Suliffeqarfik Kuannersuarniittoq Omdbudsmandimut maalaaruteqartoq

Australiamiut aatsitassarsiortitseqatigiiffiat Energy Transition Minerals maalaarummik qulinik quppernilimmik oqartussaasut Kuannersuarni suliamut atatillugu, ingerlatseqatigiiffiup suliffeqarfiutaata Greenland Mineralsip (GM) suli akissutinik tigusiffiginngisaani, pappiaqqanik takunnikkumanernik arlalinnik suliaqannginnerat pillugu Kalaallit Nunaani Ombudsmandimut tunniussivoq. 

"GM-p pappiaqqanik takunnikkumanermik qinnuiginninnerata oqartussanit passunneqarnera eqqarsaatigalugu, suliap Ombudsmandimut ingerlatinnera pissusissamisoortumik alloriaqqinneruvoq. GM paasissutissanik soqutigisaminik isumaginninnissamut pisariaqartunik takunninnissamut qinnuteqarpoq, oqartussalli qinnuteqaatinik suliarinninnerata GM-p pisariaqartumik piffissarlu eqqorlugu paasissutissanik taakkunannga pisarsineranik kinguneqanngilaq ", Daniel Mamadou, Energy Trnsition Mineralsimi pisortaq oqarpoq. 

Tanbreezimut akuerissummik takunnikkumaneq

Maalaarut Sermitsiap takusaa sallertut pappiaqqanik takunnikkumanermik qinnuiginninnernik sisamanik, ingerlatseqatigiiffiup 2025-mi tunniussaanik kiisalu kingusinnerusukkut 2026-mi marsimi peqataanermi takunnikkumanermik qinnuteqaammut tunngassuteqarput.

Pappiaqqanik takunnikkumanerit ilaat ataaseq 2025-mi februaarimeersoq qalluinissamik akuersissummik kiisalu piumasaqaatinik atugassanillu piffimmi ingerlatseqatigiiffimmut unammillertimut – Killavaat Alannguanni Tanbreez Miningsimut – tunniunneqartumut attuumassuteqarpoq.  

Energy Transition Mineralsip Tanbreez Miningsip suliniutaanut qalluinissamik akuersissummi qalluinissamik suliaqarnermik akuersissut kiisalu avatangiisinik sunniutinik naliliineq (VVM) taamatullu aamma inuiaqatigiinnut piujuartitsinermut naliliineq (VSB) takujumavai. Tamatuma saniatigut atugassarititat piumasaqaatillu pillugit paasissutissat qalluinissamik akuersissummik tunniussinermi tunngavigineqartut taamatullu aamma ingerlatseqatigiiffiup qalluisinnaanermut akuersissummik pissarsineranut piumasaqaatit malinneranik paasissutissat kiisalu pappiaqqat qalluinissamik matusinissamillu pilersaarutinut tunngasut takujumaneqarput. 

Ingerlatseqatigiiffiup maalaarummini suliap ingerlanera, tassani arlaleriarluni nukingisaarigaluarluni taamaallaat ilaannakortumik akineqarneq atortussiallu annertuutigut amigarlutillu naleqquttuunnginnerat, kiisalu Naalakkersuisoqarfiup Aatsitassanullu Aqutsisoqarfiup arlaleriarlutik namminneq piffissamik killiliussaminnik naammattumik ilisimatitsinatik qaangiinerat ilanngullugit, nassuiarpai. Taamatullu pappiaqqanik takunnikkumanerup ukioq ilivitsoq ingerlagaluartoq suli akuerineqannginnera aamma.

Periutsinut akerliusoq

Maalaarut ataatsimut isigalugu pissutsinut pingaarnernut tallimanut attuumassuteqarpoq, tassanilu periusaasut avaqqullugit kiisalu amigartumik eqqunngitsunillu aqutsinermi inatsimmut akerliusunik suliap ilaannaanut aalajangiivigineqarlutik, pisariaqanngitsumik sivisuallaartumik sulianik ingerlatsivigineqarsimasoq ingerlatseqatigiiffik isumaqarpoq. 

"Pissutsit tamakku – immikkoortillugit ataatsimoortillugillu – pisortat ingerlatsineranni eqqortumik attuumassuteqanngitsumillu sulianik suliarinninnissami periutsinik nalinginnaasunik unioqqutitsinerusut" maalaarummi allassimavoq. 

Erseqqissuliornissaq erseqqissumillu ingerlatsinissaq ujartoraat

Ingerlatseqatigiiffiup maanna Ombudsmandi isumalluutigilerpaa, takunnikkumanernillu qinnuteqaatit sukumiisumik attuumassuteqanngitsumillu ingerlanneqarsimanerat misissorneqassasoq neriuutigaa.

"Pissutsit maalaarummi qaqilerneqartut erseqqinnerusumik misissorneqartariaqarput, Ombudsmandillu taakku misissorluassagai neriuutigaarput. Erseqqissumik misissuineq immikkoortumi siunissami ersarinnerusumik siunnerfeqarnerusumillu allaffissornermi periuseqalernermik ikorfartuisinnaavoq. Erseqqissuliornissap ersarissumillu ingerlatsinissap akuusunullu tamanut eqqoriaruminarnerusumik ingerlatsinissap annertunerpaamik qulakkeernissaa uagut pingaartipparput", Daniel Mamadou oqarpoq. 

Allakkiarpassuusut 

Sermitsiap ingerlatseqatigiiffiup maalaarutaa Inuussutissarsiornermut Aatsitassanullu Naalakkersuisoqarfimmut saqqummiuppaa. 

ETM takunnissinnaanernut sisamanut qinnuteqarsimasoq taakku allapput.

"Tanbreezilu pillugu suliamik takunnikkumanermut qinnuteqarneq annertoorujussuuvoq. Suliami aalajangiisoqartinnagu ilaatigut allakkiarpassuit Tanbreezimut tusarniaassutigineqartariaqarput. Naalakkersuisoqarfik Tanbreezimut suliaq pillugu takunnikkumanermik qinnuteqartoqarnerani aalajangiiffigisassani pingasuni maannamut aalajangeereerpoq."

"Sulini pisinnaatitsissummik piginninnernut tunngasuni takunnissinnaanermut qinnuteqarnerit nalinginnaasumik sivisusarput. Ilaatigut allakkiat amerlallutillu allakkiarpassuit pisinnaatitsissummik piginnittumut siunnersortaanullu tusarniaassutigineqartussaapput."