Qeqertarsuup nunataani aatsitassanik misissueqqaarneq aallartittoq 

Ingerlatseqatigiiffik 80 Mile, suliffeqarfiutini Disko Exploration Ltd, aqqutigalugu Qeqertarsuup nunataani aammalu Nuussuarmi aatsitassanik misissueqqaarluni qillerilluni maanna aallartippoq. Ingerlatseqatigiiffik nalunaarummini allappoq.

Aatsitassat misissorneqartussat tassaapput nikkeli, kanngussak aamma kobolti. Ingerlatseqatigiiffik sumiiffimmi misissueqqaarnissaminut akuersissummik Naalakkersuisunit tunineqarnikuuvoq.

AAMMA ATUARUK:

Amerikamiu tusaamasaq Qeqertarsuarmi aatsitassarsiornissamut aningaasaliisoq

Ingerlatseqatigiiffik nalunaarummini ilaatigut aamma allappoq misissueqqaarneq Qullissat eqqaanni aallartinneqassasoq. Tassa imaappoq, aasap ingerlanerani qillerineq Qullissat eqqaanni pissaaq. Tamannalu pereerpat Qeqertarsuup avannamut kangianut Nuussuullu avannaatungaanut qilleriartortoqassasoq, ingerlatseqatigiiffik allappoq. Ukioq manna misissuinissami 9.000 meterisut takitigisumi qillerinissarnissaq ingerlatseqatigiiffiup pilersaarutigaa.

Misissueqqaarluni qillerinerup aallartinnera ingerlatseqatigiiffiup pisortaata pingaarutilittut nalilerpaa.

- Qillerinerup aallartinnera Qeqertarsuarmi suliniummut angusaavoq pingaarutilik, Roderick McIllree oqarpoq.

Nunaqavissunik sulisoqarusuttut

Qillerineq ingerlatseqatigiiffimmit USFM Corporationimit aningaasalersorneqarpoq, taanna aatsitassarsiornermut aningaasaliisartumit ilisimaneqarluartumit Robert Pricemit, aamma aatsitassarsioqatigiiffimmik Greenland Energy Company-mik Nunap Qeqqani, (Jameson Land, aaqq.) uuliasiorluni misissuineq pillugu 80 Milemik suleqateqareersumit, pilersinneqarlunilu aqunneqarpoq.

Canadamiut qilleriviutaat Forage Fusion Drilling qillerinernik ingerlatsisussatut toqqarneqarsimasoq 80 Mile siusinnerusukkut nalunaarpoq, tuluillu suliffeqarfiutaat SRK Exploration ujarassiuutut aqutsisutut toqqarneqarpoq. Tamatuma saniatigut Air Greenland assartuinermi suliassanut attartorfigineqarpoq.

Nunaqavissut sulisorinissaat pisariaqartilluinnarneqassasoq, periarfissaqarpallu taakkuninnga atorfinitsitsinissaq pingaarnerpaatinneqassasoq 80 Mile siusinnerusukkut aamma allappoq.