Royal Greenland A/S-ip aalisariutini aquttuusut inuttallu allat aalisarnermi malittarisassat maleruarnissaat arlaleriarluni isumaginngitsoortarsimavaa. Taamaammat ingerlatseqatigiiffik 135.000 koruuninik akiliisussanngortinneqarpoq.
Tamanna Nunatta Eqqartuussiviani marsip 18-ianni eqqartuussummi atuarneqarsinnaavoq. Royal Greenland Kalaallit Nunaata Eqqartuussiveqarfiani 2025-mi februaarimi eqqartuussutaasoq suliareqqitassanngortissimavaa.
Royal Greenland A/S-ip aalisariutini aquttuusut inuttallu allat aalisarnermi malittarisassat maleruarnissaat arlaleriarluni isumaginngitsoortarsimavaa. Taamaammat ingerlatseqatigiiffik 135.000 koruuninik akiliisussanngortinneqarpoq.
Tamanna Nunatta Eqqartuussiviani marsip 18-ianni eqqartuussummi atuarneqarsinnaavoq. Royal Greenland Kalaallit Nunaata Eqqartuussiveqarfiani 2025-mi februaarimi eqqartuussutaasoq suliareqqitassanngortissimavaa.
Royal Greenland ukiuni kingullerni marlunni inuttaminik Kalaallit Nunaanni najugaqartuunngitsunik aalisariartitsisarsimanera pillugu eqqartuunneqarsimavoq. Tamanna 2022-miit 2024-mut aalisariarnerni assigiinngitsuni 23-ni pivoq.
Royal Greenland aalisariutini assigiinngitsuni pingasuni piffissap ilaani inuttat minnerpaamik 60 procentit najugaqarsinnaatitaanermut piumasaqaatinik eqqortitsinnginnini pillugu aammattaaq eqqartuunneqarsimavoq.
INUTTASSARSIUUSSINERMUT MALITTARISASSAT
Angallatit kalaallinit pigineqarpat angallatillu usitussutsimik allagartaa malillugu 24 meterinit tamakkiisumik angineruppat, angallatip inuttalersornera pillugu immikkut piumasaqaateqarmat eqqumaffigissavat.
Tassani atuupput:
Angallammi aqumiut minnerpaamik 60 %-ii Kalaallit Nunaanni najugaqartutut inuit nalunaarsorsimaffianni nalunaarsorsimassasut, Kalaallit Nunaannilu inuit aqqisa nalunaarsorsimaffianni qaammatisiutit ukiuini kingullerni marlunni nalunaarsorsimassallutik. Inuit pineqartut tamarmik Kalaallit Nunaannut tamakkiisumik akileraartartussaatitaassapput, qaammatisiutillu ukiuini kingullerni marlunni Kalaallit Nunaanni tamakkiisumik akileraartartussaatitaasimassallutik.
Inuttaasunut ilaasut sinneri tamarmik Kalaallit Nunaanni najugaqartutut inuit nalunaarsorsimaffianni nalunaarsorsimassasut, Kalaallit Nunaannilu inuit aqqisa nalunaarsorsimaffianni qaammatisiutit ukiuini kingullerni marlunni nalunaarsorsimasimassallutik.Inuit pineqartut tamarmik Kalaallit Nunaannut tamakkiisumik akileraartartussaatitaassapput, qaammatisiutillu ukiuini kingullerni marlunni Kalaallit Nunaanni tamakkiisumik akileraartartussaatitaasimassallutik.
Teknikerini sulisut maskinalerinermik, maskinmesteritut allanilu aserfallatsaaliuinermik suliaqartut najugaqarnissamut akileraartarnissamullu piumasaqaateqanngilaq.
Najoqqutaq: KANUAPNA, Kalaallit Nunaanni Aalisarnermut Piniarnermullu Nakkutilliisoqarfik
Nunatta Eqqartuussivianili eqqartuussut Kalaallit Nunaanni Eqqartuussivimmit 2025-mi suliareqqitassanngortitamit sakkukinneruvoq.
Nunatta Eqqartuussiviata Royal Greenland umiarsuarmi naalakkat pillugit pissutsit ilaanni ataatsimi pinngitsuutippaa. Aamma unioqqutitsinerit ilaat akiligassiissutigineqassanngitsut aalajangerpoq. Taamaammat akiligassiissut 165.000 koruuniniit 135.000 koruuninut annikillisinneqarpoq.
RG: Malittarisassat paatsuunganarput
Andrias Olsen, Royal Greenlandimi kilisaateqarfimmi pisortaq, Sermitsiamut ima oqaaseqarpoq:
– Eqqartuussineq tusaatissatut tiguarput. Akiligassap annikillisinneqarnissaa uagutsinnut pingaaruteqarpoq, suliarlu inatsisit iliuutsillu pillugit paatsiveerusimaarnermut tunngassuteqarluinnarpoq. Maannakkut erseqqinnerusoq misigaarput, tamannalu suliffeqarfinnut tamanut iluaqutaavoq.
– Royal Greenlandimi piffissap ingerlanerani nunaqavissunik sulisussarsiorneq nukittorsarniarlugu inuttatsinnik ilinniartitsinissaq ineriartortitsinissaallu pingaartittuarparput, Andrias Olsen oqarpoq.
Inuttat piumasaqaatinik eqqortitsinngitsut ilaat Danmarkimi Savalimmiuniluunniit najugaqarput, imaluunniit „nunamit allamut nuussimasutut“ nalunaarsorneqarsimapput.
Allat ima allassimasumik nalunaarsorneqarsimallutilluunniit siornatigut nalunaarsorneqarsimagaluarput: "Inuit nalunaarsorsimaffiat 3, Sisimiut“ imaluunniit "Nuuk, ilisimaneqanngilaq“.
Aalisartut najugaqarfitsik pillugu paasissutissaateqanngitsut 2023-mi aggustip aallaqqaataaniilli allagartamik uppernarsaatissamik, ukiut kingulliit marluk ingerlaneranni Kalaallit Nunaanni najugaqarsimanermik uppernarsaammik, tunniussisinnaanikuupput.
Siorna suliami Kalaallit Nunaanni Eqqartuussiviup aalajangiinera Sermitsiamit allaaserineqarsimanngilaq. Taamanikkut eqqartuussinerup eqqartuussutaasullu ilisimasimannginnerat tamatumunnga peqqutaavoq. Kalaallit Nunaata Eqqartuussiveqarfianit nalunaarsorsimaffinnik takunnissinnaatitaanngilagut.
