsenip soraarneranut atatillugu ajunngitsorsiassaqartinneqarnera. 

Aamma:

”2024-mi suliunnaartunut atatillugu ajunngitsorsiaqartinneqartut allat tassaallutik, Nils Duus Kinnerup aamma Lars Nielsen”, Royal Greenland qullersaqarfimmi akissarsianut tunngasunik 2025-mi naatsorsuutimini taama allappoq.    

Nils Kinnerup soraarnermini 8,5 millionit koruuninik ajunngitsorsiaqartoq  

Lars Nielsen ukiuni 18-ini tunisassiornermi pisortaareerluni siorna marsimi soraarpoq. Suliunnaarnermini 1,3 millionit koruuninik ajunngitsorsitinneqarpoq. 

Jan H. Lynge-Pedersen aningaasaqarnermut pisortatut siorna marsip aallaqqaataanni atorfinitsinneqarpoq. Tamannalu pilluni Niels Duus Kinnerup Royal Greenlandimi ukiuni 17-ini aningaasaqarnermik aqutsisooreerluni januaarip aallaqqaataanni 2025-mi tunuareersorlu. 

Nils Duus Kinnerup 2024-mi katillugit 8,5 millionit koruuninik ajunngitsorsitinneqarpoq, taakkunannga 5,4 millionit koruunit soraarnermini ajunngitsorsiaralugit.

Susanne Arfelt Rajamand 2024-mi 1,1 millionit koruuninik aamma 2025-mi 6,7 millionit koruuninik akissarsiaqartinneqarpoq. 

Royal Greenlandimi qullersaqarfik 2024-mi katillugit 25 millionit koruuninik ajunngitsorsiaqarsimagaluartut, 2025-mi katillugit 16,8 millionit koruuninik ajunngitsorsitinneqarsimapput.