Pinngortitaleriffimmi Silap Pissusianik Ilisimatusarfiup silap pissusiata allanngoriartornera pissutigalugu siku Kalaallit Nunaanni piniarnermik inuussutissarsiuteqarnermut pingaaruteqartumut ajornartorsiutaasoq ilisimatitsissutigaa.
Savissivimmi piniartut misilittagaqarluartut ukiut kingulliit ingerlaneranni sikup allanngoriartornera pissutigalugu piniartorpassuit ilaqutaalu atugarliortut oqarput.
Pinngortitaleriffimmi Silap Pissusianik Ilisimatusarfiup silap pissusiata allanngoriartornera pissutigalugu siku Kalaallit Nunaanni piniarnermik inuussutissarsiuteqarnermut pingaaruteqartumut ajornartorsiutaasoq ilisimatitsissutigaa.
Savissivimmi piniartut misilittagaqarluartut ukiut kingulliit ingerlaneranni sikup allanngoriartornera pissutigalugu piniartorpassuit ilaqutaalu atugarliortut oqarput.
Annertuumik kinguniperluuteqartoq
Savissivimmi 50-it missaanni innuttalimmi puisit amiinik tunisineq piniartunit aningaasarsiutigineqarpoq. Savissivik eqqaalu oktobarimi siornatigut sikuusarput, ukiunili kingullerni kingusinnerusukkut sikuniartalertoq, nunaqarfimmi piniartoq Olennguaq Kristensen oqarpoq.
- Ukioq manna decembarimi atorsaasumik sikuvugut, taamaasillutalu puisinut qassuserluta. Sapaatit-akunneri marluinnaat qaangiummata anorersuarneranit mallerneranillu sikuerpugut tamannalu sikup saannerulersimaneranik pissuteqarpoq, taamaasilluta piniartoqatikkalu qassutinik annaasaqarpugut.
- Siku nutaaq angallavikkuminarsisimanersoq paasiniarlugu qanittukkut misissorpara, taamaalisimanngitsorlu paasillugu. Ukiup taamaalinerani siornatigut misigisimasimanngisatsinnik isseqanngilaq. Taamaattumik sikup allanngornera Savissivimmi piniarnermik inuussutissarsiuteqartunut annertuumik kinguneqarsimavoq, oqarpoq.
Olennguaq Kristensen piniartuunermi saniatigut nunaqarfiup puisit amiinik tunitsiviani sulisarpoq. Taanna naapertorlugu siornatigut ukiup taamaalinerani puisit amii amerlasuut tunineqartaraluartut maanna sapaatip-akunneranut ikittuinnaat tingusarpai.
Aningaasarsiornerup ajorseriangaarnera
Ole Nielsenip, Savissivimmi aamma piniartuusup, puisit amiinit isertitani appariartupiloornerarpai.
- Juulli sioqqullugu kingullermik qimussimik piniariarpunga. Piffissami kingullermi sikusiortarnikuuvugut, anorili pissutigalugu sikuarpugut. Sikumik ajornartorsiuteqarnerput pissutigalungu piniariartarfitsinnut apississinnaanngilagut.
- Ukiup taamaalinerani puisit amii 100-nit amerlanerusut tunisaraluarpakka, maannakkulli affaaluunniit suli angusimanngilakka.
- Siku silap issagiarnera pissutaalluni suli saappallaarpoq, neriuppungali ukiuunerani qajannaatsumik sikujumaartugut, oqarpoq
Naalakkersuisut inuussutissarsiutigalugu aalisartunut, piniartunut nunalerisunullu pilersitseqqinnissamut tapiissuteqarsinnaapput. Qinnuteqartup pigisat ajoquserneqarsimasut, inuussutissarsiummut atortut annaaneqarsimasut assigisaanilluunniit akornuserneqarsimalluni sila pissutigalugu ajornartorsiuteqarnermik ajunaarnersuarmilluunniit pisoqarsimaneranik uppernarsartariaqarpaa.
Olennguaq Kristensen aamma Ole Nielsen naapertorlugit Savissivimmi piniartut arlallit pilersitseqqinnissaminnut tapiissuteqarnissamik qinnuteqaateqarnerminni itigartinneqarsimapput.
Ajorneruleriartortoq
Lorens Meire, Pinngortitaleriffimmi Silap Pissusianik Ilisimatusarfimmi ilisimatusartoq, naapertorlugu siunissaq ernummatigissallugu pissutissaqarluarpoq.
- Paasissutissat pigisavut naapertorlugit takusinnaavarput Qaanaami eqqaanilu siku annikilliartuinnartoq. Aamma piniartut siku annikinnerulersimasoq oqaluttuarput, kingusinnerujussuakkullu takkuttarsimalluni sukkanerusumillu aattarluni.
- Piniartut misigisaat paasissutissanut pigisatsinnut naapertuupput. Sikup allanngorneranut immap silaannaallu kissatsikkiartornerat pissutaavoq, aammali anorlernerulernera sivisunerusumillu anorersuartarnerata kingunerisaanik taama pisoqarpoq, oqarpoq.
Ilisimatusartuuneq nunap immikkoortuani tassani, aammali Kitaata sineriaani, silap pissusiata allanngoriartornera pissutigalugu sikusarnera allanngorluinnartoq, siunissamilu sikusarnera allanngoraluttuinnartillugu silap pissusia ajornerulerumaartoq oqarpoq.
Alianartoq isumakulunnartorlu
Lorens Meire Kalaallit Nunaanni sumiiffinni arlalinni piniarnermik pingaarnertut inuussutissarsiorfiusuni pissutsit allanngorumaartut oqarpoq.
- Soorunami tamanna alianartorujussuuvoq, piniarnermik inuussutissarsiuteqarnermut annertuumik sunniuteqarmat. Ukiut ilaanni siku qajannaannerulaartassaaq, paasissutissaatitsinnili takuneqarsinnaavoq ukiut kingulliit 30-t ingerlaneranni siku malunnaatilimmik qajannarsisimasoq, paasissutissallu tamarmik tikkuussipput siunissami taamaaginnassasoq.
- Ajornartorsiut tamanna Kalaallit Nunaanni tamarmi atuuppoq, nunami immamilu pinngortitap ataqatigiinneranut sunniuteqarluni, taamaattumik isumaqarpunga ineriartorneq tamanna ernumanartorujussuusoq, oqarpoq.
Taanna naapertorlugu piniartut aalisartullu allannguutit pillugit ilisimasaannik pissarsisarnissaq pingaaruteqarpoq, taamaalillutik paasissutissat taakku silap pissusianik ilisimatusarfimmi atorneqarsinnaaniassammata.
