Qillaq-Karl
Kristiansen sanasutut ilinniakkani 2018-mi naammassivaa. Maannakkullu namminersortutut
suliffeqarfiaraatini Hanahoq (Sanasoq, aaqq.) ingerlallugu.
- Ukiorpaaluit
sanasutut suleriarlunga namminersortunngornissaq
eqqarsaatigisimanngisaannarnikuullugu namminersortunngoriartuaarnikuuvunga, Qillaq-Karl
Kristiansen Sermitsiamut oqarpoq.
Qillaq-Karl
Kristiansen sanasutut ilinniakkani 2018-mi naammassivaa. Maannakkullu namminersortutut
suliffeqarfiaraatini Hanahoq (Sanasoq, aaqq.) ingerlallugu.
- Ukiorpaaluit
sanasutut suleriarlunga namminersortunngornissaq
eqqarsaatigisimanngisaannarnikuullugu namminersortunngoriartuaarnikuuvunga, Qillaq-Karl
Kristiansen Sermitsiamut oqarpoq.
Namminersortunngorniarluni
aalajangernera
Siornatigut suliffigisimasaminit suliassaarunnertik pissutigalugu angerlartitaavoq.
Qillaq-Karl Kristiansenip sanasunngorniarnini 2018-imi naammassivaa. Massakkullu Hanahoq suliffeqarfiutigalugu namminersortuulluni.
Asseq: Nammineq pigisaq.
- Oktobarimi suliassaarunnerput
tunngavigalugu suliffitsinni suliunnaarnikuuvugut, qaammatillu marluk missaani nammineq inigisara nutarterlugu aaqqissornikuuara, Qillaq-Karl Kristiansen oqarpoq.
Sivitsortumik suliffissaaleqinini pissutigalugu namminersortunngorniarluni aalajangerpoq.
- Eqqarsaatiginikuunngikkaluarpara namminersortunngorsinnaanissara, allamilli suliffissarsineq ajulerama namminersortunngornissara siunniuppara, Qillaq-Karl Kristiansen oqarpoq.
THULEP ANINGAASAATEQARFIA
Thulep Aningaasaateqarfia (Thulefonden, aaqq.) Kalaallit Nunaanni
Avannaata kommunianiippoq, arfineq marlunnillu ilaasortanik siulersorneqarluni.
Aningaasaateqarfiup siunertaa:
Aningaasaateqarfik Qaanaap illoqarfiani nunaqarfinnilu
Qeqertani, Savissivimmi Siorapalummilu suliniuteqarnernut pitsaasumik siumullu isigisumik
ineriartortinneqarsinnaasunik aallarnisaasunut ingerlatalinnullu tapiissuteqartarpoq, soorlu:
- Inuussutissarsiornikkut sulianut
ineriartornermut
- Avatangiisinik suliaqartunut
- Kulturikkut tapiiffigineqarsinnaasut
- Inuit ataasiakkaat ataatsimoortulluunniit
- Peqatigiiffiit
- Inatsisilerisullu Thulep aningaasaateqarfia, Avannaata Kommunia.
Najoqqutaq: Avannata kommunia.
Aningaasaateqarfiup Thulefondenip aningaasanik
tapiineratigut namminersortutut aallartissinnaalerpoq.
- Namminersortutut
aallartikkumallunga Thulefonden qinnuteqarfigaara, sakkunik atortunillu
pisinissannut tapiinissaa siunertaralugu, Qillaq-Karl Kristiansen nassuiaavoq.
Suliffeqarfiutini Hanahoq aasakkut 2024-mi aallartippaa. Taamaammallu umiarsuaq siulleq aqqutigalugu atortussanik tikisitsinnaasimanani.
- Suliassat
annikitsunnguit aallartissutigivakka. Siullerpaamik aneerasaartarfimmik
nutarterivunga, Pilersuisumi atortut pisiarisinnaasakka atorlugit, Qillaq-Karl Kristiansen oqarpoq.
Namminersortutut aallartinneq unammillernartoq
Suliffeqarfinnit allanit ilisimaneqannginnini suliffeqarfimmik pilersitsinermini unammillernartippaa
- Ilungersunarnerpaanikuuvoq
aallarteqqaarama suliffeqarfinnit ilisimaneqarnikuunnginnama, tassa taanna siullermik
isertitaqarniarnikkut aallartisarninni ilungersunarsimasoq, Qillaq-Karl Kristiansen oqarpoq.
Qaanaap mittarfiata silataani Hanahumi suleqatigiit suliarisimasami saani assilitittut.
Assi: Nammineq pigisaq
Suliffeqarfiutini aallartikkamiuk suliffeqarfinnit ilisarisimaneqalerniarluni suliffeqarfinnut attaveqartarpoq.
- Suliffeqarfinniit
ilisimaneqalerusullunga e-mailikkut suliffeqarfinnut nassiussuinikuuvunga.
Massakkut suliffeqarfiit assigiinngitsut arlallit saaffigisalernikuuaannga suliassanut
tunngatillugu neqeroorusioqqullunga, Qillaq Karl Kristiansen oqarpoq.
Qaanaami sanasutut
namminersortuuniaraanni naammagittarsinnaassuseqartariaqartoq, sanasutut namminersortup oqaatigaa. Qaanaarmi ukiumut marloriarluni imaluunniit pingasoriarluni taamaallaat umiarsuarmik pajuttumik
tikinneqartarmat.
- Atortussanillu tikisitsiniarluta
utaqqisariaqartarpugut. Suliassallu amerlanerpaartaat taamaallaat aasaanerani
suliassaasarlutik, Qillaq-Karl Kristiansen oqarpoq.
Sulisoqarniarneq
Ukioq
kingulleq suliassaqarluarnera pissutigalugu aasaaneraniit januarip
imaluunniit februarip tungaanut sisamanik sulisoqarpoq.
- Massakkunaasiit
suliassavut killeqartorujussuanngormata ataasiinnarmik suleqateqarallarpunga, Qillaq-Karl
Kristiansen nassuiaavoq.
Namminersortutut
suliffiuteqarluni oqitsuinnaanngilaq, ataasiarlunilu tunniutiinnarnissaminik
eqqarsaateqarsimavoq.
- Artornarsisarlunilu
oqileqqittarpoq. Tunniutiinnarnaveersaarneq uniinnarnaveersaarnerlu siumut aallariaqqissutaasarput, Qillaq-Karl Kristiansen
oqarpoq.
Nunaqqamminut tapersersuisoq
Aningaasatigut imaluunniit suliffeqarfiutini aqqutigalugu ikiuunnermigut timersoqatigiiffinnut aaqqissuussanullu assigiinngitsunut tapersersuisarpoq.
Qillaq-Karl Kristiansen (saamerleq) timersortartunut suliffeqarfiutini Hanahoq aqqutigalugu tapersersuinissani pingaartitaraa. Qaanaami sikukkut halv marathonnertoqarnerani aaqqissuussamut tapersersuinermini arpatsitsinermi aaqqissueqataasoq Niels-Jakob Skade (talerperleq) assileqatigigaa uani assimi takuneqarsinnaavoq.
Assi: Nammineq pigisaq.
- Qaanaami
timersornikkut periarfissakittuararsuummat timersortartut
tapersersorusunnartarput. Assersuutigalugu qimussersuartoqartillugu
ikiuuttarpunga, uiagassani nakkutilliisooqataallunga. Aamma aperineqariarama sikumiit nunamut qimusserluni
qaqiffissamik aqqutigissaanikuuvunga, Qillaq-Karl Kristiansen oqarpoq.
Siunissaq
Suliffeqarfik Hanahoq
suli mikisunnguuvoq, siunissamilu annertusiartornissaa piginnittuata neriuutigaa.
- Pilersaarusiullaqqinnerpaat
ilaginngimmannga siunissaq takorlooruminaatsippara. Kisiani soorunami ineriartorujoornissaq
angorusunnarpoq, Qillaq-Karl Kristiansen oqarpoq.
Illumi
mikisunnguami kioskikumi maannakkut sannaveqarpoq, neriuutigaalu anginerusumik siunissami sannaveqalersinnaassalluni.
- Taamaalillunga
ukiumut naammattunik atortunik peqartalernissara angusinnaalissagaluarakku, Qillaq-Karl
Kristiansen oqarpoq.
Qaanaap
illoqarfiani sanasutut namminersortut massakkut pingasuusut Qillaq-Karl Kristiansennip oqaatigaa,
tamannalu unammilleqatigiinnermut ajornartorsiutaasorinngilaa.
- Unamilleqatigiinnerput
imatut malugineq ajorpara, pingasuulluta illoqarfiarannguatsinnut
naammappasippugut, suliassat agguataarpasittaratsigit, Qillaq-Karl Kristiansen
oqarpoq.
