Sanaartorfigissaanermut akit misissoqqissaarneqartut

Suliniutit nunaminertallu angissusaat assigiinngilluinnarsinnaammata, kommunini assigiinngitsuni sanaartorfigissaanernut akit eqqoqqissaartut saqqummiunneqarsinnaanngillat.

Tamanna ilaatigut ineqarnermut, attaveqaasersuutinut isorliunerusunut upalungaarsimanermullu naalakkersuisup Iddimanngiiu Jensen Biancop, Inuit Ataqatigiinneersup, Inatsisartunut ilaasortamut Mette Arqe-Hammekenimut, Naleqqameersuusumut, paragraf 37 naapertorlugu apeqquteqaataanut akissummi atuarneqarsinnaavoq.

Kommuunip suliassaa

Inissialiornissamut pitsaanerpaamik atugassarititaasunik pilersitsinissaq kommunip suliassaraa, sanaartorfigissaanermullu tapiissutit kommunalbestyrelsimit aalajangersarneqartarput. Taamaattumik kommunalbestyrelsit nunaminertanik agguaanermut, kuuffissualersuinissamut pilersaarutinut nutaanut, aamma illoqarfiup kuuffisa pingaarnersaani ingerlatsinermik aserfallatsaaliuinermillu akisussaasuupput.

Kommunit ilaat, ilaatigut Kommuneqarfik Sermersooq, sanaartorfigissaanissamut pilersaaruteqarput. Tamanna tunngavigalugu kommunalbestyrelsip Nuummi sinerissami illoqarfinnut allanut sanilliullugu inissialiortiternerup annertunerunera pissutigalugu pitsaanerpaamik sinaakkutissaqalernissaq anguniarlugu sanaartorfigissaanissamut politikkikkut anguniakkat siuarsarneqarnissaatut toqqarsimavaa.

Suliniutip annertussusia apeqqutaavoq

Nunatsinni sanaartorfigissaaneq aningaasartuutaangaatsiartarpoq. Tassani nunaminertanik suliaqarneq, aqqusinniorneq, pilersuinermut aqqutiliornerit attaveqaqatigiinnermullu suliniutit allat pineqarput. Silallu pissusaa immikkuullarissoq aamma sumiiffiup unammillernartuunera pissutigalugit suliarineqarnera sanaartorfigissaanermut akigitinneqartut sumiiffimmit sumiiffimmullu apeqqutaapput. Naleqqami politikerip Nuummi, Sisimiuni, Ilulissani, Qaqortumi Aasiannilu inissialiornissamut sanaartorfigissaanermut akit agguaqatigiissillugu qanoq akeqarnersut aamma paaserusuppaa.

- Isumaqarpunga sanaartorfigissaanermut akiliutit qaffakkiartupiloornissaat mianersuutigisariaqaripput, ingammik illoqarfinni mikinerusuni aningaasaqarnikkut ajornartorsiorfiusuni. Aamma illoqarfinni assigiinngitsuni sanaartorfigissaanermut akit assigiinngissutaat oqaatigiuminaapput. Taamaattumik sumiiffinni assigiinngitsuni sanaartorfigissaanermut akit pissarsiarineqarsinnaasariaqartut isumaqarpunga, Mette Arqe-Hammeken oqarpoq.

Sumiiffinni ataasiakkaani sanaartorfigissaanerup assigiinngilluinnarnera akigitinneqartut assigiinngissutaannut pissutaanerpaasartoq, taamaattumillu sumiiffinni aalajangersimasuni agguaqatigiissillugu akit oqaatigineqarsinnaanngitsut, ineqarnermut naalakkersuisoq ilisimatitsivoq.

- Pissutsit akinut sunniuteqartut ilaatigut tassaapput qanoq annertutigisumik sanaartorfigissaasoqarsimanersoq aamma qanoq pitsaassuseqarnersoq, aqqusineq, imermik pilersuineq, kuuffissualersuineq, innaallagissamik pilersuineq nunagissaanerit.

- Sanaartorfigissaanermut akiliutissat naatsorsorneqarnissaannut agguaassinissamut malitassaq imaluunniit nalinginnaasumik akiliutissaq kommunip atorsinnaavaa. Taakku marluullutik kommunimut pilersaarummi imaluunniit kommunip ileqqoreqqusaani aalajangersarneqarsimassapput, nalunaarutigineqarsimassallutilluunniit, Iddimanngiiu Jensen Bianco oqarpoq.

Aammali sumiiffiit assigiinngitsut sanilliukkaanni mianersuunneqartariaqartut erseqqissarpaa, assersuutigalugu sumiiffinni sanaartorfiusuni imermut kuuffimmullu aqqutit ajorsinnaammata.

Akit assigiinngitsut

Iddimanngiiu Jensen Bianco naapertorlugu sanaartorfigissaanermut akit assigiinngitsorujussuusarnerat misilittakkat nutaat takutippaat. Ataatsimut sanaartornermut illumut ataatsimut 300.000 koruuneqartarnera, siammasissumillu sanaartornermi illumut ataatsimit millioni koruuni sinnerlugu akeqarsinnaasarluni.

- Qanoq issutsit assiginngissinnaasarput, matumani assakaasulinnut aqqutit silissusaat, illoqarfiup ilaani aqqusineq, najugaqarfissiami aqqusineq, sumiiffimmi aqqusineq, aqqusinermullu atatillugu pisuinnaat, sikkilertullu aqqutaannik sanaartortoqarnersoq ilanngullugu.

- Sumiiffit ilaanni sanaartorfigissaaneq ikaartarfiliornermik, majuartarfiliornermillu ilaqartarpoq. Pisariaqartumik nunagissaanermi qaqqajunnamik qanoq annertutigisumik qaartiterisoqassanersoq, sanaartorfigissaanerup akianut aamma sunniuteqartarpoq.

- Taassuma saniatigut suliffeqarfiit sanaartorfigissaasartut akornanni unammilleqatiginneq inoqarfiit akornanni, piffissallu ingerlanerani nikerarsinnaasarpoq, taamaalillunilu akinut sunniuteqarluni, Iddimanngiiu Jensen Bianco oqarpoq.

Ilaqutariinnut ataatsimut illuliornermi quleriinnik inissialiornermiit akisunerusarpoq, tassani quleriinnik sanaartornermut sanilliullugu siammasissunik sanaartornermi sanaartorfigissaanermi atuilluarnerunngimmat.

Aammattaaq kommunit illoqarfiup ineriartortinneqarnissaa tapersersorniarlugu sanaartorfigissaanermut akinik naleqqussaasinnaavoq, ineqarnermut, attaveqaasersuutinut isorliunerusunut upalungaarsimanermullu naalakkersuisoq Iddimanngiiu Jensen Bianco paasissutissiivoq.

Akit qaffakkiartorput

Kalaallit Nunaanni sanaartorfigissaaneq Danmarkimit akisuneruvoq, pingaartumik assartuinermut, nunap pissusaanut atortussanullu assartorneqartartunut tunngatillugu.

Sanaartornermi akit 2023-mi juulimiit 2024-mi juulimut 6,4 procentimik qaffassimasur Naatsorsueqqissaartarfiup kisitsisaataani takuneqarsinnaavoq, tamannalu aamma sanaartornerup naammassineqarnissaanut akigitinneqartut ukiuni kingullerni qaffarujussuarnerannut pissutaaqataangaatsiarpoq.