– Tasiilami takornariaqartitsisarfitsinni 2025-mi qanoq annertuseriartoqarsimanera pillugu kisitsisit eqqoqqissaartut suli piginngilakka. 2025-mili ukiup siulianut sanilliullugu 30 procentit sinnerlugit ineriartorsimanissarput naatsorsuutigaara, Tasiilami Arctic Dreamsimi pisortaq piginnittorlu Lars Anker-Møller Sermitsiamut oqarpoq.
Takornariartitsineq qaammatini arlalinni ingerlavoq.
– Tupinnaqaaq, takornariaqarnerlu aatsaat taama annertutigaaq. Oktobari, novembari decembarilu tikillugit takornariartitsinerput ingerlavoq. Taamaattumik Air Iceland Kulusummut oktobarip aallaqqaataani timmisartuussisarunnaarmat uagutsinnut sunniuteqangaatsiarpoq. Takornariartitsineq nalinginnaasumik septembarip tungaannaanut ingerlasaraluarpoq, oqarpoq
Ineriartornermut nunarsuaq tamakkerlugu Kalaallit Nunaat soqutigineqaleriartuinnarnera pissutaasut ilagaat, tamannalu takornarianit Island aqqusaarlugu angalasunit atorluarneqartarpoq.
- Pissutaasut ilaat tassaavoq, maani Tunumi imaatigut angallanneq maannakkut pitsaanerulluinnartumik ingerlassinnaagatsigut. Tamanna piffissami sivisunerusumi takornariartitsisinnaanngornitsinnik isumaqarpoq.
Daniel Kajangmat, Tasiilami takornarianik angallassisartoq, qaqqanullu takornariartitsisartoq.
Assi: Arctic Dream
Timmisartumik angallannermi ajornartorsiutit
Timmisartuussinerit ajornartorsiutaagaluartut tamanna iluatsilluarpoq.
– Nalinginnaasumik Kulusummiit timmisartuussisoqarsinnaanera nalornissutigisarparput, ukioq mannali aamma Nuummiit timmisartuussisoqarsinnaanera nalornissutigisarparput. Sullitavut kinguaattoortarsimapput imaluunniit timmisartuunneqarnissaminnut akornuserneqartarsimallutik, oqarpoq. nangillunilu:
– Taamaattumik Nuummiit timmisartuussinerup isumannaallisarnissaa takornariallu amerlanerusut tikissinnaanissaat qilanaaraarput.
Kulusummiit Tasiilamut qulimiguulimmik timmisartuussinerit sila pissutigalugu taamaatiinnarneqartarput, taamaattumillu politikkikkut kissaatigineqarpoq mittarfik Kulusummiit Tasiilamut nuunneqassasoq.
– Soorunami tamanna Kulusuup nunaqarfittut ineriartorneranut sunniuteqangaassaaq.
– Tasiilamili mittarfiliortoqarpat nunaqarfiit tamarmik qaninnerulersinnaapput, aamma timmisartoq toqqaannartumik Tasiilamut missinnaalerpat attaveqaatit nalorninartut atorunnaarsinneqassapput, Lars Anker-Møller isumaqarpoq.
Arctic Dreamip utoqqaat illuanniittut G9-mik angalanerat Ammassalimmi umiatsiamik angallanneqarnerat ukiaq manna aningaasaliiffigaat.
Assi: Arctic Dream
Ineriartornissamut periarfissat
Lars Anker-Møllerip ineriartornissamut periarfissarpassuit takusinnaavai, ingammik Kulusummi periarfissarpassuit suli atorneqanngitsut.
Namminermi Kummiuni ukiuni pingasuni najugaqarnikuuvoq nunaqarfillu ilisarisimalluarlugu.
Tassanilu periarfissarpassuaqartoq isumaqarpoq.
Ukiuni 25-ni piffimmi tassaniissimalereerluni attaveqaateqarlualerpoq, tamannalu niuernerminik ineriartortitsinissamut atorpaa, inuillu ukiukkut aasakkullu aningaasarsiorsinnaanerannut periarfissaqartittarlugit.
Arctic Dream takornarianut tunisassianik aamma ineriartortitsisarpoq.
– Takornariartitsinerup tungaatigut ineriartorneq malinnaaffigaarput, ilaatigut pinngortitamik avatangiisinillu soqutiginninnerulernermik takuneqarsinnaasumik. Aammali takornariartitsinerup ineriartortinnissaanut Namminersorlutik Oqartussani kommuninilu politikkikkut kissaateqarnerit malinnaaffigaagut, nassuiaavoq.
– Tapersersorusuppagut, tassami illoqarfitsinni suliffissanik pilersitsinissaq pingaartipparput.
TUNULIAQUTAQ
Lars Anker-Møller Tasiilamut frimærkinik tuniniaanermut pisortatut 2001-imi tikippoq, tamatumalu kingorna sumiiffimmi takornariartitsinermik ingerlatsivimmini ilisimasaqarlualerpoq.
Ukiut 20-t sinnerlugit Ammassallip eqqaani nunakkut immakkullu angalasimavoq, siullermik piniartuullunilu aalisartuusimalluni kingusinnerusukkullu takornarialerisutut sulisimalluni.
2004-mi piniarnermut allagartartaarpoq. 2007-imi atuakkiani Ammassalimmi piniartut saqqummersippaa. 2021-mi atuakkiami aappaa East Greenland — Five Star Nature saqqummersippaa, taannalu kalaallisut qallunaatullu assilialianik atuakkiaavoq siulleq.
Takornariartitsinermik ingerlatsivik 2007-imi aallartippoq, tamatumalu kingorna ineriartorluni. Kingusinnerusukkut aluminiumik umiatsiat Litauenimit pisiarineqartut tuniniaalerpai, taakkualu nammineq nunap immikkoortuanik ilisimasaqarluarnini tunngavigalugu Kalaallit Nunaannut tulluarsarnissaannut ineriartorteqataasimavoq.
/krarup
Takornariartitsisartunik ilinniartitsineq pilersaarusiornerlu piffissartornarnerusarput.
– Taamaattumik takornariat kissaataat malinniartarpavut, ilaatigut qaqqani angallassisartut ilinniartinneqarlaat aasaanerani ukiukkullu takisuunik naatsunilluunniit pisuttuarfigisinnaasaannik nioqqutissianik nutaanik tapersersuiniarluta.
– Takornarialerinermi unammillersinnaajumalluta nioqqutissanik nutaanik ineriartortitsiuartariaqarpugut, nunarsuarmilu takornariartitsinerup qanoq ingerlanera malittariuarlugu.
– Assersuutigalugu 2026-mi ulluni qulini pisuttuartitsineq nutaaq aallartipparput, tassanilu pisuttuartut ingerlanerini tammaarfiit nuunneqartassapput, pisuttuartullu apuuffissaanni tupeq iggavittut atorneqartoq nappareersimasarparput, tiimik kaffimillu piareersimasoqartarluni.
Tasiilami takornariat arfernik takuniaasut.
Assi: Arctic Dream
2026 pissanganartoq
2026 qanoq isikkoqassava?
– Ukiuunerani takornariartitsisarnermi nioqqutigut tamarmik inniminnerneqareerput. Arlalinnik angalanissanik nutaanik, ilaatigut Kulusummi, aaqqissuussaqarpugut, ingerlaannarlu innimigineqarput.
- Kitaanut sanilliutissagutta uangut sivisunerusumik ulluni tallimani qimussertitsisarpugut, takornarissallu illuaqqani unnuisinneqartarput. Assersuutigalugu ulluni tallimani qimussertsitinermi nunaqavissut angallassisutut atorneqartarput.
– Oqaatsit unammillernartarput. Kisianni takornariat qanoq misigisaqartarnerat eqqarsaatigalugu ilimagisatta naapertuunnerat qulakkeertariaqarparput. Qungujunneq ussersorlunilu attaveqarneq iluaqutigalugit sivisuumik angalasoqarsinnaavoq, inuusuttulli qimussertartut amerliartuinnartillugit tuluttut oqaluttartut amerliartorput. Akissutigineqartut ajunngilluinnarput. Takornariat nunaqavissut angalaqatigisernerat taakkualu kulturiat ilisarisimallualersimallugu nuannaarutigingaarpaat, Lars Anker-Møller oqaluttuarpoq.
Nunaqavissut suliffissaqarnerulissapput
Taamaattumik Arctic Dreamip ineriartortinneqarnera, takornarianik amerlanerusunik tikittoqartalernissaa nunaqavissunillu atuinerulernissaq politikkikkut kissaatigineqartunut naapertuuppoq.
Arctic Dreamip takornariartitsisartut nunanit allaneersut angalatitsinerit ingerlattarsimasai ineriartorteqqippai.
Maanna Arctic Dream takornarianik angallassinermi nunaqavissunik takornariartitsisartunik nuiertartunillu tapersersorneqarpoq.
Suliniutit taakkua kingunerisaannik nunaqarfinni takornarianik kiffartuussisunik suliffeqarfeeqqanik pilersitsisoqartalerpoq, Arctic Dreamillu taakku takornarianut atortarpai.
Qimussernermi takornarianik marlunnik angalatitsisarput, qimussertullu ataatsit aqqaneq-marlunnik 14-inilluunniit qimmeqarnissaat piumasaqaataalluni.
Aamma Arctic Dreamip aasaanerani angalasut nassataallu sumiiffimmi angallassisartut atorlugit angallattarpai, takornarianillu siulersuisarluni.
Kangiata sineriaani aasakkut angallassinerit amerlanersaat takornarianik nassatanillu assartuinermut atorneqartarput.
– 2026-mi aasakkut ukikkullu qanoq takornariaqartiginissaa suli nalunarpoq. Angalanerit nunarsuaq tamakkerlugu angalatitsivinnit tunineqartarput, amerlanerillu marsimi, apriilimi maajimilu tunineqarlutik, oqarpoq.
Arctic Dream 2025-mi ukiukkut, aasakkut ukiakkullu takornarianik isumaginninniarluni 19-inik aalajangersimasumik sulisoqalerpoq.
Ukiuunerani piniartut nunaqavissut takornariartitsisartut atorneqartarput, takornarianik qimussimik angallassinermik saniatigut aningaasarsiortarlutik.
Arctic Dreams 2019-imi Greenland Tourism Awardimik nersornaaserneqarpoq, aamma 2023-mi 2024-milu nersornaaserneqarnissamut innersuunneqarpoq.
Arctic Dreams 2016-imi Sulisitsisut Peqatigiiffiata aallarnisaasunut nersornaasiuttagaanik nersornaaserneqarpoq.
