Suliffeqarfiit katullutik kraninik ingerlatsivimmik pilersitsisut

Nuuk Transport aamma BMS Group unammilleqatigiinnermut oqartussanut ingerlatseqatigiiffimmik BMS Kivitsisunik, Nuummi qitiusumik pilersitsinissamik qinnuteqarput.

Suliffeqarfiit taakku marluk ingerlatseqatigiiffimmi nutaami, kraninik ingerlatsisunik, suliniutinut aqutsisunik immikkoortortanillu aqutsisunik 20-t missaannik sulisulimmik, tamarmik immikkut 50 procentinik piginneqataassapput. Taama tusagassiutitigut nalunaarummi allapput.

Niclas Niclasen, Nuuk Transportimi pisortaasoq, BMS Kivitsisuni pisortanngussaaq, Kim Hvolbølilu, BMS-imi suliniutinut tuniniaanermut pisortaq, ingerlatseqatigiiffimmi nutaami siulersuisuni siulittaasunngussalluni.

Pisortaaneq Niclas Niclasen aalajangernermut pissutaasoq ima nassuiarpaa:

– Iliuuserisartagarput maannakkut tassaavoq, nunatsinni suliffeqarfiit pioreersut nukittorsarnissaat. Sulianut tunngatillugu piginnaasaqarluarpugut, ilaannikkulli suliassat suliariniarlugit nikinnik amigaateqartarlutalu immikkut atortussaqarneq ajorpugut. Tamanna maanna allanngorpoq, oqarpoq

Piffissaq ulapaarfiusoq, ajornartorsiutaasinnaasartoq. Suleqatigiinnerullu nutaap tamanna ajornannginnerulersissagaa pisortaanerup oqaatigaa:

– Assersuutigalugu kranit angallattakkat arfineq-pingasut atorneqartussaanerat eqqarsaatigalugu ingerlatseqatigiiffimmi nutaami suliassat suliarinissaat siunissami ajornannginnerujussuussaaq, tassami BMS-koncernimit atortunik atuinissaq ajornannginnerullunilu eqaannerusumik periarfissaammat. Tamanna siornatigut periarfissaasimanngilaq, Niclas Niclasen oqarpoq.

BMS suliffeqarfimmut nutaamut atortussanik, suliniutinik aqutsinermik teknikkikkullu piginnaasaqartitsinissamik ikiuukkumaartoq, BMS Kivitsisuni siulersuisunut siulittaasunngussasoq Kim Hvolbøl nassuiaavoq:

– Nuuk Transport ukiorpassuarni suleqatigaarput, ataatsimoornerpullu pissutigalugu najukkami attaveqaatit, nunanilu tamalaani attaveqaatit atorluarsinnaavavut.

– Ingeniørit immikkoortortaqarfiat angisooq sanaartornermik, isumannaallisaanermik titartaanermillu suliaqartuuvoq, aammattaaq suliniummik aqutsisoqarpoq atortussanillu allanik peqarluta.