Qaqortumi kilisaat nutaaq

Kilisaat nutaaq Bingo 4 Qaqortumi nalunaarsorneqarsimasoq avannamut ingerlaarpoq itisuumi raajarniariartorluni.

– Avannaani sumi tamani raajarniarniarpugut, 12 sømilit killeqarfiata iluani avataanilu, Tonny Rosendahl Johansen oqarpoq. Taanna angunnilu Torben Rosendahl Johansen suliffeqarfimmik piginnittuupput, maannalu kilisaat nutaaq Bingo 4 raajarniarluni aallartissalluni.

Bingo 4 tallimanngormat septembarip aqqarnganni Qaqortumut tikippoq, Tonny Rosendahlip arnaataata Pipaluk Andreassenip atserpaa.

Kilisaat 28 meterisut takitigisoq Hvide Sandemi Vestværftetimi sananeqarpoq, timitaalu Polenimi umiarsualiorfimmi sananeqarluni.

Tonny aamma Torben Rosendahl Johansenip, kilisaammilu inuttat marluk kilisaat Hvide Sande-mit Qaqortumukaappaat.  

 Kilisaat atortuilu 75 millionit koruunit missaannik akeqarpoq.

Aalisarneq aallartippat inuttat tallimaassapput, Tonny Rosendahl Johansen umiarsuarmi naalagaallunilu maskiinalerisuussalluni. Taassuma saniatigut aquttoqassaaq qaamiunillu pingasunik inuttaqassalluni.

Kilisaat tunisassiorfeqanngilaq, aalisakkanilli immikkoortiteruteqarluni. Aalisartut kaarersuit raajanik sikulersukkanik immertassavaat. Ilulissani Royal Greenland tunitsivigissavaat, tassanilu raajanik uussimasunik qalipaajakkanik tunisassiortoqartarluni. Bingo 4 raajanik sikulersukkanik ullut unnuallu tallimat qaangiukkaangata suliffissuarmut tunisisassaaq.

Bingo 4 Ilulissani raajaleriffimmit kaarersuarnik raajanik immerneqartussanik maannakkorpiaq aallerpoq. Tamatumalu kingorna kilisakkiartussalluni.

Pisassiissutit ikippallaartut

Tonny Rosendahl Johansenip oqaatigaa raajartassiissutigineqartut naammagisimaarnagit, ikiliartortinneqarmata, naak pisarisartakkatik amerliartuinnaraluartut.

– Uatsinnut pisassiissutigineqartut naammaginartinngilavut, ukiummi tamaasa ikiliartortinneqaramik, naak ukiuni arlalinni pisaqarnerujartuinnarnikuugaluarluta. Oqaatigereriikkattut Bingo3-mik apriilimit decembarimut raajarniarnitsinni raajat sikulersukkat 1500/1600 tonsit tulaassoreerpavut.  

Bingo3 2025-mi 1.500 tonsinik pisaqarpoq, pisassiissutigineqartullu 97 procentii pisaralugit.

Qanoq iliortoqartariaqarsoraajuk?

- Politikerit uumassusilerisut raajarniarfissanik nutaanik nassaarniarlutik misileraanissaannut aningaasaliisariaqarput, raajammi silap pissusiata allanngoriartorneranut naapertuuttumik nuuttarmata.

– Soorlulusooq uumassusilerisut ukiut tamaasa sumiiffinni taakkuinnaanerusuni aalajangersimasuni misissuisartut. Ukiut qulit matuma siornatigut sumiiffinni maannakkut misissuiffigisaminni raajarniarfiunngitsuni misissuisarput. Tamatuma takutippaa raajat nuuttartut. Taamaattumik siunnersuutigaara, politikerit sumiiffinnut nutaanut raajanik misileraaffissanut aningaasaliissasut, Tonny Rosendahl Johansen oqarpoq.

- Pisassiissutit naammagisimaarinngilavut, ukiut tamaasa ikiliartuinnarmata, ukiuni arlalinni amerlanerujartuinnartunik aalisarsinnaagaluarluta. Soorlu oqaatigereeripput, Bingo 3 atorlugu apriilimit decembarimut aalisarsimavugut, taamaalilluta raajat sermersimasut 1500-1600 tonsit missaanniittut aalisarlugit.

Tunuliaqutaasut

Torben Rosendahl Johansenip angallammik qisummik Bingo 1-imik saarullinniarneq 1977-imi aallartippaa.

Kingusinnerusukkut 1980-imi kutterimit Bingo 2-mit taarserneqarpoq, taannalu aallaqqaammut bundgarninik saarullinniarluni, 1983-imilu raajarniarnermut atortulersuutinik nutaanik atortulersorneqarluni.   

Bingo 2 Qaqortup umiarsualiviani 1998-imi kivivoq. Torben Rosendahl Johansen Danmarkiliarpoq Hvide Sandimilu Vestværftemi Bingo 3 sanatillugu. Taanna aasakkut 2000-imi naammassineqarpoq, kingornalu angallat Qaqortumukaappaa.

Ilaqutariit Bingo 3-mik ukiuni 25-ni aalisarsimapput. Tonny Rosendahl Johansen 2014-imi aalisarnermut ilannguppoq, 20-nik ukioqarluni Skagen Skipperskolemi aalisarnermi naalakkatut ilinniareerluni. 16-inik ukioqarluni Thyborønimi aalisarnermik ilinniarfimmi aallartippoq.

– Bingo 3-mi naalakkatut aallartippunga, ukiunilu kingullerni aqqaneq-marlunni ukiut tamaasa apriilimit decembarimut aalisartarlunga. Ukiuni arfineq-marlunni Bingo 3-mi naalagaanereerlunga piginneqataalerpunga. Suliffeqarfik pilersipparput ukioq manna januaarip aallaqqaataannit Bingo IV TRJ Trawl I/S-imik taaguuteqalersoq, taannalu aamma raajartassissutinik piginnittuulluni, Tonny Rosendahl Johansen oqaluttuarpoq.

Avannaa Fisheriesip Bingo 3 pisiaraa Mayamillu atserlugu. Avannaa Fisheriesip saarullinniarnermut atorpaa, Mayalu Royal Greenlandip Nuummi tunisassiorfianut tunisisarluni.