Royal Greenland Kujataani inerisaassassoq

Kujataani aalisarnermik inuussutissarsiuteqarneq Avannaani aalisarnermik inuussutissarsiuteqarnermut naleqqiullugu, annertuumik kinguussaasimasoq, tamannalu iliuuseqarfiginiarlugu suliniutit assigiinngitsut aallartinneqartariaqartut, KNAPK aamma Kujataani aalisartut piniartullu peqatigiiffiisa ukiuni kingullerni arlalinni oqariartuutigisarpaat.

Royal Greenlandimiit aamma KNAPK-miit aallartitat aggustimi Kujataani angalaqqammerput. Royal Greenlandillu Kujataani aalisarnikkut tunitsiveqarnikkullu inerisaanissaq piffissami tulliuttumi ukkatarissagaa suliffeqarfimmi Ingerlatsinermut Pisortaq Sten Sørensen oqarpoq.

Tamannalu KNAPK-miit aalisartuniillu nuannaarutigineqarpoq.  

Royal Greenland Narsami Aappilattumilu tunitsiveqarpoq.

Aalisarneq killilersorneqartoq

Kalaallit Nunaanni nunaqarfiit kujasinnersaanni Aappilattumi, 80-it missaannik inoqartumi, Royal Greenlandip tunitsiviani qerititsivik 70 tonsinik imaqarsinnaallunilu ullormut aalisakkat 4 tonsit tunisassiarineqarsinnaapput.

Tunitsivik tallimanik sulisoqarpoq, tassanilu saarulliit, qalerallit, suluppaakkat qeeqqallu tunisaapput. Qaleralik kiilumut 25 koruuneqarpoq, saarullillu 20,71 koruuneqarluni.

Aappilattumi aalisartut piniartullu peqatigiiffiannut ilaasortat 15-it missaanniipput. Taakkunanngalu tallimat missaat kisimik aalisartut nunaqarfimmi aalisartut piniartullu peqatigiiffianni siulittaasoq Marius Levisen oqarpoq.

- Ilaasortatta amerlanersaasa annerusumik puisinniarneq kisiat ingerlappaat, aammali ilai utoqqalilernertik peqqutigalugu angalavallaarunnaarnikuupput.

- Inuusuttut nunaqarfimmut utertartut amerliartorput, taakkuli aalisarnermut allagartamik pissarsiniarnerat sivisusinnaasarmat, inuusuttut amerlanngitsuinnaat aalisarput.

- Tunisinermi akigitinneqartut naammagisimaarpagut, nunaqarfiullu eqqaani aalisagaqarluarmat aalisarneq imminut akilerluarsinnaavoq, taanna oqarpoq.

Kisiannili Aappilattumi tunitsiviup aalisakkat tigusinnaasai amerlanerusuuppata, aalisarneq maannakkorniit annertunerujussuarmik ingerlasinnaagaluartoq, aalisartut piniartullu peqatigiiffianit erseqqissaatigineqarpoq.

- Aappilattup eqqaani aalisagaqarluaraluartoq tunitsiviup ullormut tigusinnaasaasa killeqarpallaarnerat pissutaalluni ningittagarsorneq kisimi ingerlanneqarpoq.

- Tunitsiviullu tigusinnaasai ikippallaarmata saarullinniarluni bundgarnersortoqarsinnaanngilaq. Taamaalilluni nunaqarfimmi aalisarnermik inuussutissarsiuteqarneq annertuumik killilersorneqarpoq, tamannalu soorunami uggornarpoq, Marius Levisen oqarpoq.

KNAPK isumalluartoq

Royal Greenlandimiit KNAPK-miillu aallartitat aggustimi angalammata Qaqortumi Narsamilu aalisartut ataatsimeeqatigineqarput. Angalanerlu pissarsiaqarfiulluarsimasoq KNAPK-ip siulittaasua Pele Blytmann oqarpoq.

- Royal Greenlandip Kujataani tunitsiviutiminik ineriartortitsinissaa siunniunneqarsimasoq angalanermi paasitinneqarpugut, tamannalu siunissamut isumalluarnerulersitsivoq.

- Royal Greenland Kujataani aalisarnermik inuussutissarsiuteqarnerup inerisaaffigineqarnissaanut atatillugu KNAPK-mik suleqatiserinnippoq, tamannalu soorunami peqataaffigissavarput, Pele Blytmann oqarpoq.

Ole Jørgen Davidsen Narsami aalisartullu peqatigiiffianni siulittaasuuvoq, aammalu KNAPK-mi siulersuisunut ilaasortaalluni.

- Royal Greenlandip Narsami aalisakkeriviani raajanik tunisassiorneq 2006-imi unitsinneqarmat tamanna Kujataani aalisarnermik inuussutissarsiuteqarnermut annertuumik kingunerlussimavoq.

- Taamaammat Royal Greenlandip Kujataani aalisarnikkut inerisaanissaq pillugu siunniussaqarnera assut isumalluarfigaarput, taanna oqarpoq.

Kujataani nunaqarfiit Alluitsup Paa, Eqalugaarsuit, Qassimiut, Saarloq, Ammassivik, Tasiusaq aamma Narsarmiut siornatigut tunitsiveqarnikuusut, taakkuli tamarmik matuneqarnikuusut, Ole Jørgen Davidsen paasissutissiivoq.  

Aalisarnermik ineriartortitsineq ukkatarineqassasoq

Royal Greenlandimi Ingerlatsinermut pisortap Sten Sørensenip oqarnera naapertorlugu Kalaallit Nunaanni sumiiffinni tamani aalisarnerup nukittuumik piujuaannartitsinerlu tunngavigalugu ineriartortinneqarnissaanut Royal Greenlandip peqataanissani kissaatigaa.

- Taamaammat aalisartut sumiiffinnilu aalisarnerup ulluinnarni pingaarutilittut inissisimaffiini najugaqartut qanimut oqaloqatiginissaat pingaartipparput.

- Aalisartut sumiiffinniillu aallartitat misilittagaat paasisaqarfigiumallugu Kujataani angalaqqammerpugut. Taamaaliornikkut Kujataani periarfissat pisariaqartitallu suli annertunerusumik paasisaqarfigerusuppagut, taanna oqarpoq.

Royal Greenland Kalaallit Nunaata kujasinnerusortaani maannakkut marlunnik – Aappilattumi Narsamilu - aalisakkeriveqarpoq. Taakku tamarmik ammapput, aalisakkanillu tulaassisoqaraangat tunisassiorneq ataavartumik ingerlasartoq Ingerlatsinermut pisortaq oqarpoq.

- Taamaammat maannakkut pisinnaasat sapinngisamik pitsaanerpaamik atorluarneqarnissaat ukkatarivarput.

- Tamanna ilutigalugu aalisarnerup ineriartortinneqarnera nukittorsassavarput, taamaalilluni tunitsivinnut aalisakkanik pilersuinerup aalaakkaanerusumik ingerlasinnaanissaa qulakkeerumallugu.

- Tamanna tunisassiornerup piareersarneqarsinnaanissaanut, piffissallu ingerlanerani sapinngisamik pitsaanerpaamik attatiinnarneqarsinnaanissaanut aalajangiisuussaaq, Sten Sørensen oqarpoq.

Suleqatigiissinnaanermut periarfissat pillugit Kommune Kujallermi borgmesterip Malene Vahl Rasmussenip, Demokraatineersup, ataatsimeeqatiginissaa Royal Greenlandimiit piareersarneqartoq suliffeqarfimmiit paasissutissiissutigineqarpoq.