Qaqortumi umiarsuaatileqatigiiffik aatsaat taama angusarissaartigisoq

– Arctic Prime Fisheriesimi 2025-mut naatsorsuutit naammaginartut saqqummiussinnaagatsigit nuannaarutigaarput. Suliffeqarfimmi sulisut tamarmik siuariartornermut angusaqarluarnermullu suleqataapput, taamaammallu sulisuvut tamaasa qutsavigaavut.

Kujataani aalisarnermik ingerlatsivimmi Arctic Prime Coastalimi siulersuisuni siulittaasoq Hentzar Petersen Sermitsiamut siorna angusarissaarneq pillugu oqarpoq.

Ingerlatseqatigiiffik oqaluttuarisaanermi aatsaat taama angusarissaartigaaq.

Sinneqartoorutit 61 millionit koruunit

Qaqortumi suliffeqarfissuaq umiarsuarmik tunisassiorfimmik "Tasermiut"-imik pigisalik, Nanortalimmi, Qaqortumi Kuummiunilu tunisassiorfinnik pingasunik pigisaqartoq siorna 214 millionit koruuninik isertitaqarpoq, ingerlatsinermilu 110 millionit koruunit missaanniittunik sinneqartooruteqarluni.

2025-mi sinneqartoorut 61 millionit anguneqarput, 2024-milu amigartoorutit 12 millionit koruuniullutik.

Ingerlatseqatigiiffiup suliffeqarfiutaa umiarsuaatileqatigiiffik Arctic Prime Fisheries, aalisarpoq, aalisakkallu tunisassiarineqarnerannik suliaqarfiusoq 2025-mi 350 millionit koruunit sinnilaarlugit kaaviiaartitaqarpoq, akileraarutillu ilanngaatigereerlugit 61 millionit koruuninik sinneqartooruteqarluni. Umiarsuaatileqatigiiffik taamaalilluni aatsaat taama angusarissaartigaaq.

Saarulliit 8.500 tonsit aalisarneqartut

Qaqortumi umiarsuaatileqatigiiffik ilaatigut Dohrn Bankemi Tunullu Kujataani Tasermiut avataani saarullinniarpoq. Saarulliit katillugit 8.500 tonsit pisaapput, aningaasarsiorluaataallutillu.

Siorna saarulliit aatsaat taama akisutiginerat suliffeqarfiup aatsaat taama angusarissaartigineranuq qulakkeerinnipput.

– Suliatta ilaat iluatsitsisimavugut, saarulliillu akii qaffakkiartorput, umiarsuarpullu suliffissuavullu ingerlalluarlutik, Hentzar Petersen oqarpoq.

Suliffeqarfimmi siulittaasuunermi saniatigut Arctic Prime Fisheriesimi pisortaavoq ulluinnarnilu aqutsisuulluni. Hentzar Petersenip suliffeqarfiup pingajorarterutai pigai, sinnerilu Islandimi aalisarnermik inuussutissarsiuteqartup Gudmundur Kristjánssonip ingerlatseqatigiiffianit Linuskipimit pigineqarlutik.

Aningaasat millionikkaat aningaasaliinernut atorneqartut

Hentzar Petersenip ernianut akiliutit appariartornerat, kaaviiaartitaqarnerulerneq iluanaarutinillu annertusiineq angusaqarluarnermut pissutaasut oqaatigaa.

– Tunisassiorfivut angallativullu tamarmik, avataasiorluni aalisarnermi nunamilu tunisassiornermi, suliffeqarfissuup angusaanut sunniuteqarluarput.

– Tasermiuni tunisassiorfiit nutarterneqarnerannut, Kuummiuni Qaqortumilu tunisassiorfiit qerititsiviisa annertusarneqarnerannut aningaasarpassuit atorneqarput. Aningaasat katillugit millionikkaanik marlunnik kisitsisitaqarput.

Arctic Prime Fisheries Tasermiuni tunisassiorfinnilu 110-t missaannik 2025-mi sulisoqarpoq. Tunisassiorfinni nunaqavissut 60-70 missaanniittut sulipput.

Aalisartut 60-it missaanniittut Kuummiuni tunisassiorfimmut tunisipput, aalisartullu 50-it missaanniittut Qaqortumi Nanortalimmilu tunisassiorfinnut tunisisarlutik.

Ingerlanerliornikoq

Arctic Prime Fisheries 2000-ikkut qiteqqunneranni pilersinneqaramili aningaasatigut ajornartorsiuteqarpoq. Suliffeqarfik, 2022 kisiat pinnagu, ukiorpassuarni amigartooruteqartarpoq. Eqqaaneqareersutut 2025-mi aatsaat taama angusarissaartoqartigaluni, akileraarutit ilanngaatigereerlugit 61 millionit koruuninik sinneqartootueqartoqarpoq.

Suliffeqarfissuup Arctic Prime Coastalip ernianut aningaasartuutit 2024-mi 48 millionit koruuniniit 2025-mi 25 millionit koruuninut appartissimanerat maluginiagassaavoq.

Suliffeqarfissuarmi suliffeqarfissuullu pigisaani Arctic Prime Fisheries-imi nammineq aningaasaatit suli annaasaqarfiupput. 2024-mi 228 millionit koruuninik amigartooruteqarsimapput, 2025-milu 166 millionit koruuninik amigartooruteqarluni.

– Nammineq aningaasaatit aaqqikkiartornissaat naatsorsuutaavoq, Arctic Prime Fisheries naatsorsuutini allappoq.

APF-illi nammineq aningaasaatit qaqugu sinneqartooruteqalernissaat naatsorsuutigineqartoq allanngilaa.

– Aningaasaliisarneq eqqarsaatigalugu Arctic Prime Fisheries suliffeqarfiit allat assigalugit aningaasalersorneqarpoq, tassa aningaaserivinnit aningaasaliiffigineqarluni. Ingerlatseqatigiiffiup patajaallisarnissaa maanna aallutissavarput, siunissamilu qanoq pisoqarnera paasinarsiumaarluni, Hentzar Petersen oqarpoq.

Arctic Prime Fisheriesip 2025-misut angusaqarnissani ukioq manna naatsorsuutigaa.