Svend Hardenbergip suleqatini Amerikamiu saqqummiuppaa
Kalaallit/Amerikamiut suliniutaat anguniagaqartorujuuvoq. Nunarsuarmi silassorissuusiat annersaannik sanaartortoqarlunilu ingerlatsisoqarnissaa pilersaarutaavoq. Tamanna Svend Hardenbergip tusagassiuutitigut nalunaarutaani atuarneqarsinnaavoq.
Svend Hardenberg Amerikamiup suliffeqarfiutaannik suleqateqalerpoq.
Assi: Oscar Scott Carl
Inuit Development Company, Svend Hardenbergimit pigineqartoq, aamma Amerikamiut suliffeqarfiutaat AmForge Corporation, pilersitseqataallunilu pisortaaneq Dan Whaley suleqatigiinnissamik atsiortuupput.
Suliffeqarfiit taakku marluk nukissiornermut, qarasaasianut atortorissaarutinik sanaartornermut immallu naqqatigut kabelimik ikkussuinermut tulleriiaaralutik sulineq ingerlateqqissagaat paasissutissiissutigineqarpoq.
- Erngup nukinganik nukissiorfik nunarsuarmi ataavartumik pilersuinermi suliniutigineqartut annersaassasoq naatsorsuutigineqarpoq, piffissamilu sivisuumi ataavartumik nukissiuuteqartitsissalluni silassorissuusiamik tunngaveqartoq tapersersorniarlugu, nalunaarummi allassimavoq.
Suleqatigiit
Suliniut Qeqqata Kommuniani suliffissaqartitsinissamik siunertaqartoq, aamma piffissaq ungasinnerusoq eqqarsaatigalugu Kalaallit Nunaannut aningaasatigut iluaqutaassasoq nalunaarummi aamma allassimavoq.
Amerikamiu pisortaaneq Dan Whaley Kangerlussuarmi ataasinngornermi atsioqatigiinnerup kingorna ima oqarpoq:
- Silassorissuusiaq akuulerpoq sukkasuumillu ineriartorlunilu. Piujuartitsissumik nukissiuutinit ingerlanneqartilluni pinngortitamiit nillusarneqarsinnaaguni pitsaanerussaaq. Kalaallit Nunaat taamaaliornissamut asseqanngitsumik periarfissaqarpoq, suliniummillu maluginiarnartumik tamatuminnga Svend aamma Inuit Development Company suleqatigilernera nuannaarutigaarput.
Aningaasaliisoq ilisimaneqanngitsoq
Svend Hardenbergip isumaqatigiissutip atsiorneqarnera “Nunatsinni piujuartitsisumik ineriartortitsinissamut suliniut pingaaruteqarluinnartoq" oqarpoq.
Suliffeqarfiit taakku marluk suliniuterujussuaq qanoq aningaasalersornissaa paasissutissiissutiginngilaat.
Inuit Development Company ApS Svend Hardenbergimit 2021-mi pilersinneqarpoq, aningaasaatillu nalunaarsorneqarsimasut 200.000 koruuniupput. Ukiut ingerlaneranni nammineq aningaasaatit 93.395 koruuninut appariarput, tamanna 2024-mut naatsorsuutit kingulliit takutippaat.
AmForgep suliarisartagai
AmForge Corporation ukiuni 70-init amerlanerusuni silaannakkut angallannermut, illersornissamut nukissiornermullu tunngasunik suliaqartarsimavoq. Suliaat pillugit nittartagaanni "sullitanik kiffartuussineq, illussanik titartaanermik suliaqarneq, saffiugassanik suliaqarnermik ilisimasaqarneq tunisassiornermillu piginnaasaqarnermik immikkut ittunik suliaqarnerit ataatsimoortillugit“ atuarneqarsinnaavoq.
Suliffeqarfik Californiami Azusamiittoq atortorissaarutinik nutaaliaasunik, ilaatigut titaniumimik, nikkelimik sisamanillu manngertornilinnik sanaanik, ilusilersuinermik ineriartortitsinermillu immikkut ilisimasaqarpoq.
